Read Hmar NAMBAR 24 Bible Online

NAMBAR 24 - Hmar bible

NAMBAR 24

¹Chuongchun, Israelhai mal sâwmpêk chu LALPA dit zâwng a nih ti Balaam chun a hrietin ni danga a thaw ang khan dawi invêt tieng thaw dinga fe lovin thlalêr tieng a pan ta lem a.

²Chun, Balaam chu vântieng a tang a, Israel mihai chu a hnam hnama um chu a hmu a, chun, Pathien thlarau a chungah a hung tlung a.

³Chun, thu chu a hril ta a, “Beor naupa Balaam, Mit vara,

⁴Pathien thuhai hrea, Iengkimthawthei inlârna hmu a, Tlu bawkhupa mit hung var ta chun:

⁵Aw Jakob rawi chu in puon inhai a va ṭha de; Aw Israelhai, in Biekbûk chu:

⁶Ruom angin în phar dûr el a, Vadung panga huon angin, LALPA phun aloes ang, Vadung panga sidar thinghai ang an nih.

⁷A bâlṭina inthawkin tui luong suok a ta, A chi chu tui tamtakahai chun um a ta, A lal chu Agag nêkin ropui lem a ta, A ram chu chawimawiin um a tih.

⁸Aiguptaa inthawkin Pathien chun a ṭhuoi suok a, Ram siel tha ang el an put a, An hmêlma hnam danghai chu fa zo an ta, An ruhai chu suknâwi vawng an ta, An thalin kâp thleng an tih.

⁹An kûn a, sakeibaknei angin an bawk a. Sakeibakneihai ang elin, tuin am chawktho a ta? Malsâwmtu taphawt cheu chu malsâwmin um sienla, Ṭawngsie inphurtu taphawt cheu chu ṭawngsephurin um raw hai se,” tiin.

¹⁰Chuongchun, Balaam chunga chun Balak lung chu a hung chawk ta a, a kuthai a ben a. Balak chun Balaam kuomah, “Ka hmêlmahai ṭawngsie inphur dingin ka ko che a, hi, vawi thum rau mal i sâwm ta a.

¹¹Chuleiin, i umna tieng fe hmang dai rawh; ropuitaka chawisâng che ka lungril a na, nisienlakhawm, ngai ta, LALPAIN chawisâng che a hluo tah a ni hi,” a ti a.

¹²Chun, Balaam chun Balak kuomah, “I mitirhai kuoma khawm ka hril hrim naw am a nih?

¹³‘Balak hin a in chu tangka le rângkachaka sipin mi pe ding ni sien khawm, a ṭha tieng amanih, a se tieng amanih, keia lungril puoksuok chun LALPA thu bâk chu iengkhawm ka thaw thei nawh; LALPAIN a hril ta phawt chu hril ka tih,’ tiin.

¹⁴Ngai ta! tuhin ka mihai kuomah ka fe ding a nih; hung la, hieng mihai hin hi hnunga i mihai chunga an thaw dân ding hril ka ti cheu,” a ta.

¹⁵Chun, ama chun thu chu a hril ta a, “Beor naupa Balaam, Mit vara,

¹⁶Pathien thuhai hre a, A chunghnungtak hrietna hre a, Iengkimthawthei inlârna hmu a, Tlu bawkkhupa mit hung var ta chun:

¹⁷‘Ama chu ka hmu a, tuta a um ang ni lo hi, Ka thlîr a, hnaitea mi ang ni lovin; Jakoba inthawk chun arasi hung suok a ta, Israela inthawk chun lalhmawl hung suok a ta, Moab ram tluonin sun thleng a ta, Buoina nauhai po po suktlâwm a tih.

¹⁸A hmêlma hlak Edom le, Seir dâm chu chang a tih; Israelhai chan a ṭhat sûng po chu.

¹⁹Jakoba inthawkin tu amanih inlal a ta, Khuoa a la um sunhai chu sukbohmang a tih,’ a tih,” a ta.

²⁰Chun, Amalek tieng chu a ngha a, thu a hril a, “Amalek chu hnam bultak a ni nâk a chu, A tâwpna chu bohmangna a nih,” a ta.

²¹Chun, Ken tieng a ngha a, thu a hril a, “In umna hmun chu a det a, I bu chu lungpuia sep a na.

²²Nisienlakhawm, Ken chu sukrêm la nîng a tih, Assurhaiin sala an ṭhuoihmang pha cheu,” a ta.

²³Chun, thu chu a hril nâwk a, “Pathienin hienga a thaw chun tu am hring thei a ta?

²⁴Kittim rama inthawkin lawnghai hung tlung a ta, Assur le Eber sukrinum a ta. Anni khawm chu bohmang vawng an tih,” a ta.

²⁵Chuongchun, Balaam chu a tho a, a khuo tieng a fe ta a; Balak khawm chu a fe ve ta a.