Read Hmar NAMBAR 20 Bible Online

NAMBAR 20 - Hmar bible

NAMBAR 20

¹Chun, Israel mipui pungkhâwmhai po po chu thla khatnaa chun Zin thlalêrah an lût a; chun, mipuihai chun Kadesa chun umhmun an khuor a; chutaka chun Miriam chu a thi a, chutaka chun an phûm ta a.

²Pungkhâwmhai chun tui an nei ta naw a; Mosie le Aron chungchâng thuah an inhâwrkhâwm ngiel a.

³Chun, mipui chun, “LALPA hmaa ei unauhai an thi lai khan Pathienin mi lo sukhlum ve lem ta sien aw!

⁴Iengdinga LALPA mipui hi thi dinga thlalêra hin ṭhuoi lût am i ni a, keini le kan ranhai le hin?

⁵Iengdinga hi ram ṭha nawtaka mi ṭhuoi lût dingin Aigupta rama inthawka mîn suoktir am i na? Thlai chi dâm, theichanghai, grêphruihai, theibufaihai umna ram ni lo hi; tui dâwn ding hrim hrim hlak um lo” tiin Mosie chu an suosal ta a.

⁶Chun, Mosie le Aron chu mipuihai laia inthawk chu intuokna puon in kawtkhâra chun an va fe a; an bawkkhup a;

⁷chun, LALPA ropuina an kuomah a hung inlang a.

⁸Chuongchun, LALPAIN Mosie chu, “Hmawl la la, pungkhâwmhai chu inumkhâwmtir la, nang le i unau Aron leh, an mithmuah lungpui chu a tui suksuok dingin hril la, lungpuia inthawk chun tui la suokpêk i ta; chuongchun, pungkhâwmhai le an ranhai chu în dâwntir ding annâwm,” tiin a biek a.

⁹Mosie chun LALPA hmaa inthawk chun hmawl chu a thupêk ang chun a lâk a.

¹⁰Mosie le Aron chun pungkhâwmhai chu lungpui bula chun an inumkhâwmtir a, an kuomah, “Mi hel hmanghai, ngai ta u, hi lungpuia inthawk hin tui kan lâk suokpêk ding cheu am a nih?” an ta.

¹¹Mosie chun a bân a phar a, lungpui chu a hmawl chun vawi hni a hang vuok a; chuongchun, tui a hung suok ta zur zur el a, pungkhâwmhai le an ranhai chun an dâwn ta a.

¹²Chun, LALPAIN Mosie le Aron kuomah, “In mi ring naw a, Israel mipuihai mithmua in mi chawimawi naw leiin, hieng pungkhâwmhai hi ka pêk rama chun ṭhuoi naw ti niu.

¹³Hi hi Meriba[4] tuihai chu a nih; chutaka chun Israel thlahai chu LALPA chungah an chier rak a, ama chun a thienghlimzie a suklang tâk leiin,” a ta.

¹⁴Mosie chun Kadesa inthawk chun Edom lal kuomah mi a tir a, “I unaupa Israel chun hieng hin a tih, ‘Kan chunga tuorna hung tlung po po hi i hriet a;

¹⁵kan pi le puhai Aigupta ramah an fe thla a, sâwttak el Aigupta rama kan um dâm, Aigupta mihaiin kan pi le puhai le keini ngei khawm ṭha nawtaka an mi thawzie dâm kha.

¹⁶Chuongchun, LALPA kan ko a, kan râwl chu a lo hriet a, vântirko a hung tir a, Aigupta rama inthawkin a mi ṭhuoi suok a; chun, ngai ta, i ram dep tak Kadesa hin kan um a.

¹⁷Lunginsiettakin i ram hi fe thleng kan tih; lo amanih, grêp huon amanih fe naw ning unga a, tuisunsuo tuihai dâwn bawk naw ning ung; lal lamlienah fe pei kan ta, i ram kan khêl hmakhat chun changtieng amanih, vawitieng amanih khawm pêt naw ning ungah,’ tiin,” a ta.

¹⁸Edom ruok chun a kuomah, “In mi pal thleng ding a ni nawh, in mi pal vai chun a thaw ding chein kâwlhnâm leh hung inthawk ka tih,” a ta.

¹⁹Chuongchun, Israel mipuihai chun a kuomah, “Lamlienah hang fêng kan ta, chun, keini le kan ranin i tui kan dâwn chun a man chu pêng kan ti che; thil dang iengkhawm thaw lovin a fein fethleng ringawt kan tih,” an ta.

²⁰Ama chun, “Fethleng lo ding,” a ta. Chun, Edom chu mipui tamtak leh mi hrâttakhai leh anni thaw ding chun a hung suok ta a,

²¹an fe chu a phal ta naw a, chuongchun, Israel mihai chun an kîrsan nâwk ta a.

²²Chuongchun, Kadesa inthawk chun an suok a, Israel mipui pungkhâwmhai po po chun Hor tlâng an va tlung a.

²³Chun, LALPAIN Mosie le Aron chu Edom ram dep Hor tlânga chun a biek a, “Aron chu a chipuihai kuoma ṭhuoi nîng a tih;

²⁴Meriba tuia dâm khan ka thu kalin in hel lei khan Israel mipuihai ka pêk rama chun a lût naw ding a nih.

²⁵Aron le a naupa Eleazar chu Hor tlângah hung ṭhuoi rawh:

²⁶Aron chu a silfênhai hlîppêk la, a naupa Eleazar chu inhâktir rawh: Aron chu a chipuihai kuoma ṭhuoi nîng a ta, chutaka chun thîng a tih,” tiin.

²⁷Mosie chun LALPA thupêk ang chun a thaw a, mipui po pohai mithmuin Hor tlânga chun an hang fe a.

²⁸Chuongchun, Mosie chun Aron chu a silfênhai a hlîppek a, Eleazar ân hâktir a, chun, Aron chu tlâng sîpa chun a thi ta a; chun, Mosie le Eleazar chu tlânga inthawk chun an hung thla a.

²⁹Chun, mipui po poin Aron a thi ti an hriet chun Israel mihai po po chun ni sâwmthum an sûn a.