Read Hmar NAMBAR 32 Bible Online

NAMBAR 32 - Hmar bible

NAMBAR 32

¹Reuben le Gad thlahai chun ram an hau hle a; chun, Jazer ram le Gilead ram an hmu chun, a hmun chu ran ta dinga hmun ṭhatak niin an hriet a;

²chuongchun, Gad thlahai le Reuben thlahai chun Mosie le thiempu Eleazar le pungkhâwmhai ṭhuoituhai chu an va biek a,

³“Astaroth, Dibon, Jazer, Nimra, Hesbon, Eleale, Sebam, Nebo le Beon dâm

⁴Israel pungkhâwmhai hmaa LALPAIN a suktlâwm ramhai chu ran ta dinga ṭhatak ram a na; chun, i siehlawhai hin ran kan nei a,

⁵rem i ti zâwng a ni chun hi ram hi kan hluo dingin mi pe la, Jordan râl mi ṭhuoi kai da el raw khai,” an ta.

⁶Chun, Mosie chun Gad mihai le Reuben mihai kuoma chun, “In unauhai chu indonaah fêng an ta, nangni chu hitaka hin in lo um el ding maw?

⁷Iengdinga LALPAIN a pêk rama lût lo dinga Israel thlahai lungril in sukṭi zing am a ni le?

⁸Kades-barneaa inthawka ram va enthla dinga ka ti khan hieng ang bawk hin in puhai chun an ta,

⁹Eskol ruom an hung tlung khan ram chu an hung hmu a, LALPAIN ram a pêka chun an lût nâwna dingin Israel thlahai lungril chu an sukṭipêk a.

¹⁰Chuongchun, chu ni chun LALPA lung chu a chawk a, inkhâmin,

¹¹‘Aigupta rama inthawka hung suok, kum sâwmhni chin chungtieng mi hrim hrim chu Abraham hai, Isak hai, Jakob hai kuoma inkhâma pêk ka tiem ram chu tukhawma hmu naw ni hai; an mi zui tak tak naw leiin;

¹²Keniz mi Jephunne naupa Kaleb le Nun naupa Josua hai chau naw chun, anni chun LALPA chu an zui tak tak leiin,’ tiin.

¹³Chun, Israelhai chunga chun LALPA lung chu a chawk a, LALPA mithmua thil ṭha naw thawtu suon po po chu an bohmang vawng hmakhat chun thlalêrah kum sâwmli ân vâkvaitir a.

¹⁴Chun, ngai ta u, Israelhai chunga LALPA lungsenna ṭiumtak chu belsain nangni suon suolhai hin in puhai ai in aw ta a.

¹⁵LALPA zui lova in um meu chun annirawi hi thlalêrah ân umtir nâwk el ding a nih. Hieng mihai po po hi in sukbohmang el ding a nih,” a ta.

¹⁶Anni chun an va hnai a, a kuomah, “Hitaka hin kan ran ta dingin berâm huonhai le kan nau le tehai ta dingin khuohai siem kan ta.

¹⁷Keini ruok chu an hmun ding ei tlung hmakhata Israel mihai hmaa fe pei dingin inrâlthuom diem kan ta; hi rama mihai lei hin kan nau le têhai chu kul nei khuoahai chun um an ta.

¹⁸Israel mi po poin an hmun hluo ding an hluo hmakhat chu kan in tieng fe naw ning ungah.

¹⁹Kan hluo ding chu hi tieng râl Jordan sak tieng a ni leiin Jordan râl khingtieng le a khêl tieng chu hluopui naw ning ungah,” an ta.

²⁰Chun, Mosiein an kuomah, “Chuong anga in thaw a, indonaa LALPA hmaa fe dinga in inrâlthuom a, a hmaa inthawka a hmêlma hai a hnawt suok a,

²¹LALPA hmaa ram chu hne a ni hmakhata nangni laia inrâlthuomhai po poin LALPA hmaa Jordan in kai vawng chun,

²²nakie leh in tieng la fêng in ta, LALPA chunga le Israelhai chungah inthiemnawna nei lovin in um ding a nih; chuongchun, hi ram hi LALPA hmaa in hluo ding nîng a tih.

²³Amiruokchu, chuong anga in thaw naw chun, ngai ta u, LALPA chunga suol nîng in ta, in suol chun hmu suok ngei ngei a ti cheu ti hre ro.

²⁴In nau le têhai ta dingin khuohai siem unla, in berâmhai ta dingin huonhai siem un la, in hril ang chun thaw ro khai,” a ta.

²⁵Chun, Gad thlahai le Reuben thlahai chun Mosie kuomah, “I siehlawhai hin kan pu thupêk ang chun thâwng kan tih.

²⁶Kan nuhmei, kan nau le têhai, kan berâm ruolhai, kan ran ruolhai po po chu Gilead ram khuohaia hin lo um an ta;

²⁷amiruokchu, i siehlaw, indo dinga inrâlthuomhai po po chu kan pu hril ang chun LALPA hmaah va kai kan tih,” an ta, an hril a.

²⁸Chuongchun, Mosie chun an chungchâng thua chun thiempu Eleazar hai, Nun naupa Josua hai, Israel pahnam ṭhuoituhai chu thu a pêk a.

²⁹Chun, Mosie chun an kuomah, “Gad thlahai le Reuben thlahai indo dinga inrâlthuomhai po po hin LALPA hmaa Jordan vadung an kaipui cheu a, ram chu in inhmin chun Gilead ram chu an hluo dingin in pêk ding a nih;

³⁰amiruokchu, inrâlthuoma an kaipui naw cheu chun Kanaan ramah nangni lai ṭhang ve el an tih,” a ta.

³¹Chun, Gad mihai le Reuben mihai chun, “I siehlawhai kuoma LALPAIN a hril ang chun thâwng kan tih;

³²inralthuoma LALPA hmaa kaiin Kanaan ramah lût kan ta, chuongchun, kan ram hluo ding chu Jordan vadung khêl tieng la ni zing a tih,” tiin an dawn a.

³³Chun, Mosie chun Gad mihai le Reuben mihai le Josef nau Manasse hnam zâtve hai chu Amor lal Sihon ram dâm, Basan lal Og ram, chuong ramhai chu a khuo um po pohai leh a vêla rama khuohai le chun a pêk a.

³⁴Chun, Gad thlahai chun Dibon dâm, Ataroth dâm, Aroer dâm,

³⁵Atrothsophan dâm, Jazer dâm, Jogbeha dâm,

³⁶Beth-nimrah dâm, Betharan dâm an indin a, khawpui kul neihai, berâm huon dâm leh.

³⁷Chun, Reuben thlahai chun Hesbon dâm, Eleale dâm, Kiriathaim dâm,

³⁸Nebo dâm, Baal-meon dâm, (an hminghai hi sukdanglam a ni tah), Sibma dâm an indin a; an khuo siemhai chu hming dang an inbûk a.

³⁹Chun, Manasse naupa Makir thlahai chu Gilead rama chun an fe a, an lâk a. Amor mihai chutaka umhai chu an lâkpêk a.

⁴⁰Chun, Mosie chun Gilead ram chu Manasse naupa Makir chu a pêk a, chutaka chun a um a.

⁴¹Chun, Manasse naupa Jair chun chutaka khuohai chu a va lâk a, Havot-Jair ân bûk a.

⁴²Chun, Noba chun Kenath a va lâk a, a khawperhai leh, ama hming chawiin Noba ân bûk a.