Read Hmar NAMBAR 30 Bible Online

NAMBAR 30 - Hmar bible

NAMBAR 30

¹Mosie chun Israel mihai ṭhuoituhai chu a biek a, “Hi hi a nih LALPAIN thu a pêk chu.

²Pasalin LALPA kuomah thu ân tiemkamin amanih, a thutiema inkhuokhir dinga ân khâm chun a thu chu a bawsiet ding a ni nawh; a bâua suok ta ang po po chun a thaw ding a nih.

³Nuhmei khawmin a nunghâk laia a pa ina a um laiin LALPA kuomah thu ân tiemkam a, a thutiema ân khuokhir a,

⁴ân tiemkamna le thutiema ân khuokhirna chu a pain a hriet a, a pain a tosan el chun ân tiemkamna po po chu puitling a ta; chun, thutiem tinrêng ân khuokhirnahai chu um zing a tih.

⁵Amiruokchu, a pain a hriet huna a phal naw chun ân tiemkamnahai, le ân khuokhirna thutiemhai a ieng ieng khawm chu puitling naw ni a, a pain a phal naw a ni leiin LALPAIN ama chu ngaidam a tih.

⁶Thutiemin amanih, thu dâwn lova intiemnain amanih a del zing laia pasal a nei a,

⁷a pasalin a hriet a, a hriet huna a to zing chun ân tiemkamna chu um zing a ta, a thutiem ân khuokhirnahai khawm chu um zing a tih.

⁸Amiruokchu, a pasal chun a hriet huna a phal naw chun a chunga thutiem um le thu dâwn lova ân tiemna chu sukbo a tih; chun, LALPAIN ngaidam a tih.

⁹Amiruokchu, hmeithai amanih, mâksiet tuok amanih hai thutiem chu ân tiemna po po chun del zing a tih.

¹⁰Chun, a pasal inah thu ân tiemkam amanih, inkhâma a lungril khuokhir dinga thu ân tiem a, a pasalin a hriet khawma a to zing a,

¹¹a phalnaw naw chun ân tiemkamna po po chu um zing a ta, ân khuokhirna tinrêng khawm chu um zing a tih.

¹²Amiruokchu, a pasalin a hriet nia iengkhawm ni lova a siem a, a sukbo el chun, ân tiemna thua a bâu thu suok taphawt hai, ama ân tiemkamnahai amanih, umta naw ni a; a pasal chun a hlîp ta leiin LALPAIN ama chu ngaidam a tih.

¹³Thutiem po po le hringna sukrinum dinga khuokhirna inkhâmna po po chu a pasalin a sukhmangin a sukbo thei.

¹⁴Chuleiin, a pasalin a hriet huna inthawkin a to ṭawk el chun a thu intiem ta po po le ân khitna po po chu a suknghet a nih; a hriet nia inthawka a tosan el leiin a suknghet a nih.

¹⁵Amiruokchu, a hriet hun ni lova a hnunga iengkhawm ni lova a siem a, a sukbo chun a rîtlona maw chu a phur ding a nih,” tiin.

¹⁶Hieng hi pasal le nuhmei inkâr le pa le a naunu nunghâk laia a pa ina la um zing, inkâra dân dinga LALPAIN Mosie thu a pêkhai chu a nih.