Read Hmar NAMBAR 29 Bible Online

NAMBAR 29 - Hmar bible

NAMBAR 29

¹“Thla sarina, a ni khat ni chun inkhâwmpui inthieng nei in ta; ieng sin khawm in thaw ding a ni nawh; in ta dinga tawtawrâwt mût ni a ni ding a nih;

²LALPA ta dinga riminhnika pumrawhmang thilinhlân inhlân in ta; bâwngchal tuoi pakhat, berâmchal pakhat, berâmte a chal kum khat mi demkailo pasari,

³an beiphit thilinhlân, beiphit indi mi hrieka chawkpawl, bâwngchal pakhatah epha hmun sâwma ṭhea hmun thum, berâmchal pakhatah hmun sâwma ṭhea hmun hni,

⁴berâmte pasariah hmun sâwma ṭhea hmun khat seng;

⁵in ta dinga inremna siemna dingin suol thâwina kêlchal pakhat leh,

⁶thla thar pumrawhmang thilinhlân le chutaka beiphit thilinhlân dâm, dâwnmi thilinhlân dâm, an thaw dân pângngai LALPA ta dinga riminhnik dinga meia thilinhlân dâm bâkah.

⁷“Hi thla sarina, ni sâwm ni hin inkhâwmpui inthieng nei in ta, in lungril sukrinum in ta, ieng sin khawm in thaw ding a ni nawh.

⁸LALPA ta dinga thilinhlân riminhnik ruok chu in inhlân ding a nih; bâwngchal pakhat, berâmchal pakhat, berâmte a chal kum khat mi pasari, demkailo an ni ngei ding a nih;

⁹an beiphit thilinhlân, beiphit indi mi hrieka chawkpawl, bâwngchal pakhatah epha hmun sâwma ṭhea hmun thum, berâmchal pakhatah hmun sâwma ṭhea hmun hni,

¹⁰berâmte pasariah hmun sâwma ṭhea hmun khat seng:

¹¹suol thâwina dingin kêlchal pakhat leh; inremna dinga suol thâwina dâm, pumrawhmang thilinhlân inhlân zing dâm, chutaka beiphit thilinhlân le an dâwnmi thilinhlânhai bâkah.

¹²“Thla sarina ni sâwmpanga niin inkhâwmpui inthieng nei in ta; ieng sin khawm in thaw ding a ni nawh; LALPA ta dingin ni sari ruoi in ṭhe ding a nih;

¹³chun, LALPA ta dinga riminhnika meia thilinhlân, pumrawhmang thilinhlân in inhlân ding a nih, bâwngchal tuoi sâwmpathum, berâmchal pahni, berâmte a chal kum khat mi sâwmpali; demkailo an ni ngei ding a nih;

¹⁴an beiphit thilinhlân hrieka chawkpawl, bâwngchal sâwmpathum, bâwngchal pakhatah epha hmun sâwma ṭhea hmun thum, berâmchal pahni, berâmchal pakhatah hmun sâwma ṭhea hmun hni;

¹⁵berâmte sâwmpali, berâmte pakhatah hmun sâwma ṭhea hmun khat;

¹⁶suol thâwina dingin kêlchal pakhat leh; pumrawhmang thilinhlân inhlân hrim, chutaka beiphit thilinhlân dâm, dâwnmi thilinhlân dâm bâkah.

¹⁷“A ni hni niin bâwngchal tuoi sâwmpahni, berâmchal pahni, berâmte a chal kum khat mi demkailo sâwmpali in inhlân ding a nih;

¹⁸an beiphit thilinhlân le dâwnmi thilinhlânhai chu, a dân ang takin, an tam dân ang peiin bâwngchal, berâmchal, le berâmte hai chu in inhlân ding a nih.

¹⁹suol thâwina dingin kêlchal pakhat leh pumrawhmang thilinhlân inhlân zing dâm, chutaka beiphit thilinhlân dâm, dâwnmi thilinhlân dâm bâkah.

²⁰“A ni thum ni chun bâwngchal sâwmpakhat, berâmchal pahni, berâmte a chal kum khat mi demkailo sâwmpali;

²¹an beiphit thilhlân le dâwnmi thilinhlânhai chu, an dân ang takin, an tam dân ang peiin bâwngchal,le berâmtehai ruol chun in inhlân ding a nih;

²²suol thâwina dingin kêlchal pakhat leh; pumrawhmang thilinhlân inhlân zing le chutaka beiphit thilinhlân le chutaka dâwnmi thilinhlân bâkah.

²³“A ni li ni chun bâwngchal sâwm, berâmchal pahni, berâmte a chal kum khat mi demkailo sâwmpali;

²⁴an beiphit thilinhlân le dâwnmi thilinhlânhai chu, a dân ang takin, an tam ang peiin bâwngchal, berâmchal,le berâmtehai ruol chun in inhlân ding a nih;

²⁵suol thâwina dingin kêlchal pakhat leh; pumrawhmang thilinhlân zing dâm, chutaka beiphit thilinhlân le dâwnmi thilinhlân dâm bâkah.

²⁶“A ni nga ni chun bâwngchal pakuo, berâmchal pahni, berâmte a chal kum khat mi demkailo sâwmpali;

²⁷an beiphit thilinhlân le dâwnmi thilinhlânhai chu, a dan ang takin an tam ang peiin bâwngchal, berâmchal, berâmtehai ruol chun in inhlân ding a nih;

²⁸suol thâwina ding kêlchal pakhat leh; pumrawhmang thilinhlân inhlân zing dâm, chutaka beiphit thilinhlân dâm, chutaka dâwnmi thilinhlân dâm bâkah.

²⁹“A ni ruk ni chun bâwngchal pariet, berâmchal pahni, berâmte a chal kum khat mi demkailo sâwmpali;

³⁰an beiphit thilinhlân le dâwnmi thilinhlânhai chu, a dân ang takin, an tam ang peiin bâwngchal, berâmchal, berâmtehai ruol chun in inhlân ding a nih;

³¹suol thâwina dingin kêlchal pakhat leh; pumrawhmang thilinhlân zing dâm, chutaka beiphit thilinhlân dâm, chutaka dâwnmi thilinhlân dâm bâkah.

³²“Chun, ni sari ni chun bâwngchal pasari, berâmchal pahni, berâmte a chal kum khat mi demkailo sâwmpali;

³³an beiphit thilinhlân le dâwnmi thilinhlânhai chu, a dân ang takin, an tam ang peiin, bâwngchal, berâmchal, berâmtehai ruol chun in inhlân ding a nih;

³⁴suol thâwina dingin kêlchal pakhat leh; pumrawhmang thilinhlân zing dâm, chutaka beiphit thilinhlân le chutaka dâwnmi thilinhlân dâm bâkah.

³⁵“A ni riet ni chun inkhâwmpui ropuitak nei in ta; ieng sin khawm in thaw ding a ni nawh;

³⁶LALPA ta dinga riminhnik dinga mei thilinhlân pumrawhmang thilinhlân ruok chu in inhlân ding a nih; bâwngchal pakhat, berâmchal pakhat, berâmte a chal kum khat mi demkailo pasari;

³⁷an beiphit thilinhlân le an dâwnmi thilinhlânhai chu, a dân ang takin, an tam ang peiin, bângchal, berâmchal, berâmtehai ruol chun in inhlân ding a nih;

³⁸suol thâwina dingin kêlchal pakhat leh; pumrawhmang thilinhlân inhlân zing dâm, chutaka beiphit thilinhlân le chutaka dâwnmi thilinhlân dâm bâkah.

³⁹In thutiem dâm, nuomthua thilinhlân dâm, in pumrawhmang thilinhlân dâm, in beiphit thilinhlân dâm, in dâwnmi thilinhlân dâm, in inremna thilinhlân dâm bâka chun hieng hi in hunbi ruoiṭhe nei niin LALPA kuomah in inhlân ding a nih,’ ti rawh,” tiin.

⁴⁰LALPAIN Mosie thu a pêk po po chu Israel mihai chu Mosie chun a hril ta a.