Read Hmar HOSEA 7 Bible Online

HOSEA 7 - Hmar bible

HOSEA 7

¹Israel sukdam ka tum leh Ephraim khawhlona a hung inlang a. Samaria rîtlona leh, hlêm an chîng a nih. Sûng tieng inru a hung lût a, Tuol tienga chun suomhmang ruolin an suom si a,

²An rîtlona po po chu ka hriet zing ti An lungrilin an ngaituo nawh; Tuhin chu an thilthawhai ngeiin a chîm vêl tlat ta a, Ka hmaihma ngeiah an um a nih.

³An rîtlona chun laltak an suklâwm a; An thu khêlin mi lienhai an suklâwm bawk a.

⁴An rêngin uire an na, Bei siemtuin thuk a ur lum, Beiphit a hmethnâk a tho hmaa, Mei tâwl a châwlsan hri ang hi an nih.

⁵Ei laltak nia chun mi lienhai chu uoin inruitakin an insukrui a, Ama chun hmusittuhai ruolin a kut a phar a.

⁶Inrûka an inchân laiin an lungril chu thuk ang elin an siem ta a; An lunginsen chu zânkhawvârin a dei a, Zîngkâr chun meichawk angin a hung chawk a.

⁷Thuk ang elin an sa vawng a, an rorêltuhai an sukbohmang a; An laltak taphawthai chu an tlu a, Anni lai tukhawm a mi ko an um nawh.

⁸Ephraim hlak chu hnam danghai lai ân zêlsa a, Ephraim chu bei inlet lo a nih.

⁹Mikhuolhai chun a hrâtna an fâk zopêk a, Ama chun chu a hriet nawh; Hmul inṭuokin ama chu a bâwm nuol ta a, Ama chun chu a hriet nawh.

¹⁰Israel chapona chun ama thiemnawzie ân hriettir a, Nisienlakhawm, hieng po poa khawm hin, LALPA an Pathien tieng chu an ngha naw a, Ama chu an zawng bawk nawh,

¹¹Ephraim chu vaṭhu inhai, hrietthiemna nei lo ang a lo na, Aigupta tieng an ko vak a, Assuria tienga chun an fe vak a;

¹²An fe chu an chungah ka lên hei dêng ka ta, Chunglêng vate man angin man ka tih; An thil suol thaw ang huin anni hrem ka tih.

¹³An chung a rik ie; ka kuoma inthawkin an fe hmang ta si a! Bohmangna an chungah a tlung ie, ka chungah an hel ta si a! Kei chun anni sandam ka nuom a, Anni ruok chun khêl an mi hril khum a,

¹⁴An lungril takin an mi ko naw a, An khum laizâwlah an chierinthluok mei mei a nih; Bu le uoin dingin an inkhâwm a, ka chunga chun an hel si a.

¹⁵Kei chun an bânhai chu inchûktirin ka sukhrât a, Nisienlakhawm, ka chungah thil ṭha naw an suongtuo a nih.

¹⁶An ngha kîr a, Achunghnungtak kuomah ni lovin; Thalngul rul ang an nih, An mi lienhai chu an ṭawng pâwngpawr leiin kâwlhnâmin tlûng an tih; Hi hi Aigupta rama nuizatbûr an nina nîng a tih.