Read Hmar NAMBAR 3 Bible Online

NAMBAR 3 - Hmar bible

NAMBAR 3

¹Hienghai hi Sinai tlânga LALPAIN Mosie a biek laia Aron le Mosie thlaa mihai an nih.

²Aron naupasal hming chu a upa tak Nadab, Abihu, Eleazar, Ithamar hai an nih.

³Hienghai hi thiempu ni dinga hriek nâl, thiempu sinthaw dinga a suktum Aron naupasalhai hming chu a nih.

⁴Chun, Nadab le Abihu chu Sinai thlalêrah mei hmang naw ding chi, LALPA hmaa an inhlân lai khan LALPA hmaah an thi a, nau an nei nawh; Eleazar le Ithamar chun an pa Aron dam laiin thiempu sin hi an thaw a.

⁵ LALPA chun Mosie a biek a,

⁶“Levi chihai chu thiempu Aron kuomah ṭhuoi la, a rawng an bâwl theina dingin a kuomah inumtir rawh.

⁷Anni chun biekbûka rawngbâwlna sin chu thawin intuokna puon in bulah ama le pungkhâwmhai puolin rawng bâwl an tih.

⁸Thuomhnaw po po chu kawl an ta, Israel mihai puola biekbûk rawngbâwlna sin chu thâwng an tih.

⁹Levi mihai chu Aron le a naupasalhai kuomah inhlân i ta; Israel mihai puola ama kuoma inhlân an nih.

¹⁰Aron le a naupasalhai chu ruot i ta, an thiempu nina chu chang zing an tih; hnam dang hung inrawlhai chu sukhlum nîng an tih,” tiin.

¹¹Chun, LALPAIN Mosie a biek a,

¹²“Ngai ta, Levi mihai hi Israel thlahai laia inthawka Israel thlahai nau lutir sul hung keu hmasatak aiah keima ngeiin ka lâk an na, Levi mihai chu ka ta nîng an tih;

¹³nau lutîr po po chu ka ta an ni si a, Aigupta rama nau lutîr po po sukhlum ni khan Israelhai laia nau lutîr po po a mihriem a ranin ka puola dingin ka hau a nih; ka ta nîng an ta; kei hi LALPA chu ka nih,” tiin.

¹⁴LALPA chun Sinai thlalêrah Mosie a biek a,

¹⁵“Levi mihai chu an pahnam hnamin, an sûngkuo kuoin tiem la, pasal taphawt chu thla khat chin chungtieng chu i tiem ding a nih,” tiin.

¹⁶Chuongchun, Mosie chun thaw dinga thupêk a ni ang chun LALPA thu ang chun a tiem tâwl a.

¹⁷Levi naupasalhai hming chu Gerson, Kohath, le Merari an nih.

¹⁸Chun, Gerson naupahai hming chu an sûngkuo kuoin Libni le Simei an nih.

¹⁹Chun, Kohath naupahai chu an sûngkuo kuo chun Amram, Izhar, Hebron le Uzziel an nih.

²⁰Merari naupahai chu an sûngkuo kuoin Mahli le Musi an nih. Hieng hi an pahnam ang peia Levi mihai sûngkuohai chu an nih.

²¹Gerson chu Libni sûngkuo le Simei sûngkuo thlatu a na, hienghai hi Gerson sûngkuo an nih.

²²Pasal po po thla khat chin chungtieng an tiemhai chu sâng sari le za nga zet an tling a.

²³Gerson mihai sûngkuohai chun an puon inhai chu biekbûk thlangtieng panga chun an zar ding a nih.

²⁴Gerson mihai pahnam ṭhuoitu chu Lael naupa Eliasaph nîng a tih.

²⁵Gerson nauhaiin intuokna puon ina an enkawl ding chu biekbûk le puon in nîng a ta, a chung dâm, intuokna puon in kawtkhâr puon zâr dâm,

²⁶a tuolzâwl puon zar dâm, biekbûk bula a tuolzâwl kawtkhâr puon zar dâm, maichâm vêla mi dâm le chutaka rawngbâwlna po pohai le chun.

²⁷Chun Kohath chu Amram mihai, Izhar mihai, Hebron mihai, Uzziel mihai sûngkuohai thlatu a na; hienghai hi Kohath sûngkuohai an nih.

²⁸Pasal po po thla khat chin chungtieng an tiem dân ang chun sâng riet le za ruk an nih, hmun inthieng enkawltu dinghai chu.

²⁹Kohath naupasalhai sûngkuohai chun, biekbûk simtieng pangah an puon in an zar ding a nih.

³⁰Kohath mihai sûngkuo ṭhuoitu ding chu Uzziel naupa Elizaphan nîng a tih.

³¹An enkawl ding chu bâwm dâm, dâwkân dâm, sathâu khâwnvar siena dâm, maichâm dâm, chutaka rawngbâwlna hai nîng a tih.

³²Chun, thiempu Aron naupa Eleazar chu Levi mihai ṭhuoituhai ṭhuoitu nîng a ta, hmun inthieng enkawltuhai chu inrawi a tih.

³³Merari chu Mahli le Musi mihai sûngkuo thlatu a nih. Hienghai hi Merari thlahai an nih.

³⁴Pasal po po thla khat chin chungtieng an tiemna ang chun sâng ruk le za hni an nih.

³⁵Merari sûngkuo pahnam ṭhuoitu ding chu Abihail naupa Zuriel a nih; biekbûk hmartieng pangah an puon in an zar ding a nih.

³⁶Merari naupasalhai enkawl dinga ruot chu biekbûk thingphêk remkhâwm dâm, a bangruhai dâm, a banhai dâm, ân nghatna kerkuokhai dâm, hmangruo po pohai le chutaka rawngbâwlnaa chu an nih;

³⁷a tuolzâwl inhuonna banhai dâm, an nghatna kerkuokhai dâm, a kildenahai le a hruihai leh.

³⁸Biekbûk saktieng pang intuokna puon in bul, nisa suokna tieng panga puon in zartu ding chu Mosie le Aron le a naupasalhai nîng an tih, hmun inthienga chun Israel mihai puolin a ṭûl taphawt chu thâwng an tih; hnam dang hung inrawl taphawt chu sukhlum ding nîng an tih.

³⁹LALPA thupêka Levi mihai a sûngkuo kuoin pasal po po thla khat chin chungtieng Mosie le Aronin an tiem po po chu sîng hni le sâng hni an nih.

⁴⁰LALPA chun Mosie kuomah, “Israel thlahai laia naulutîr, pasal, thla khat chin chungtieng chu tiem la, an nizât hre rawh.

⁴¹Levi chu (LALPA chu ka na) Israel thlahai laia naulutîr po po aiah i mi lâkpêk ding a nih; chun, Levi mihai ranhai chu Israel mihai ran po po pieng hmasatak aiah,” a ta.

⁴²Chuongchun, Mosie chun LALPAIN thu a pêk angin Israel mihai lai naulutîr po po chu a tiem a.

⁴³An hming indawt ang peia thla khat chin chungtieng naulutîr pasal po po an tiemhai chu sîng hni sâng hni za hni sâwmsari le pathum an nih.

⁴⁴LALPA chun Mosie a biek a,

⁴⁵“Israel mihai laia naulutir po po aiah Levi mihai chu la la, an ran aiah Levi mihai ran, Levi mihai chu ka ta nîng an ta, kei hi LALPA chu ka nih.

⁴⁶Chun, Levi mihai nêka an tamna Israel mihai naulutir za hni sâwmsari le pathum intlanna dingin,

⁴⁷a lukipin shekel nga seng i lâk ding a nih; hmun inthieng shekel angin i lâk ding a na, (shekel chu gera sawmhni a nih);

⁴⁸a chuong hai, intlanna sum chu Aron le a naupasalhai i pêk ding a nih,” tiin.

⁴⁹Chuongchun, Mosie chun Levi mihai intlanhai bâk intlanhaia inthawka intlanna sum chu;

⁵⁰Israel mihai nau lutîra inthawk chun hmun inthieng shekel angin sâng khat za thum sâwmruk le panga a lâk a.

⁵¹LALPAIN Mosie thu a pêk a, LALPA thu angin Mosie chun intlanna sum chu Aron le a naupasalhai chu a pêk a.