Read Hmar NAMBAR 23 Bible Online

NAMBAR 23 - Hmar bible

NAMBAR 23

¹Chun, Balaam chun Balak kuoma chun, “Hitaka hin maichâm pasari mi siempêk la, bâwngchal pasari le berâmchal pasari mi buotsaipêk raw khai,” a ta.

²Balak chun Balaam hril ang chun a thaw a; chun, Balak le Balaam chun maichâm tina chun bâwngchal pakhat le berâmchal pakhat an inhlân a.

³Balaam chun Balak kuomah, “I pumrawhmang thilinhlân bula hin lo ngîr zing la, kei chu hang fe tum ka ta, LALPA chu mi be dingin a hung el khawm a ni thei a; chun, a mi hril taphawt chu hril ka ti che,” a ta. Chuongchun, tlâng kawl vel vula hin a hang fe ta a.

⁴Pathien chun Balaam chu a lo intuokpui a; Balaam chun a kuomah, “Maichâm pasari chu ka siem ta a; maichâm tina chun bâwngchal pakhat le berâmchal pakhat kân hlân seng a,” a ta.

⁵LALPAIN Balaam baua chun thu a sie a, “Balak kuoma chun kîr nâwk ta la, va hril sâwng rawh,” a ta.

⁶Chuongchun, a kuoma chun a kîr nâwk ta a; chun, ngai ta, Balak chu a pumrawhmang thilinhlân bula chun Moab mi lienhai po po leh a lo ngîr zing a.

⁷Chun thu chu a hril ta a, “Aram rama inthawkin Balak chun a mi ṭhuoi a, Saktieng tlânga Moab lal chun; ‘La hung la, Jakob rawihai ṭawngsie mîn phurpêk rawh, Hung la Israelhai hi mi hung vaukhâwngpêk ta!’ a ta.

⁸Iengtin am Pathien ṭawngsie inphur naw chu inphur thei ka ta?

⁹Iengtin am Pathien vaukhâwng lo chu vaukhâwng ka ta? Lungpui chunga inthawk dâmin anni chu ka hmu si a, Tlânga inthawk dâmin anni chu ka hmu a; Ngai ta, hnam a tuma um det sa a nih, Hnam danghai le angkhata inngai ngai lo.

¹⁰Jakobrawi pilvut zât hiel chu tuin am tiem thei a ta? Israelhai hmun lia ṭhea hmun khat chu tuin am tiem thei a ta? Mi fel thi angin thi ve thei lang, Ka tâwpna chu a tâwpna ang ni sien,” a ta.

¹¹Chun, Balak chun Balaam kuomah, “I mi thaw dân hi iengtizie am a na? Ka hmêlmahai ṭawngsie inphur dingin ka ṭhuoi che a, mal i sâwm lem ta hlau el hi!” a ta.

¹²Ama chun a dawn a, “LALPAIN ka bâua a sie chu ka hril ngei ding a ni naw am a nih?” a ti a.

¹³Chun, Balak chun a kuomah, “Hmun dangah fe nâwk ei tih khai; chutaka inthawk chu hmu thei tâwl i ta; a hmatâwng pâwl takhai chu hmûng i ta, an rêng ruok chun hmu vawng kher naw ti ni a; chutaka inthawk chun ṭawngsie mîn phurpêk rawh,” a ta.

¹⁴Chuongchun, Zophimhai umna Pisga sîpa chun a hang ṭhuoi a, maichâm pasari a siem a, maichâm tina chun bâwngchal pakhat le berâmchal pakhat ân hlân a.

¹⁵Chun, Balak kuoma chun, “Saw laia LALPA ka va biek kâr i pumrawhmang thilinhlân bula hin lo ngîr zing rawh,” a ta.

¹⁶Chun, LALPAIN Balaam chu a lo intuokpui a, a bâua chun thu a sie a, Balak kuoma chun kîr nâwk ta la, a kuomah va hril sâwng rawh, a ta.

¹⁷Chun, a kuoma chun a va fe a, ngai ta, a pumrawhmang thilinhlân bula chun a lo ngir zing a, Moab milienhai khawm a kuoma chun an um ve a. Balak chun a kuomah, “LALPAIN ieng am a lo hril a?” a ta.

¹⁸Chuongchun, Balaam chun thu chu a hril ta a, “Tho la, Balak, ngai ta; Zippor naupa, ka thu ngai rawh:

¹⁹Pathien chu khêl inhlip mihriem el a ni nawh, Inkîr hmang mihriem naupa a ni bawk naw a, A hril ta chu a thaw naw ding am a nih? A lo hril ta chu a sukpuitling naw ding am a nih?

²⁰Ngai ta, mal sâwm dingin thu ka hmu a, Mal a sâwm ta a, ka sukdanglam thei nawh.

²¹Jakob a chun rîtlona hrim a hmu naw a, Israel mihai lai chun kâwmâwna a hmu bawk nawh. LALPA an Pathien chu an kuomah a um a, Anni lai chun Lal chawimawina ri chu a um a.

²²Aigupta rama inthawkin Pathien chun a ṭhuoi suok tâwl a. Ramsiel tha ang el an put a.

²³Jakob chungah dawi invêtna a um naw a. Israelhai chunga sietna ding hrillâwkna a um bawk nawh. Jakob le Israelhai chanchin an hril zâtin, “Pathien thilthaw chu a va mak de!” tîng an tih.

²⁴Ngai ta, mipuihai chu sakeibakneipui angin an tho a, Sakeibaknei angin an inchâwm tho a: An sase an fâk hma chun zâl naw ni hai a. An sase thisen chu an dâwn hma chun,” a ta.

²⁵Chun, Balak chun Balaam kuomah, “Ṭawngsie inphur naw la, mal khawm sâwm naw rawh,” a ta.

²⁶Nisienlakhawm, Balaam chun a dawn a, Balak kuomah, “LALPAIN a hril po po chu ka thaw ngei ding a nih, tiin ka hril che a ni naw am a nih?” a ta.

²⁷Chun, Balak chun Balaam kuomah, “Hung ta, hmun dangah ṭhuoi phawt ka ti che. Chutaka inthawk chun ṭawngsie i mîn phûrpêk Pathien chun a phal khiet rawi mawh,” a ta.

²⁸Chuongchun, Balak chun Balaam chu thlalêr zuk suk en Peor sîpah a ṭhuoi a.

²⁹Chun, Balaam chun Balak kuomah, “Hitaka hin maichâm pasari mi siempêk la, bâwngchal pasari le berâmchal pasari mi buotsaipêk rawh,” a ta.

³⁰Chun, Balak chun Balaam hril ang chun a thaw a, maichâm tina chun bâwngchal pakhat le berâmchal pakhat ân hlân a.