Read Hmar NAMBAR 10 Bible Online

NAMBAR 10 - Hmar bible

NAMBAR 10

¹ LALPA chun Mosie a biek a,

²“Tangkaruo tawtawrâwt pahni siem la, a suta sutin siem rawh; mipuihai ko khâwmna ding le insuoktirna dingin i hmang ding a nih.

³Chu chu an mût pha chun mipui po po chu i kuomah intuokna puon in kawtkhâr bulah an hung inkhâwm vawng ding a nih.

⁴Chun, pakhat chau an mût chun Israel ṭhuoituh, an pahnama lûhai pei chau i kuomah hung khâwm an tih.

⁵Râlkhêl mûta in mût chun saktieng panga umhai chu an suok ding a nih.

⁶Chun, râlkhêl mûta a vawihninaa in mût chun simtieng panga umhai chu an suok ding a nih; an suokna dingin râlkhêl mûtin an mût ding a nih.

⁷Amiruokchu, mipuihai hung khâwmna ding ruok chun mût phawt in ta, râlkhêl mût ruok chun mût lovin.

⁸Aron naupasal thiempuhai chun tawtawrâwt chu an mût ding a nih. Chu chu in ta dingin in thlahai chenah in kumkhaw dân ding a nih.

⁹In rama hmêlma hnuoisietu cheu do dinga in fe ding phâ râlkhêl mûtin tawtawrâwthai chu in mût ding a nih; chuongchun, LALPA in Pathien hmaa chun hriet zing nîng in tih, chun, in hmêlmahaia inthawk chun sanhim ni bawk in tih.

¹⁰In hlimna nia dâm, in Fekân ruoiṭhe hunbi neia dâm, in thla thara dâm le, in pumrawhmang thilinhlâna le in inremna thilinhlân inthâwinahaia chun tawtawrâwt chu in mût ding a nih; chuongchun, in Pathien hmaa in ta dinga hrietzingna a ni ding a nih; kei hi LALPA in Pathien ka ni hi,” tiin.

¹¹Chun, kum hnina, thla hnina, chu thla ni sâwmhni ni chun sûm chu inhriettirna biekbûk chunga inthawk chun a lo invawr sâng ta a.

¹²Chuongchun, Israel mihai chu an fe dân bi ang chun Sinai thlalêra inthawk chun an suoka, Chun, Paran thlalêra chun sûm chu a ngîr ta a.

¹³Mosie hmanga LALPA thupêk angin an suok ṭan ta a.

¹⁴Juda pâwlhai an pâwl tam dân izir peiin an suok a; an hotu chu Amminadab naupa Nason a nih.

¹⁵Issakar rawi hotu chu Zuar naupa Nethanel a nih.

¹⁶Zebulun rawi hotu chu Helon naupa Eliab a nih.

¹⁷Chun, biekbûk chu an ṭhiek a, Gerson naupasalhai le Merari naupasal, biekbûk zâwntuhai chu an suok a.

¹⁸Reuben rawi chu an pâwl tam dân ang peiin an suok a; an hotu chu Sedeur naupa Elizur a nih.

¹⁹Simeon rawi hotu chu Zurisaddai naupa Selumiel a nih.

²⁰Gad rawi hotu chu Deuel naupa Eliasaph a nih.

²¹Chun, Kohath rawi chun thil inthieng chu an zâwn a, an suok a; chun, an va tlung chun biekbûk chu indin zo hieu a lo ni ta a.

²²Ephraimhai chu an pâwl tam dân ang peiin an suok a; an hotu chu Ammihud naupa Elisama a nih;

²³Manassehai hotu chu Pedahzur naupa Gamaliel a nih;

²⁴Benjaminhai hotu chu Gideoni naupa Abidan a nih.

²⁵Chun, a nuhnungtaka chun Dan hai chu an pâwl tam dân ang peiin an suok a, an hotu chu Ammisaddai naupa Ahiezer a nih.

²⁶Aserhai hotu chu Okran naupa Pagiel a nih.

²⁷Naphtalihai hotu chu Enan naupa Ahira a nih.

²⁸Chuong ang chu a nih Israel mipuihai an pâwl tam dân ang peia an fe dân chu; chuong ang tak chun an suok ta a.

²⁹Chun, Mosie tarpupa Midian mi Reuel naupa Hobab kuomah Mosie chun, “Pêng ka ti cheu, LALPAIN a tina hmuna chun ei fe ding a nih; keini lai hung ve la ṭhatakin i chungah thâwng kan ta, LALPA chun Israelhai chungchâng thu chu ṭhatakin a hril ta si a,” a ta.

³⁰Ama chun a kuomah, “Hung da el ka tih, keini ramah ka laibunghai kuomah fe lem ka tih,” a ta.

³¹Mosie chun, “Mi fesan lul naw raw khai, thlalêra umhmun kan khuorna ding chu i hriet lem si a, kan ta dingin mit i hung ni ding a nih.

³²Keini leh i fe ve chun, LALPAIN thil ṭha a mi thawpêk ang peiin thawpêk vêng kan ti che,” a ta.

³³Chuongchun, LALPA tlânga inthawka ni thum lamah an fe a; LALPA Thuthlungna bâwm chu an ta dinga innghatna hmun remchâng zawngin chu ni thum lama chun a fe hmasa pei a.

³⁴An bûka inthawka an suok chun LALPA sûm an hmaa chu sûna chun an chungah a um pei a.

³⁵Chun, bâwm chu a suok ding po leh Mosiein, “Aw LALPA, hung inthawk la, i hmêlmahai chu sukdar la, a theidatu che chu i hmaah tlânse raw se,” a ti hlak a.

³⁶Chun, ân nghat po leh, “Aw LALPA, Israel mipuihai lai hin hung kîr nâwk rawh,” a ti hlak a.