Read Hmar NAMBAR 15 Bible Online

NAMBAR 15 - Hmar bible

NAMBAR 15

¹LALPA chun Mosie a biek a,

²“Israel mihai hril la, an kuomah, ‘In umna dinga ram ka pêk cheu in tlung phaleh,

³LALPA kuomah meia thilinhlân, pumrawhmang thilinhlân amanih, thutiem hlen dinga inthâwina amanih, mâni nuom thua thilinhlân amanih, in Fekân ruoiṭhe hunbia manih, ran ruol laia mi amanih, berâm ruol laia mi amania LALPA ta dinga riminhnik siem ding amania an inhlân pha chun,

⁴LALPA kuoma thilinhlân inhlântu taphawtin beiphit thilinhlân, beiphit indi mi epha hmun sâwma ṭhea hmun khat, hriek hin hmun lia ṭhea hmun khata hmet an inhlân ding a nih.

⁵Dâwnmi thilinhlânah uoin hin hmun lia ṭhea hmun khat pumrawhmang thilinhlân amanih, inthâwina amaniha berâmte hming kimin in buotsai ding a nih.

⁶Chun, berâmchala chun beiphit thilinhlân, beiphit indi mi epha hmun sâwma ṭhea hmun hni, hriek hin hmun thuma ṭhea hmun khata hmet in buotsai ding a nih.

⁷Dâwnmi thilinhlân chun LALPA ta dinga riminhnikah uoin hin hmun thuma ṭhea hmun khat in inhlân ding a nih.

⁸Pumrawhmang thilinhlân ama- nih, thutiem hlen dinga inthâwina amanih, LALPA kuoma inremna thilinhlân ding amanih bâwngchal in buotsai pha chun,

⁹bâwngchal inhlân ruol chun beiphit thilinhlân, beiphit indi mi epha hmun sâwma ṭhea hmun thum, hriek hin chenvea hmet in inhlân ding a nih.

¹⁰Chun, dâwnmi thilinhlânah uoin hin chenve, LALPA ta dinga riminhnik meia thilinhlân chu in inhlân ding a nih.

¹¹“Chuong ang chun bâwngchal dâm, berâmte a chal dâm, kêlte dâm, an hming kima thaw ding a nih.

¹²An tam dân izir peiin buotsai in ta, an tam dân ang pei chun in inhlân ding a nih.

¹³Chu rama pieng po po chun hieng ang pei hin LALPA ta ding riminhnik meia thilinhlân an inhlân pha an thaw ding a nih.

¹⁴Chun, hnam dang mi in kuoma khawsa hlak amanih, tukhawm in kuoma khawsa zing dinghai chun LALPA ta ding riminhnik meia thilinhlân inhlân nuomtuhai chun in thaw ang tak chun an thaw ve ding a nih.

¹⁵In thlahai chena mipuihai le hnam dang in kuoma umhai ta ding khawma dân angkhat chau a um ding a nih; LALPA hmaah hnam danghai chu nangni ang chie nîng an tih.

¹⁶In ta ding le in kuoma hnam dang umhai ta dingin dân hmunkhat le thaw dân hmunkhat chau um a tih,’ ti rawh,” tiin.

¹⁷ LALPA chun Mosie a biek a,

¹⁸“Israel mihai hril la, an kuomah, ‘Hieng hi nîng a ta, ka ṭhuoina ding cheu ram in va tlung a,

¹⁹chu rama bei in fâk pha chun LALPA kuoma thên thilinhlân in inhlân ding a nih.

²⁰In bei hmet hmasa tak laia hlawm khat chu thên thilinhlânah in inhlân ding a nih, hrizâwla mi thên thilinhlâna in thên angin in thên ding a nih.

²¹In thlahai chenin in bei hmet hmasa tak chu LALPA kuoma thên thilinhlâna dingin in inhlân pei ding a nih.

²²“Chun, hieng thupêk po po, LALPAIN Mosie kuoma a hril,

²³LALPAIN thu a pêk tira inthawka in thlahai chena dinga Mosie hmanga thu a pêk po pohai cheu hi in pawm naw a, in bawsiet chun hieng ang hi hung nîng a ta;

²⁴pungkhâwmhaiin hre lova thawpal a ni chun, pungkhâwmhai po po chun pumrawhmang thilinhlân LALPA ta dinga riminhnikah bâwng tuoi pakhat inhlân an ta, a dân pângngai angin beiphit thilinhlân le dâwnmi thilinhlân leh, suol thâwina dingin kêlchal pakhat an inhlân sa bawk ding a nih.

²⁵Chun, thiempu chun Israel mipui pungkhâwm po po ta ding chun inremna siem a ta, ngaidam nîng an tih, thawpal a ni lei le, an thilinhlân LALPA ta dinga meia thilinhlân le an suol aia suol thâwina an inhlân ta leiin.

²⁶Israel mipui pungkhâwmhai po po chu ngaidam nîng an ta, anni laia hnam dang umhai khawm; mipui po po chun an thawpal a ni leiin.

²⁷Mi malin hre lovin thil a suksuol chun, suol thâwina dingin kêl late pakhat kum khat mi ân hlân ding a nih.

²⁸Hre lova LALPA hmaa suksuoltu ta ding chun thiempu chun inremna a siem ding a nih; chuongchun, ngaidam nîng a tih.

²⁹Hre lova suksuoltu ta dingin Israel mi chu rama pienghai ta dingin le hnam dang mi anni laia umhai ta ding khawma dân angkhat in nei ding a nih.

³⁰Amiruokchu, ân dittâwk leia thaw a ni ruok chun, chu rama pieng amanih, hnam dang amanih khawm ni sienla, LALPA hrilsie a nih; ama chu a chipuihai laia inthawk tuithlâr ding a nih.

³¹LALPA thu chu a hmusit a, a thupêk chu a bawsiet leiin ama chu sât thlâk ṭhuoi ding a nih, a rîtlona maw chu ama ngeiin phur a tih,’ ti rawh,” tiin.

³²Israel mihai thlalêra an um lai chun mi pakhat châwlnia thing inkhâwm hi an hmu a.

³³A thing inkhâwm hmutuhai chun Mosie le Aron le pungkhâwmhai kuoma chun an ṭhuoi a.

³⁴Ieng anga thaw ding am a ni ti la puonglo a ni leiin intângna inah an khum a.

³⁵LALPAIN Mosie kuomah, “Ama chu sukhlum ngei ngei ding a nih, riebûk puoah pungkhâwmhai po po chun lungin an dêng ding a nih,” a ta.

³⁶Chuongchun, LALPAIN Mosie thu a pêk ang chun pungkhâwmhai po po chun riebûkah an ṭhuoi a, lungin an dêng hlum ta a.

³⁷LALPA chun Mosie a biek a,

³⁸“Israel mihai kuomah, an thlahai chena an puon hmawra a hmawrkai siem ding le, a hmawr tin reia chun a dumpâwl sie dingin hril rawh;

³⁹chu rei chu in en hlak a, LALPA thupêk po po in hriet zinga in zâwmna ding le nawchizawra in um hlak anga in lungril dit zâwng le in mit la zâwng hnawta in um nawna dingin le,

⁴⁰ka thupêkhai po po chu in hriet zing a, in zâwm a, in Pathien ta dinga in inthieng theina dingin a nih.

⁴¹In Pathien ni dinga Aigupta rama inthawka ṭhuoisuoktu cheu LALPA in Pathien ka nih. Kei hi LALPA in Pathien chu ka nih,” tiin.