Read Hmar NAMBAR 35 Bible Online

NAMBAR 35 - Hmar bible

NAMBAR 35

¹Chun, Jeriko zâwn Jordan vapang, Moab phaia chun LALPAIN Mosie a biek a,

²“Israel mihai chu thu pe la, an ramahai chun Levi mihai umna ding khuohai siempêk raw hai se; chun, ran tlatna dingin khaw kâwl vêlhai chu Levi mihai chu i pêk ding a nih.

³Khuohai chu an umna ding nîng a ta, a vêlhai chu an bâwng le an ran, an thil vai po pohai ta dingin nîng a tih.

⁴Levi mihai kuoma ran tlatna hmun i pêk ding chu khaw kula inthawka tawng sâng khata hla a ni ding a nih.

⁵Kul puotienga inthawkin inkhîng i ta, saktieng pangah tawng sâng hni, simtieng pangah tawng sâng hni; thlangtieng pangah tawng sâng hni, hmârtieng pangah tawng sâng hni, a lai takah khuo um a tih. Hi hi an khuo ta dinga ran tlatna hmun nîng a tih.

⁶Chun, Levi mihai i pêk ding khuohai chu tuolthathai tlânna dingin himna khuo paruk nîng a ta; chuong naw khawm chu khuo sâwmli pahni i pêk bawk ding a nih.

⁷Levi mihai i pêk ding khuo po pohai chu khuo sâwmli pariet, a kâwl- vêla ran tlatna hmunhai leh nîng a tih.

⁸Israel mihai ihluo khuo i pêk dân ding chu a hnam lien deua inthawk chun pe lien deu i ta; a hnam tlâwm deua inthawk chun pe chîn i ta, pahnam tinin an hluo ram tam dân i zirin a khuo chu Levi mihai a pêk ding a nih,” tiin.

⁹LALPA chun Mosie a biek a, “Israel mihai hril la, an kuomah,

¹⁰‘Jordan vadung in kai a, Kanaan ram in lût pha chun,

¹¹himna khuo ding in ruot ding a nih, tuolthat paltu tlânna dingin.

¹²Chuong khuohai chu phubalatua inthawka himna khuohai nîng an ta; pungkhâwmhai hmaa rorêlpêk dinga a ngir hmaa tuolthattu chu a thi nawna dingin.

¹³Chuongchun, in ta dinga himna khuo in ruothai chu khuo paruk nîng a ta.

¹⁴Jordan râlah khaw thum ruot in ta, Kanaan ramah khaw thum ruot in ta; himna khuohai nîng an tih.

¹⁵Israel mihai le hnam dang le an kuoma chênghai ta dingin hi khuo paruk hi himna khuohai nîng an tih, chutaka chun tukhawm mi that palhai chu an tlân ding a nih.

¹⁶Amiruokchu, thîr hriemhrei hmanga mi a thaw a, a thi chun, tuolthat a nih, tuolthattu chu sukhlum ngei ding a nih.

¹⁷Chun, thina khawpa lunga mi a suk a, a thi chun tuolthat a nih, tuolthattu chu sukhlum ngei ding a nih.

¹⁸Chun, thi khawpa thinga mi a vuok a, a thi chun tuolthat a nih, tuolthattu chu sukhlum ngei ding a nih.

¹⁹Thisen phubalatu chun tuolthattu chu that nghâl el a tih. A hmu pha pha a sukhlum el ding a nih.

²⁰Chun, mi a theida leia nam rak amanih, inchân rûka dênga a thiin amanih,

²¹intaina leia a chum hlum amani chun a sukhlumtu chu sukhlum ve ngei nîng a tih; tuolthat a nih, thisen phubalatu chun a hmu pha pha a sukhlum el ding a nih.

²²Amiruokchu, intai lei khawm ni chuong lova, nam thut amanih, chun, inchân ni kher lova dêng amanih,

²³an um ti khawm hre lova, a hmêlma khawm ni lova, a pawitâwk khawm ni chuong lova, lungin amanih a dêng a, mi a lo thi dâm a ni chun,

²⁴pungkhâwmhaiin hieng rorêlna dân ang hin a sukhlumtu thisen phubalatu ro chu a rêlpêk ding a nih;

²⁵pungkhâwmhai chun tuolthattu chu thisen phubalatua inthawk chun hum an ta, pungkhâwmhai chun a tlânna, himna khuoa chun inumtir nâwk an ta, hriek inthienga nâl, thiempu lal a thi hmakhat chun chutaka chun a um ding a nih.

²⁶Amiruokchu, ienglai khawmin tuolthattu chu a tlânna, himna khaw ramri puotieng a fe a,

²⁷thisen phubalatuin a himna khaw puoa a hmu a, thisen phubalatuin a that chun thisena chun thiemnaw chang naw ni;

²⁸thiempu lal a thi hmakhat chun chu himna khuoa chun a um zing ding a ni leiin; thiempu a thi hnunga ruok chun tuolthattu chu a umna rama chun a kîr nâwk ding a nih.

²⁹Hieng thil hi in thlahai chena in umna taphawta in rorêl dân ding chu nîng a tih.

³⁰Tukhawma mi a that chun tuolthattu chu hretuhai bâua inthawka thu suokin sukhlum ding a nih; amiruokchu, hretu pakhat chau chu, chu chu sukhlumna ding chun a hun nawh.

³¹Chun, tuolthattu chu in intlan ding a ni nawh, thina khawpa thiemnaw chang a na, sukhlum ngei ding a ni lem.

³²Chun, thiempu thi hma chun a himna khuoa tlân, a rama um nâwk ding intlanna chu in lâk ding a ni nawh.

³³Chuongchun, in umna ram chu, sukpawrche ding a ni nawh, thisen chun ram chu in sukpawrche si a, thisen suokna ram pawrche sâwpna ding chun thisen insuotu thisen ngawt naw chu hmang thei a ni si naw a.

³⁴In umna ram, ka umna hi in sukpawrche ding a ni nawh, kei LALPA chu Israel mihai lai hin ka um si a,’ ti rawh,” tiin.