Read Hmar JOEL 3 Bible Online

JOEL 3 - Hmar bible

JOEL 3

¹“Ngai ta u, chuong niahai le chuong pha chun, Juda le Jerusalem sala an um chu ka ṭhuoikîr nâwk pha chun,

²hnam po po kei khâwm ka ta, anni chu Jehosaphat kâwnah hung ṭhuoi thlâng ka ta, ka ram an sem dar a, hnamhai laia an sukdar, ka mihai le ka rochan Israelhai ta ding chun anni chu chutaka chun khing ka tih.

³Ka mihai ta dingin ṭhum an vâwr a, nawchizawr man dingin pasal naupang an pêk a, uoin an dâwn theina dingin, a man dingin nuhmei naupang an zawr a.

⁴Anih, aw Tura le Sidon le Philistin ram po pohai, ka ta dingin ieng am in ni a? In mi thung ding am a nih? In mi thung chun, hrâttakin, inhmawtakin in mi thungna chu in lu chung ngeiah thung vêng ka ti cheu.

⁵Ka tangkaruo le ka rângkachak in lâk a, ka thil ṭhatak, ditumtakhai, in biekin sûngahai in chawi lût vei a;

⁶Juda nauhai le Jerusalem nauhai khawm an ramria inthawka hlataka in sawn hmang theina dingin Grik naupasalhai kuomah in zawr el si a;

⁷ngai ta u, in zawrna hmuna inthawk khan chawkthoin insuoktir ka ta, in thungna chu in lu chung ngeiah thung vêng ka tih.

⁸In naupasalhai, in naunuhmeihai chu Juda nauhai kutah zawr ka tih; anni chun hlatakah Seba mihai kuomah anni chu zawr an ta, LALPA chun a ti tah a nih,” tiin.

⁹“Hi hi hnamhai lai chun hril dar unla, indona buotsai unla, mi hrâttakhai chawktho unla, indo mi po pohai hung hnai hai sienla, hung raw hai se.

¹⁰In hnuoi inletna hmawrzumhai kâwlhnâmah sut unla, in thei kûng âtbawngna chemtêhai chu feiah sut ro; mi hrât naw khawm a, Ka hrât a nih, ti raw se.

¹¹A vêla hnam po pohai, inhmaw unla, pungkhâwm unla, hung tâwl ro; aw LALPA, chutaka chun i mi hrâttakhai infe thlâktir rawh.

¹²Hnamhai chu inchawktho sienla, Jehosaphat kâwna chun hung tâwl raw hai se, chutaka chun a vêla hnam po po hai chunga rorêl dingin ka ṭhung ding a nih.

¹³In kâwite kei dawk unla, bu sîk a hun ta si a: hung unla, hung sirsâwr ro; grêp sâwrna khur chu a sip a, bêlhai chu a sip liem a; an suolna a nasa si a.

¹⁴Mipuihai, thusukthlûkna kâwna mipui um mur murhai! LALPA ni chu thusukthlûkna kâwna chun a hnai ta si a.

¹⁵Nisa le thla dâm an inthim a, arasihaiin an varna an thup a.

¹⁶“Chun, LALPA chu Zion tlânga inthawkin inrûm dur dur a ta, Jerusalema inthawkin a râwl insuong a ta; vân le hnuoi inhnîng an ta; nisienlakhawm, LALPA chu a mihai ta dingin inhumhimna nîng a tih, Israel mipuihai ta dingin kulbîng nîng a tih.

¹⁷Chuongchun, LALPA in Pathien ka tlâng inthieng Ziona chêng ka nih ti hrieng in tih; chuongchun, Jerusalem khuo chu inthieng a ta, mikhuol tukhawm fethleng nâwk ta dêr naw ni hai.

¹⁸“Chu ni chun tlâng insânghai chun uoin thlum infartir an ta, tlânghai chu nênetuiin luong a tih, Juda ram vadungtêhai po po chu tuiin luong a ta; LALPA ina inthawkin tuikhur hung inchik dawk a tih, Sittim varuom chu hung sukhnâwng a tih.

¹⁹Juda nauhai chunga nunsetaka thawa, an ramah mi thiem thisen an insuo leiin Aigupta ram chu bo a ta, Edom ram chu thlalêr ram ṭâwl nîng a tih.

²⁰Juda ram ruok chu kumkhuoin um zing a ta, Jerusalem chu suona inthawka suon dang chenin.

²¹Chun, an thisen ka isâwpfai naw chu sâwpfai ka ta, LALPA chu Ziona chun a chêng zing si a.”