Read Hmar NAMBAR 11 Bible Online

NAMBAR 11 - Hmar bible

NAMBAR 11

¹Mipuihai chun LALPA na hrieta chun mi chier hmang angin thil ṭha naw takhai an hril hlak a; chu chu LALPA chun a lo hriet chun a lung a chawk ta a; chuongchun, LALPA mei chu anni lai chun a hung chawk a, an riebûk hmawr tieng chu a kâng ta dur dur el a.

²Chuongchun, mipuihai chun Mosie an ko a; Mosie chu LALPA kuomah a ṭawngṭai a, mei chu a rêm ta a.

³Chu hmun hminga chun Tabera an ta, LALPA mei chu anni lai chun a hung chawk leiin.

⁴Anni laia hnam danghai le innei pawlhai chun châkna nasatak an hung nei ta a; Israel mipuihai khawm an ṭap nâwk a, “Tuin am sa fâk ding mi pêng a ta?

⁵Nuom nuoma Aigupta rama nga dâm ei fâk hlak kha ei hriet zing a, fanghmahai, vaifanghmahai, purûn sel fâk mihai, purûn bâlhai le purûn vâr hai dâm,

⁶amiruokchu, tuhin ei thlin a ṭâwl zo an ta hi, iengkhawm beisei ding hrim hrim a um nawh: manna chau naw hi chu,” an ta.

⁷(manna chu koriendar mu ang, ân lang dâna chun lunghlu ang hi a nih.

⁸Mihai chun an rût khâwm a, rawtnawinaah an rawtnawi a, suma dâm an suk a, bêlah an suong a, bei dâmin an siem a, hang fâk chun hrieka zêu bei ang a nih.

⁹Riebûka chun zâna dâidâw a tlâkin manna chu a tla sa ve a).

¹⁰Chun, mipuihai chu a sûng sûngin an puon in kawtkhâr senga chun an ṭap ti Mosie chun a lo hriet a; chun, LALPA lung chu nasatakin a hung chawk ta a.

¹¹Chun, Mosie khawm chu a lungni ta naw a, chuongchun, LALPA kuomah, “Ieng leiin am i siehlaw hi i mi sukrinum a? Ieng leiin am i mit ka tlung naw a, hieng mipui po po phurrik hi ka chunga innghat am i ni a?

¹²Hieng mipuihai po po hi ka nauhai bêk am an nih? An pi le an puhai ṭawng inkhâma pêk i tiem rama ṭhuoi lût dingin, ‘Nau pawmtuin nênê ne lai a pawm angin i ângsûngah pawm rawh,’ i mi ti ding ela ka ṭhuoi suok tâwl am an nih?

¹³Hieng mipui po po pêk ding hi khâwlaia sa am nei ka ta? ‘Kan fâk dingin sâ mi pe rawh,’ tia ṭapin an mi thaw si a.

¹⁴Hieng mipui po po hi mâni ngawt chun ka phur zo nawh, ka ta dingin a rik taluo a nih.

¹⁵Hieng anga i mi thaw ding chun mi lunginsiet la, mi sukhlum dai law law el la, mi sukrimsi ta naw khai,” a ta.

¹⁶ LALPA chun Mosie kuomah, “Israelhai upa, mipuihai upa le an hotu nia i hriet mi sâwmsari hai ka kuomah hung ṭhuoi khâwm la, intuokna puon ina nang le ngîr hmunkhat dingin hung ṭhuoi rawh.

¹⁷Chuongchun, hung ṭum ka ta, chutaka chun hung bieng ka ti che; chun, nangmaa thlarau chu an chunga chun sieng ka ta; nanga khâta phur lovin, mipuihai rikphur chu phurpui an ti che.

¹⁸Chun, nangin mipui kuomah, ‘Zînga ding hin insukthieng vawng unla, chuongchun, sa chu fa ngei in tih. Sa fâk ding tuin am mi pêng a ta? Aigupta rama inhawi ei ti vei leh, tiin LALPA na hrietah in ṭap a, chuleiin, LALPAIN sa pêng a ti cheu a, fa ngei in tih.

¹⁹Ni khat amanih, ni hni amanih, ni nga amanih, ni sâwm amanih, ni sâwmhni amanih el khawm ni lovin,

²⁰thla khat pumhlûm, nghawk khawp rak le in hnâr kuoa suok rak khawpin fâng in tih; nangni laia um LALPA chu dit lova, Ieng dinga Aigupta rama kha suok am ei ni aw, tia a hmaa in ṭap leiin,’ ti rawh,” a ta.

²¹Mosie chun, “Ka umpui kea fe thei ṭhieu khawm mipui nuoi ruk an nih, ‘thla khat pumhlûm fâk ding sâ pêng ka tih,’ ti el chu.

²²Berâm ruol le ran ruol khawm thatpêk ta ang inla, an khawp ding am a nih? Mediterranean tuipuia nga po po khawm manpêk inla, an khawp ding am a nih?” a ta.

²³LALPA chun Mosie kuomah, “LALPA kut chu a tawi ta am a nih? I chungah ka thu angin a tlung le tlung naw chu hre nghâl i tih,” a ta.

²⁴Chuongchun, Mosie chu a suok a, LALPA thu chu mipuihai chu a hril a; mipuihai upahai sâwmsari chu a ko khâwm a, puon in vêla chun ân ngîrtir a.

²⁵Chuongchun, LALPA chu sûma chun a hung ṭum a, a hung biek a, amaa thlarau chu upa sâwmsari hai chunga chun a sie a. Thlarâu chu an chunga a hung um phingleh thu an hril ta duol a; nisienlakhawm, chuong ang chun an thaw an thaw nâwk ta nawh.

²⁶Amiruokchu, bûka chun mi pahni an um a, pakhat hming chu Eldad a na, mi dang hming chu Medad a nih; thlarau chu an chungah a um a, tiemhai laia ṭhang chu an na, puon ina ruok chun an va fe ve naw a; bûka chun thu an hril a.

²⁷Chuongchun, tlangvâl pakhat a va tlân a, Mosie a va hril a, “Eldad le Medad chun bûkah thu an hril an hril el,” a va ta.

²⁸Chun, Nun naupa Josua, a tleirâwl tira inthawka Mosie rawngbâwltu chun a dawn a, “Pu Mosie, khap el rawh,” a ta.

²⁹Mosie chun a kuomah, “Keia leia ngaimaw am i nih? LALPA mihai po po chu zâwlnei ni vawng hai sienla. LALPAIN an chungah a thlarau chu sie seng sienla ti nâklaiah,” a ta.

³⁰Chuongchun, Mosie chu bûka chun a lût nâwk a, ama le Israel mi upahai le chun.

³¹Chun, LALPA kuoma inthawk chun thli a hung hrâng a, Mediterranean tuipuia inthawk chun vamîm a hung lên a, bûk khingtieng ni khat lam, khingtienga ni khat lam bawk dâpin bûk vêla chun tawng hni laia insângin ân tlâktir a.

³²Mipuihai chun chu ni sûnnithlâk le zânkhawvar le, a zingah sûnnithlak chun vamîm chu an va rût khâwm a; a rût tlâwm tak khawma homer sâwm a rût a, bûk vêla chun mâni ta dingin an em seng a.

³³Chun, chu sa chu an fâk lai, an la fâk zo hmain, mipuihai chungah LALPA lung chu a hung chawk ta a, mipuihai chu hripui nasatakin LALPAIN a hrem ta a.

³⁴Chu hmun hminga chun Kibroth-hattaava[3] an ta; chutaka chun châkna neituhai chu an phûm leiin.

³⁵Chun, Kibroth-hattaavaa in- thawk chun mipuihai chu Hezerothah an fe a, Hezerotha chun an um ta a.