Read Hmar NAMBAR 16 Bible Online

NAMBAR 16 - Hmar bible

NAMBAR 16

¹Levi naupa Kohath, chu naupa Izhar, chu naupa Kora chun Eliab naupasalhai Dathan le Abiram le Peleth naupa On, Reuben thlahai leh mihai an ṭhuoi a.

²Israel mi, mi inlâr deu deu mipui laia hotu, rorêltu thlanghai laia mi za hni le sâwmngahai leh Mosie hmaah an va fe a.

³Mosie le Aron chu sawisêlin an pungkhâwm a, an kuomah, “In insukngêng êm el, mipuihai chu an inthieng seng si a; LALPA khawm anni lai a um si a; iengdinga LALPA mipui pungkhâwmhai chunga hin in insie chunghnung bîk am a na?” an ta.

⁴Chu chu Mosiein a hang hriet chun a bawkkhup a.

⁵Kora le a pâwlhai po po kuoma chun, “Zingah zîngkâr LALPAIN a tahai le ân thienghai chu suklangin ama va hnai dingin hung tîng a ta, a thlanghai ngei chu ama va hnai dingin tîng a tih.

⁶Hieng ang hin thaw ro, Kora le a pâwl po po hai;

⁷zingah meilâkna dâm chawi unla, chutaka chun mei sie unla, LALPA hmaah riminhnik phul ro; chun, LALPAIN a thlang taphawt chu inthieng el a tih. Levi nauhai, in insukngêng êm el,” tiin a hril a.

⁸Chun, Mosiein Kora kuomah, “Nangni Levi nauhai, ngai ta u,

⁹ LALPA biekbûka rawngbâwla, mipuihai hmaa an rawngbâwla ngîr dinga Israelhai Pathienin ama hnai dinga Israel mipuihai laia inthawka a suktum cheu a,

¹⁰Levi naupasal in unauhai po po le ama hnai dinga ân umtir cheu hi thil chînah in ngai a ni maw? Thiempu nina khawm in la zawng sa rawp a ni maw?

¹¹Chuleiin, nang le i pâwlhai po po chu LALPA chu kalin in pungkhâwm a nih. Aron khawm hin ieng am a thawa a chunga hi chier in ni leh?” a ta.

¹²Chun, Mosie chun Eliab nâupa Dathan le Abiram ân kotir a, anni chun, “Hung naw ning ungah!

¹³Thlalêra mi sukhlum dingin nênetui le khuoizu luongna rama inthawkin i mi ṭhuoi suok hi thil chîn am a ni hrim luo a? Kan chungah lalin în sie nâwk nghâl a.

¹⁴Nênetui luongna ramah i mi ṭhuoi lût naw a, lo le grêp huon ro ding i mi pêk bawk nawh; mi hlêm i tum a, hung naw ning ungah,” an ta.

¹⁵Chuongchun, Mosie chu a lung a sen hle el ta a; LALPA kuomah, “An thilinhlân chu pawm naw rawh, an sabengtung chu pakhat khawm ka lâk naw a, tukhawm ka sukna bawk nawh,” a ta.

¹⁶Chun, Mosie chun Kora kuoma chun, “Zîngah nang le i mi pungkhâwmhai nang leh, anni leh, Aron leh LALPA hmaah hung um ro, an mei lâkna chawi seng hai sienla,

¹⁷riminhnik phul hai sienla, LALPA hmaa mei lâkna seng, meilâkna za hni le sâwmnga chu hung chawi raw hai se; nang le Aron khawmin in mei lâkna chawi ve ve ro,” a ta.

¹⁸Chuongchun, mi tin chun an mei lâkna chu an chawi a, mei an sie a, riminhnik an phul a; Mosie le Aron leh intuokna puon in kawtkhâra chun an va ngîr a.

¹⁹Chun, Kora chun mipui po po chu anni kalin intuokna puon in kawtkhâra chun ân umkhâwmtir a; chun, mipuihai po po chunga chun LALPA ropuina a hung inlang a.

²⁰Chuongchun, LALPAIN Mosie le Aron a biek a,

²¹“Hieng mipuihai laia inthawk hin insiekieng ro; ka hung sukbohmang thut theina dingin,” tiin.

²²Chuongchun, anni chu an bawkkhup a, “Aw Pathien, tisa po pohai thlarau Pathien, mi pakhat suol leiin mipui po po chungah i lunginsen ding am a nih?” an ti a.

²³Chun, LALPAIN Mosie a biek a,

²⁴“Mipuihai kuoma chun, ‘Kora hai, Dathan hai, Abiram hai bûka inthawk hin inkiengsan vawng ro,’ tiin hril rawh,” a ta.

²⁵Chuongchun, Mosie chu a tho a, Dathan le Abiram kuoma chun a va fe a; Israel upahai chun an zui a.

²⁶Chun, pungkhâwmhai kuoma chun, “Hieng mi suolhai puon ina inthawk dâm hin suok ro khai; an iengkhawm hi tâwk naw ro, chuong naw chun chu an suolna po poa hin ṭhang ve rawi in tih,” tiin a hril a.

²⁷Chuongchun, Kora hai, Dathan hai, Abiram hai bûka inthawkhai chun an suok ta dur dur el a; chun, Dathan le Abiram chu an puon ina inthawk chun an hung suok a, an puonin kawtkhâra chun an nuhmeihai, an naupasalhai, an naunuhmeihai le chun an ngîr a.

²⁸Chun, Mosiein, “Keia lungril puoksuoka thaw a ni naw a, hieng thil thaw ding hin LALPAIN a mi tir a nih ti hienga hin hrieng in tih.

²⁹Hieng mihai po po hi mi dang thi dân ang bawkin an thi a, mi po po hrem ang bawka hrem an ni chun Pathienin a mi tir naw nîng a ta.

³⁰LALPAIN thil thar a siem a, hnuoiin a bâu a ka a, anni le an ta po po a lem a, Seolah a hringa an lût ruok chun hieng mihai hin LALPA an lo ngainêp a nih ti hrieng in tih,” a ta.

³¹Chuong thu po po chu a hril zo chun, an hnuoi leihnuoi chu a hung kak ta phut el a,

³²chuongchun, leihnuoi chun a bâu chu a ka a, an sûngkuoin, Kora mihai po po, an thuomhnaw po po leh a lem zo vawng tâwl ta a.

³³Chuongchun, anni le an ta po po chu a hringin Seola chun an tlum ta vawng a, leihnuoi chun a bâu ân chîp nel a, pungkhâwm laia inthawk chu an bohmang ta a.

³⁴Chuongchun, an vêla Israel mi po pohai chu an khêk ria chun an tlân dar a, “Hnuoiin mi lem ve hlau rawi a tih,” an ti a.

³⁵Chun, LALPA kuoma inthawkin mei a hung suok a, riminhnik inhlântu mi za hni le sâwmnga hai chu a hung kâng hlum ta a.

³⁶Chun, LALPAIN Mosie a biek a,

³⁷“Thiempu Aron naupa Eleazar chu meia inthawka mei lâknahai chu la suok dingin hril la, sukdar neng raw se, thil inthieng a ni si a,

³⁸mei lâknahai chu hieng thilsuol thawtuhaiin thi pha hiela an inhlân a ni si a. Chuleiin, maichâm inkhumna phêk dinga sut ni raw se. LALPA hmaa inhlân an na, chuleiin, an inthieng a nih; chu chu Israel mihai ta dinga inchikna nîng a tih,” tiin.

³⁹Chuongchun, thiempu Eleazar chun a kânghai dârsen mei lâknahai chu a lâk a, maichâm inkhumnahai sut a ni ta a;

⁴⁰Mosie hmanga a kuoma LALPAIN a lo hril ta ang chun, Aron thla ni lo hnam dang hrim hrim LALPA hmaa riminhnik raw dinga an fe hnai nawna ding le, Kora le a pâwlhai anga an hung um nawna dingin.

⁴¹Nisienlakhawm, a zînga chun, “LALPA mihai in sukhlum a nih,” tiin Israel mi pungkhâwm po po chu Mosie le Aron chunga chun an chier a.

⁴²Chun, Mosie le Aron chunga mipui an pungkhâwm lai chun intuokna puon in tieng an ngha a; sûmin a hung inkhum le LALPA ropuina hung inlang chu an hmu a.

⁴³Chun, Mosie le Aron chu intuokna puon in tuola chun an va fe a.

⁴⁴Chun, LALPAIN Mosie a biek a,

⁴⁵“Hieng mipuihaia inthawk hin insiekieng ro, ka hung sukbohmang thut theina dingin,” tiin. Chun, anni chu an bawkkhup a.

⁴⁶Mosie chun Aron kuomah, “I mei lâkna chawi la, maichâma inthawkin mei sie la, riminhnik phul la, mipuihai lai chun fepui vat la, an ta dingin inremna siem rawh. LALPA kuoma inthawkin lunginsenna a hung suok a nih, hri ân lêng ṭan mêk a nih,” a ta.

⁴⁷Aron chun Mosie hril ang chun a chawi a, pungkhâwmhai laia chun a tlân lût ta a, hri chu mipui lai ân lêng ṭan tah ti a hmu a, riminhnik chu a phul a, mipui ta ding chun inremna chu a siem a.

⁴⁸Mithi le mi hring inkâra chun a ngîr a, hri chu ân kieng ta a.

⁴⁹Chuongchun, Kora chungchâng thua thihai tiem lovin hria thi po po chu sîng khat sâng li le za sari an nih.

⁵⁰Chun, Aron chu intuokna puon in kawtkhâra Mosie kuoma chun a kîr nâwk a, chuongchun, hri chu ân kieng ta a.