Read Hmar NAMBAR 12 Bible Online

NAMBAR 12 - Hmar bible

NAMBAR 12

¹Miriam le Aron chun Mosiein Kus mi nuhmeia a nei leiin an hrilsiet a; Kus mi chu a nei ngei si a.

²Anni chun, “Mosie kuoma chau hin am a nih LALPAIN thu a hril bîk? Keini kâwla khawm hin a hril naw am a nih?” an ti a. Chu chu LALPAIN a lo hriet a.

³Mosie chu hnuoi chunga mihriem po poa zainêm tak a na.

⁴Chun, Mosie le Aron le Miriam kuomah LALPAIN, “In pathumin hung suok unla, intuokna puon inah hung ro,” a ti ta thut el a. Chuongchun, an pathum chun an va fe a.

⁵Puon in kawtkhârah a lo ngîr a, Aron le Miriam chu a ko a, an pahni chun an hung suok a.

⁶Ama chun, “Ka thu hi ngai ro, nangni lai hin zâwlnei in um chun ama chu kei LALPA hi inlârnain inhriettir ka ta, mang tieng bieng ka tih.

⁷Ka siehlaw Mosie hi chu chuong ang chu a ni nawh; ka sûngkuo thu po poa chun ring a um a nih;

⁸ama le chun chu thurûk um lovin bauin tlangtakin inbieng kan ta; LALPA hmêl khawm hmûng a tih. Chuleiin, ka siehlaw Mosie hi iengtiziea hrilse ngam am in ni leh?” a lo ti a.

⁹Chuongchun, LALPA lung chu an chungah a chawk a, a fe nâwk ta a.

¹⁰Puon in chunga sûm chu ân kieng ta a; chun, ngai ta, Miriam chu vûr ang ela vârin a hung inphâr ta a; Aron chun Miriam chu a hei en a, inphâr a lo ni ta zing el ti a hmu a.

¹¹Chuongchun, Aron chun Mosie kuomah, “Aw pu, kan chungah suol innghat lul naw raw khai, invêttakin kan lo thaw a, kan lo suol tah a nih.

¹²Mi a nu sula inthawka a hung suok tîra thi sa deuthaw angin Miriam chu um lul naw raw se,” a ta.

¹³Chuongchun, Mosie chun, “Aw Pathien, sukdam nâwk ta khai,” tiin LALPA chu a ko a.

¹⁴Chun, LALPAIN Mosie kuomah, “A pain a hmaia chil a sâk ngawt khawma ni sari chu ân zak naw ding am a nih? Riebûk puoah ni sari khum hmang ni sienla, chu zoa chun ṭhuoi lût nâwk ni raw se,” a ti a.

¹⁵Chuongchun, Miriam chu riebûk puoah ni sari an khum hmang a. Miriam chu an ṭhuoi lût hma khat chun mipuihai chu an intâwl sawn naw a.

¹⁶Chu zoa chun mipuihai chu Hazerotha inthawk chu an suok a, Paran thlalêrah umhmun an khuor a.