Read Hmar NAMBAR 31 Bible Online

NAMBAR 31 - Hmar bible

NAMBAR 31

²“Midian mihai chungah Israel mihai phuba la rawh; chu zoa chun i chihai kuomah ṭhuoi ni tâng i tih,” tiin.

³Chuongchun, Mosie chun mipuihai chu a biek a, “Midian mihai chunga LALPA phubalâkna thaw dinga Midian mihai chu thawa indo dingin nangni laia mi inrâlthuom rawhai se.

⁴Israel hnam po pohai laia hnam tina mi sâng khat pei indonaah in fe ding a nih,” tiin.

⁵Chuongchun, Israel mi sâng tamtak laia inthawkin, hnam tina inthawkin sâng khat seng indonaa fe dingin sipai sîng khat le sâng hni an pêk suok a.

⁶Chuongchun, Mosie chun chi tina inthawka sâng khat seng le thiempu Eleazar naupa Phinehas hmun inthienga bûrlebêlhai, thupêk vêlna dinga tawtawrâwthai chawiin indonaa chun ân fetir a.

⁷Chun, LALPAIN Mosie thu a pêk angin, Midian mihai chu an do a, pasal po po an that a.

⁸An mi thathai laia chun Midian mihai lalhai khawm an ṭhang ve a; Midian mihai lal panga Evi, Rekem, Zur, Hur le Reba hai, Beor naupa Balaam khawm kâwlhnâmin an that a.

⁹Israel mihai chun Midian mi nuhmei le naupanghai chu salah an ṭhuoi a, chun, an ran po pohai, an berâm ruol po pohai, an thuomhnawhai po po chu râllâk sum dingin an lâk a.

¹⁰An umna khuo po pohai, an riebûkhai po po an râw vawng a.

¹¹Mihriem le ran, sal le râllâk sum po po an fepui vawng a.

¹²Chun, salhai, manhai, râllâk sumhai chu Mosie le Eleazar le Israel mi pungkhâwmhai kuoma Jeriko zâwn Jordan vapang Moab phai an riebûka chun an hung intlun a.

¹³Mosie le thiempu Eleazar le pungkhâwmhai po po chun riebûk puoah an lo va tuok a.

¹⁴Chun, Mosie chu sipai hotuhai, indonaa inthawka hunghai chunga chun a lunginsen a.

¹⁵Chuongchun, Mosie chun an kuomah, “Nuhmei chu damin in la hla vawng maw?

¹⁶Ngai ta u, Balaam remruot chun Peor chungchâng thuah Israel mihai chu LALPA chunga bawsietna suktlungtuhai hieng hi an nih, LALPA mi pungkhâwmhai chunga khan hri ân lêng ta kha.

¹⁷Chuleiin, naupang laia pasal ta phawt chu that unla, nuhmei mi pâwl taphawt chu that bawk ro.

¹⁸Nuhmei naupang mi la pâwl naw po po chu in ta dingin hla ro.

¹⁹Chun, khawhnâwmah ni sari riek unla, tukhawm mi that le mithi tâwk taphawt chu ni thum ni le ni sari niin inthien ro, nangni le in salhai khawm.

²⁰Chun, thuomhnaw hrim hrim le savuna thil siem hrim hrim dâm, kêl hmula thil siem po po dâm, thinga siemhai po po chungthua chu inthien ding a nih,” a ta.

²¹Chun, thiempu Eleazar chun indonaa fe indo mihai kuoma chun, “Hi hi LALPAIN Mosie thu a pêk dân thuruot chu a nih;

²²iengkhawm ni sienla, rângkachak dâm, tangkaruo dâm, dâr dâm, thîr dâm, rângva dâm, suon dâm;

²³iengkhawm meia rawa se theilo chu meiah rawl thleng in ta, chuongchun, hung inthieng tâng a tih; iengkhawm ni sienla, inthienna tuia sukthieng ding a nih; chun, meia raw tuor theilo po chu tuiah in rawl thleng ding a nih.

²⁴Chun, a ni sari ni chun in puon sâwp in ta, chun, hung inthien in ta, chu zoa chun riebûkah in hung lût ding a nih,” a ta.

²⁵LALPA chun Mosie a biek a,

²⁶“Nang le thiempu Eleazar leh, pungkhâwmhai pahnam ṭhuoituhai leh râllâk suma an lâk mihriemhai le ranhai chu tiem vawng unla,

²⁷râllâk sum chu hmun hniah ṭhe unla, indonaa fe indo mihai ta dingin le, pungkhâwmhai ta dingin.

²⁸Indonaa fe râl kâp mihaia inthawk chun LALPA ta dinga sie pêk ding suktum pei unla, thil hring za nga peiah pakhat mihriema inthawk dâm, bâwnga inthawk dâm, sabengtunga inthawk dâm, berâm ruola inthawk dâmin.

²⁹Chuonga a chenve an changa inthawk chun la unla, LALPA ta dinga a thêna thên thilinhlâna dingin thiempu Eleazar pe ro.

³⁰Chun, a chenve Israel mihai chanpuol chu sâwmnga peiah pakhat suktum la, mihriema inthawk dâm, bâwnga inthawk dâm, sabengtunga inthawk dâm, berâm ruola inthawk dâm, ran ruola inthawk dâmin; chuongchu LALPA biekbûk enkawltu Levi mihai pe rawh,” a ta.

³¹Chuongchun, LALPAIN Mosie thu a pêk ang chun Mosie le thiempu Eleazar chun an thaw a.

³²Sipaihaiin an lâk râllâk sum tiem lovin an lâk chu berâm nuoi ruk sîng sari le sâng nga,

³³bâwng sîng sari le sâng hni;

³⁴sabengtung sîng ruk le sâng khat,

³⁵mihriem chu nuhmei pasal la pâwl ngailo sîng thum le sâng hni an nih.

³⁶Chun, a zâtve indonaa fehai chanvo chu, berâm nuoi thum sîng thum sâng sari le za nga a na;

³⁷chun, LALPA ta dinga chanvo berâm chu za ruk sâwmsari panga.

³⁸Bâwng chu sîng thum le sâng ruk a na, chutaka LALPA chanvo chu sâwmsari pahni a nih.

³⁹Sabengtung chu sîng thum le za nga a na, chutaka LALPA chanvo chu sâwmruk pakhat a nih.

⁴⁰Mihriem chu sîng khat le sâng ruk an na, chutaka LALPA chanvo mihriem chu sâwmthum le pahni an nih.

⁴¹LALPAIN Mosie thu a pêk angin chanvo LALPA ta dinga a thêna thên thilinhlân chu Mosie chun thiempu Eleazar chu a pêk a.

⁴²Mosiein râlkâp mihaia inthawka a sem Israel mihai chanvo chu

⁴³mipui chanvo a zâtve chu berâm nuoi thum sîng thum sâng sari le za nga,

⁴⁴bâwng sîng thum le sâng ruk,

⁴⁵sabengtung sîng thum le za nga,

⁴⁶mihriem sîng khat le sâng ruk an na.

⁴⁷Israel chanvo a zâtvea inthawk chun Mosie chun mihriem le ran sâwmnga peiah pakhat a lâk a, LALPA thupêk angin LALPA biekbûk enkawltu Levi mihai chu a pêk a.

⁴⁸Chun, sipaihai chunga hotu, sâng chunga hotuhai, za chunga hotuhai chun Mosie an va hnai a.

⁴⁹Mosie kuomah, “I siehlawhai hin kan kuta um indo mihai chu kan tiem a, tukhawm a kim naw kan um naw a,

⁵⁰kan hringna ta dinga LALPA hmaa intlanna siemna dingin LALPA ta dinga thilinhlân ding miin an nei zâwng, rângkachaka siem incheina thil, kebunhai, bânbunhai, hmingnamna kutsebihai, nabêhai, ṭhihai dâm khawm kan hung lâk a,” an ti a.

⁵¹Chun, Mosie le thiempu chun rângkachaka siem an thuom pohai chu an lâk a.

⁵²Sâng chunga hotu le za chunga hotuhai rângkachak LALPA kuoma a thêna thên thilinhlâna an inhlân po po chu shekel sîng khat sâng ruk za sari le sâwmnga a nih.

⁵³(Râlkâp mihai chun an râllâk sumhai chu mâni ta seng dinga la an na).

⁵⁴Chun, Mosie le thiempu Eleazar chun sâng chunga hotu le za chunga hotuhai rângkachak chu an lâk a, Israel thlahai hriet zingna dingin intuokna puon inah LALPA hmaah an hung lâk a.