Read Hmar HOSEA 5 Bible Online

HOSEA 5 - Hmar bible

HOSEA 5

¹Aw nangni thiempuhai, hi hi lo hre ta u, Nangni Israel sûnghai, lo ngai ta u, Aw laltak sûnghai, na lo sit ta u, Rorêlna chu nangni chunga ding a ni si a; Mizpaa chun châng in ni a, Tabor tlânga lên in zar leiin.

²Mi helhai chun sukhlum hi an uor êm êm a, Kei ruok chu an rênga kâwktu ka nih.

³Ephraim chu ka hriet a, Israel chu keimaa thup a ni nawh, Tuhin, aw Ephraim, nawchizawr i chîng leiin, Israel chu sukpawrche a na;

⁴An Pathien tienga nghakîr dingin, An thil thaw hlakhai chu an bânsan naw a; Nawchizawr lungril anni lai a um si a, LALPA chu an hriet naw a nih.

⁵Israel sawngtawlawi chun a hmai sanah ân hriettir a, Chuongchun, Ephraim le Israel chu an khawhlonaa chun tlûng an ta; Juda khawm anni lai tlu vêng a tih.

⁶An berâm ruolhai le an bâwng ruolhai leh, LALPA zawng dingin fêng an ta; Nisienlakhawm, ama chu hmu nâwng an tih, An kuoma inthawkin ân siekieng ta a nih.

⁷LALPA chungah vervêktakin an thaw a nih; Hnam dang nauhai an nei si a; Thla thar chun an lohma chen leh bohmangna intlun a tih.

⁸Gibea khuoa chun tawtawrâwt mût unla, Rama khuoa chun tawtawrâwt mût ro; Beth-avena chun khêk rak rak unla, Aw Benjamin, i hnung tieng kha!

⁹Ephraim chu hremna nia chun sukrêm nîng a ta, Thil hung ni ngei ding chu Israelhai laia chun kân hriettir ta a nih.

¹⁰Juda mi lienhai chu ramri sawntuhai an na, An chungah ka lunginsenna chu tui angin bunthlâng ka tih.

¹¹Ephraim chu thil teplohai zui a nuom vieu leiin, Nêksâwrin a um a, rorêlnaa chun suksietin a um a nih.

¹²Chuleiin, Ephraim ta ding chun hângthim ang ka na, Juda sûngkuohai ta ding chun hmawnna ang ka nih.

¹³Ephraim chun a natna a hmu a, Juda chun a hliem a hmu a, Chuongchun, Ephraim chu Assuria kuomah a fe a, Laltak Jareb kuoma chun mi a tir a; Nisienlakhawm, ama chun a sukdam thei naw cheu a, In hliemna chu a sukdampêk thei bawk naw cheu.

¹⁴Ephraim ta ding chun sakeibaknei ang, Juda ta ding chun sakeibaknei vânglai ang ka ni ding a ni si a; Keima, keima ngeiin keithlêr ka ta, Fêng ka ta, fe hmangpui ka tih; Sansuoktu ding tukhawm um naw ni hai.

¹⁵An thiemnawzie an inhriet a, ka hmêl an zawng hma chun, Fêng ka ta, ka hmunah kîr nâwk ka tih; An tuornaa chun mi zawng an ta, hieng hin tîng an tih: