Read Hmar NAMBAR 17 Bible Online

NAMBAR 17 - Hmar bible

NAMBAR 17

¹LALPA chun Mosie a biek a,

²“Israel mihai hril la, an sûngkuo tin puolah hmawl pakhat pei, an sûngkuo izir peia an ṭhuoituhai po po zât hmawl sâwm le pahni la la, chun, an hmawla chun an hming seng ziek rawh.

³Levi hmawla chun Aron hming ziek la, an sûngkuo tina dingin hmawl pakhat pei a ni ding a nih.

⁴Chun, ei inbiekna, intuokna puon in, thu inhriettirna hmaa chun i sie ding a nih.

⁵Chun, ka mi thlang ding hmawl chu hung inder a ta, chuongchun, Israel mihai chierna, i chunga an chierna hi ka sukre ding a nih,” tiin.

⁶Chuongchun, Mosie chun Israel mihai chu a biek a, an ṭhuoituhai po po chun an sûngkuo tin puolah ṭhuoitu tinin hmawl pakhat pei, hmawl sâwm pahni an pêk a; Aron hmawl khawm chu an hmawlhai lai chun a ṭhang ve a.

⁷Mosie chun thu inhriettirna puon ina chun LALPA hmaah hmawlhai chu a sie a.

⁸A zînga chun Mosie chu thu inhriettirna puon ina chun a va fe a; ngai ta, Levi sûngkuo puola Aron hmawl lo inder chu a hmu a,a kumûm a, a pâr a, almondin a ra a.

⁹Mosie chun LALPA hmaa inthawka hmawl po po chu Israelhai kuoma chun a lâk suok a, an lo en a, anni hmawl seng chu an lâk a.

¹⁰Chun, LALPAIN Mosie kuomah, “Helhmang nauhai an nih ti inhriettirna dingin Aron hmawl chu thu inhriettirna bula chun sie nâwk rawh; chuongchun, ka chunga an helna hi sukrepêk thei i tih, an thi nawna dingin,” a ta.

¹¹Chuong ang chun Mosie chun a thaw a, LALPAIN thu a pêk ang chun a thaw a.

¹²Chun, Israel mihai chun Mosie kuomah, “Ngai ta, kan bohmang a ni annâwm, kan se zo tah, kan se zo vawng tah annâwm.

¹³LALPA biekbûk hung hnai taphawt chu an thi pei a; kan bohmang vawng el ding nîng a ti maw?” an ti a.