Read Hmar AMOS 3 Bible Online

AMOS 3 - Hmar bible

AMOS 3

¹Aw, Israel nauhai, Aigupta rama inthawka ka ṭhuoi suok sûngkuohai, LALPAIN hienga a sawisêlna cheu hi lo ngai ta u.

²“Nangni chau hi khawvêla sûngkuo po po laia ka hriet in na; chuleiin, in khawhlona po poahai chun hrem ka ti cheu.

³An inrem chau naw chun mi pahni chu an intlawn ding am a nih?

⁴Sakeibakneiin sa a man naw lai ramhnuoiah ân rûm hlak am a nih? Sakeibaknei vânglaiin iengkhawm a man naw chun a pûka inthawk chun ân rûm hlak am a nih?

⁵A ta dinga tawktar a um naw chun vate chu hnuoia châng chun a âwk hlak am a nih? Châng chu iengkhawm âwk lovin hnuoia inthawk chun ân chim hlak am a nih?

⁶Khawpuiah tawtawrâwt an mûtin, mi ṭi lovin an um hlak am a nih? LALPA thaw lo chun khawpuia chun sietna a tlung thei ding am a nih?

⁷Indiktakin Lalpa PATHIEN chun a rawngbâwltu, a zâwlneihai kuoma a thurûk hril lovin iengkhawm thaw naw ni.

⁸Sakeibaknei ân rûm a, tuin am ṭi nâwng a ta? Lalpa PATHIEN chun thu a hril a, tuin am hril naw thei an ta?” tiin.

⁹Asdod lal inhaia le Aigupta ram lal inhaia chun hril unla, “Samari tlâng chunghaia chun inkhâwm unla, chun, chutaka buoina lientak umhai le nêksâwrna umhai chu en ro.

¹⁰An lal inahai pâwngnêkna le suomhmangna siekhâwmtuhai chun sukdik dân an thiem si nawh,” LALPAIN a ti a.

¹¹Chuleiin, LALPA Pathien chun hieng ang hin a tih, “Ram vêla khawm chun hmêlma um an ta, chun, i hrâtna chu i kuoma inthawk chun la hmang a ta, i lal inhai la suksieng a tih,” tiin.

¹²LALPA chun hieng ang hin a tih. “Berâmpu chun sakeibaknei baua inthawkin ke pahni amanih, nakâwr hlek amanih a sansuok angin, chuong angin Samari khuoa khum kila le khum tuktulungêk puon phan lukham chunga Israel nau umhai chu sansuok a tih.

¹³Ngai unla, Jakob sûnghai chunga chun inhriettir ro,” sipaihai Pathien, Lalpa PATHIEN chun a tih.

¹⁴“Israel bawsietnahai chu ama chunga ka hrem chun, chu nia chun Bethel khuoa maichâmhai kihai chu tanbawng an ta, hnuoiah tlâng an tih.

¹⁵Chun, thlasik in le nipui in vaw sieng ka ta, saiha inhai chu bohmang a tih, in ropuihai chun tâwpna nei an tih,” LALPA chun a tih.