Read Hmar NAMBAR 21 Bible Online

NAMBAR 21 - Hmar bible

NAMBAR 21

¹Chun, Kanaan mi Arad lal, simtienga um chun Israel mihai Atharim lampuiah an hung ti hril ri a hriet a; chuongchun, Israel mihai chu a thaw a, sal dâmin a man nuol a.

²Chun, Israel mihai chun LALPA kuomah thu an tiem a, “Hieng mihai hi kan kuta i mi pêk chun an khuohai hi sukbohmang dêr kan tih,” an ta.

³Chuongchun, LALPAIN Israel mihai thu chu a pawm a, Kanaan mihai chu a pêk a, anni le an khuohai chu an sukbohmang ta a; a hmun hminga chun Horma[5] an inbûk a.

⁴Chun, Hor tlânga inthawk chun Tuipui Sen tieng Edom ram fe huolin an fe a: a lampui lei chun mipuihai lung chu a hnuol hle a.

⁵Mipuihai thi el dingin iengdinga Aiguptaa inthawka i mi ṭhuoi suok am a na? Bei um lo, tui hlak um bawk lo; hi bei tirdakum khawm hi kan hringna hin a hnâm tah a nih, an ta.

⁶Chuongchun, LALPAIN mipuihai lai chun rûl a mi chuk na chihai a tir a, mihai chu an chuk a, Israel mi tamtak chu an thi a.

⁷Chun, mihai chu Mosie kuomah an fe a, “LALPA le nangma kala kan lo ṭawng ta hi kan lo suol tah a nih; keini laia rûlhai hi sukbo dingin LALPA kuomah ṭawngṭai raw khai,” an ti a; chuongchun, mihai chu Mosie chun a ṭawngṭaipêk a.

⁸Chun, LALPAIN Mosie kuomah, “Rûl mi chuk na chi kha a lim siem la, banah khai rawh; rûl chuk taphawtin chu chu an en chun dam an tih,” a ta.

⁹Chuongchun, Mosiein dâr rûl a siem a, banah a khai a, rûl chuk taphawtin dâr rûl chu an enin an dam pei a.

¹⁰Chun, Israel mipuihai chu an fe pei ta a; Oboth-ah umhmun an khuor a.

¹¹Oboth-a inthawk chun an fe nâwk a; nisa suokna tieng pangah Moab thlalêr bul Ije—abarimah umhmun an khuor a.

¹²Chutaka inthawk chun an fe nâwk a, Zered ruomah umhmun an khuor a.

¹³Chutaka inthawk chun an fe nâwk a. Amor mihai ramria inthawka hung filawr thlalêra Arnon khingtieng pangah umhmun an khuor a; Arnon chu Moab ramri, Moab le Amor mihai inkâra um a nih.

¹⁴Chuleiin, “LALPA Indona Lekhabua” chun hieng ang hin a hril a; “Suphah-a Vaheb khuo, Amon ruomhai,

¹⁵Ar khaw bul chena inzam, Moab ramri depa Ruom pangpêrhai chu,” tia hril a nih.

¹⁶Chutaka inthawk chun Beerah[6] an fe nâwk a, chu chu LALPAIN Mosie kuoma, “Mipuihai ko khâwm la, tui pêng ka tih,” a tina tuisunsuo chu a nih.

¹⁷Chun, hi hla hi Israelhai chun an sak a, “Aw tuikhur, hung inchik suok rawh, Zaiin awi ro, Lalhaiin an cho tuikhur chu.

¹⁸An lal hmawl le an hembâwka, Mipuihai mi lienhai icho chu.” Chun, thlalêra inthawk chun Mattanaah an fe a.

¹⁹Mattanaa inthawk chun Nahalielah an fe a; Nahaliela inthawk chun Bamothah,

²⁰Bamoth-a inthawk chun Moab ram phairuom, pisga tlâng ṭhut an tlung a, chu tlâng sîpa inthawk chun Jeshimon thlalêr[7] chu ân lang vawng a nih.

²¹Chun, Israel mihai chun Amor mihai lal Sihon kuomah mi an tir a,

²²“I rama hin mîn fe thlengtir raw khai; loa manih, grêp huona manih, pêt naw ning ung a, tuisunsuo tuihai khawm dâwn naw ning ung a, i ram kan khêl hmakhat chun lal lamlienah fe pei kan tih,” tiin.

²³Nisienlakhawm, Sihon chun Israel mihai chu a ram fe thleng chu a phal naw a; Sihon chun a mihai po po chu a khâwm vawng a. Israel mihai chu thaw dingin thlalêra chun an vân thawk suok ta lem a, Jahaz an va tlung a; chuongchun, Israel mihai chu an va thaw ta a.

²⁴Chun, Israel mihai chun kâwlhnâm leh an lo thaw a, a ram chu Arnona inthawka Jabbok chenin, Ammon mihai ramri Jazer chenin an neipêk a; Ammon thlahai ram chu a khir hle a nih.

²⁵Israel mihai chun chuong khuo po po chu an lâk a, chuongchun, Israel mihai chu Amor mihai khuohai po poa chun an um a, Hesbon le a khawper po poa dâm chun.

²⁶Hesbon chu Amor mihai lal Sihon khuo a na, ama chu chu hmaa Moab lalhai thaw a, a kuta inthawka ram po po Arnon chena lâkpêktu a nih.

²⁷Chuleiin, hla phuoktuhai chun, “Hesbonah hung unla, Sihon khawpui chu inngîr le sukdet ni sienla,

²⁸Hesbona inthawkin mei a suok a, Sihon khawpuia inthawk chun meichawk, Moaba Ar a kâng zo a.

²⁹Arnon hmun insâng lalhai chu, I chung a rik de, Moab! I bohmang a ni tah, aw Kemos chibai bûktuhai, A naupasalhai chu tlânse ding le, A naunuhmeihai chu sala um dingin a pêk a, Amor mihai lal Sihon kuomah.

³⁰Kan hang kâp a, Hesbon a bohmang a, Dibon chenin. Nopha chenin ka sukrêm a, Medeba tlung rakin,” an tih.

³¹Chuong ang chun a nih Amor mihai rama Israelhai chu an um chu.

³²Chun, Mosie chun Jazer va enthla dingin mi a tir a, chutaka khuohai chu an lâk a. Amor mi umhai chu an hnawt suok a.

³³Chun, an kîr nâwk a, Basan lampui tieng an fe a, chun Basan lal Og, ama le mi po pohai chu, anni doa Edreia lo thaw dingin an hung inthawk a.

³⁴Chun, LALPAIN Mosie kuomah, “Ama chu ṭi naw, ama khawm, a mi po pohai khawm, a ram khawm i kutah ka pêk ta a nih; Hesbona um Amor mihai lal Sihon chunga i thaw angin i thaw ding a nih,” a ta.

³⁵Chuongchun, ama khawm, a naupasalhai khawm, hla hrim hrim nei lovin a mihai leh an that a; a ram chu an hluopêk ta a.