Read Hmar JONA 1 Bible Online

JONA 1 - Hmar bible

JONA 1

¹Amittai naupa Jona kuomah LALPA thu a hung tlung a:

²“Tho la, Ninevi khuo, khawpui ropuitaka chun fe la, a chunga thu tlânginsampui rawh; an rîtlona chu ka hmaah a hung tlung ta si a,” tiin.

³Nisienlakhawm, Jona chu LALPA hmaa inthawka Tarsis-a tlân hmang dingin a tho ta a; chun, Joppa khuoah a zuk fe a, Tarsis khaw pan ding lawng a hmu a, chuongchun, a chuong man ding chu a pêk a, LALPA hmaa inthawk chun Tarsis pan dinghai le fe dingin lawnga chun a lût thla ve ta a.

⁴Nisienlakhawm, LALPA chun thli natak el tuipuia chun ân hrângtir a, tuipuia chun thlipui nasatak el chu a hrâng ta a; chuongchun, lawng chu kawi ding ang elin a um ta a.

⁵Chun, lawng mihai chun an ṭi a, mâni pathien seng an ko a; lawng chu an ta dinga a zângna dingin lawng sûnga thuomhnawhai chu tuipuia chun an pei suok ta a, Jona ruok chu lawng sûngril taka chun a lo lût ta a, a lo zâl a, a lo ininnghil dêr ta a.

⁶Chuongchun, lawng hotu chu a kuoma chun a hung a, “Aw nang a inpa, iengtizie am a na? Tho la, i Pathien ko rawh, Pathien chun, ei bohmang nawna dingin a mi ngaituo rawi mawh,” a ta.

⁷Chun, “Hung ta u, hi thil ṭha naw ei chunga hung tlung hi tu lei am a na ti ei hriet theina dingin, ṭhum vâwr ei tiu,” tiin an inbiek tâwl a. Chuongchun, ṭhum chu an vâwr a, Jona chunga chun a tla ta a.

⁸Chun, a kuoma chun, “Hi thil ṭha naw ei chunga um hi tu lei am a nih mi hril rawh, kan ngên che hi? Ieng sinthaw am i na? Khâwlaia inthawka hung am i ni a? Khâw tieng ram mi am i na, khâwlai ieng hnam am i na?” an ti a.

⁹Ama chun an kuomah, “Hebrai mi ka na, tuipui le khawmuol siemtu LALPA, vân Pathien chu ka ṭi a nih,” a ta.

¹⁰Chun, mihai chun an ṭi nasa ta êm êm a, a kuoma chun, “Ieng am i lo thaw an leh?” an ti a; a hril ta lei chun mihai chun LALPA hmaa inthawkin a tlân hmang a nih ti an hriet ta a.

¹¹“Ei ta dinga tuipui infâwn a re theina dingin i chungah ieng am kan thaw ding? Tuipui hlak chu ân fâwn nasa deu deu el si a,” an ti a.

¹²Ama chun an kuomah, “Mi pawm kâng unla tuipuia hin mi the lût el ro; chuongchun, tuipui hi in ta dingin infâwn ta naw nih; keima leiin hi thlipui nasatak el hi in chungah a hrâng a nih ti ka hriet si a,” a ta.

¹³Nisienlakhawm, mihai chun khawmuola kîr dingin an kar rak rak a, amiruokchu, an thei naw a, tuipui hlak chu an chungah ân fâwn nasa deu deu el si a.

¹⁴Chuleichun, LALPA chu an ko a, “Aw LALPA, hi mipa hringna lei hin mi sukbohmang naw la, mithiem thisen maw chu kan chunga innghat lul lo dingin kan ngên che, Aw LALPA, kan ngên che, nangin i nuom anga i thaw a ni si a,” an ti a.

¹⁵Chuongchun, Jona chu an pawm kâng a, tuipuia chun an the lût ta a; chun, tuipui infâwn so bur bur chu a re ta a.

¹⁶Chuongchun, mihai chun LALPA chu nasatakin an ṭi ta a; LALPA kuoma chun inthawina an inhlân a, thu dâm an tiem ta a.

¹⁷Chun, LALPA chun Jona lem dingin nga lientak a lo ruot ta a; chu nga sûnga chun Jona chu ni thum le zân thum a um a.