Read Hmar JONA 3 Bible Online

JONA 3 - Hmar bible

JONA 3

¹Chun, LALPA thu chu Jona kuoma chun a hung tlung nawn nâwk a:

²“Tho la, Ninevi khuo, khaw ropuitaka chun fe la, thu hril ding ka tuk che hi va tlânginsampui rawh,” tiin.

³Chuongchun, Jona chu a tho a, LALPA thu ang chun Ninevi khuoa chun a fe ta a. Ninevi khuo chu khawpui ropuitak el, ni thum lam tling a nih.

⁴Jona chu ni khat lam chen khawpuia chun a hang lût ṭan phawt a, “Tuta inthawka ni sâwmliah Ninevi hi sukbohmang a ni ding a nih,” tiin a khêk ta a.

⁵Ninevi mihai chun Pathien an ring ta a; bunghei ding tiin an puong a, anni laia a lien taka inthawka a chîn tak chenin saiip puon an sil ta a.

⁶Chuong thu chu Ninevi khaw laltak nahrietah a hung tlung ta a, a lalṭhungphaa inthawk chun a tho a, a lal puon chu a hlîp thlâk a, saiip puon a sil a, vut lai a ṭhung ta a.

⁷Laltak le a mi lienhai thupêkin laltak chun Ninevi khaw sûnga chun thu a puongin ân suo ta a, “Mihriem amanih, ran amanih, bâwng ruol amanih, berâm ruol amani khawm chun iengkhawm intem naw raw se; fain tui khawm dâwn naw raw se;

⁸mihriem le ranhai chun saiip puon sil lem hai sienla, nasatakin Pathien ko raw hai se, anih, mi tinin mâni lampui ṭha naw le, an kuta inpâwngnêkna chu nghatsan raw hai se.

⁹Ei bohmang nawna dingin, Pathien chu ngha kîrin, a lungril inlêtin, a lunginsenna nasataka inthawk chun inlêt naw ni ti tuin am a hriet a?” tiin.

¹⁰Chuongchun, Pathienin an thilthawhai chu enin, an lampui ṭha naw chu an nghatsan ti a hmu a, an kuoma a hril tah an chunga sietna intlun a tum chu, Pathien chun ân lêt a; a thaw ta naw a.