Read Hmar NAMBAR 4 Bible Online

NAMBAR 4 - Hmar bible

NAMBAR 4

¹Chun, LALPAIN Mosie le Aron chu a biek a,

²“Levi nauhai laia Kohath mihai a sûngkuo kuoin, a pahnam hnamin, kum sâwmthum chin chungtieng,

³kum sâwmnga chenin intuokna puon ina rawngbâwlna sin thaw tlâk ding po po zât chu tiem vawng ro.

⁴Intuokna puon in hmun inthiengtaka Kohath naupasalhai sinthaw ding chu hieng hi a nih:

⁵umhmun an sawn ding po leh Aron chu a naupasalhai leh lût an ta, hmun inthieng puon zar chu hlîp thlâng an ta, chu chun thuthlungna bâwm chu inkhum an ta,

⁶seal vunin inkhum an ta, chu chunga chun puon dumpâwlin inkhum an ta, a zâwnna hmawl chu inbûk an tih.

⁷Chun, inentirna bei dâwkân chunga chun thlênghai, riminhnik siena thlêngtêhai, thlêngkûmhai le dâwnmi thilinhlânna notung lienhai an sie ding a nih; chun, chatlak loa sie bei chu chutaka chun a um ding a nih;

⁸chu chu puon senlârin inkhum an ta, inkhumna seal vunin inkhum an ta, a zâwnfung an inbûk ding a nih.

⁹Êntu khâwnvar siena le chutaka dinga an hmang ding a khâwnvarhai, a chaichehai, a vut sienahai, hriek bûr po pohai puon dumpâwlin inkhum an tih;

¹⁰chu chu le a hmangruohai po po chu inkhumna seal[1] vuna inkhumin zâwnnaa chun sieng an tih.

¹¹Chun, rangkachak maichâm chu puon dumpâwlin inkhum nâwk an ta, inkhumna seal vunin inkhum nâwk an ta, a zâwnfung chu inbûk an tih.

¹²Hmun inthienga an hmangruo, rawngbâwlna bûrlebêlhai po po chu la vawng an ta, puon dumpâwlin fûn an ta, inkhumna seal vunin inkhum an ta, zâwnnaa chun an sie ding a nih.

¹³Maichâma meivâm chu luok fai an ta, a chungah puon senduk phâng an ta,

¹⁴a chunga chun an rawngbâwl vêlna bûrlebêlhai po po, mei lâkna dâm, sa thurna thîrkuoi dâm, vutluo dâm, chawtawl dâm, maichâm bûrlebêlhai po po chu sieng an ta; chun, an inbûk ding a nih.

¹⁵Aron le a naupasalhai chun hmun inthieng le hmun inthieng bûrlebêlhai po po an inkhum zo a, umhmun sawn ding hun taphawta chun Kohath naupasalhai chu a zâwn dingin hung inthawk hlak an ta, nisienlakhawm, thil inthienghai chu an them ding a ni nawh, an them chun chu thîng an tih. Hieng hi intuokna puon ina Kohath naupasalhai chanpuol ding a nih.

¹⁶Thiempu Aron naupa Eleazar thaw ding chu, insit ding hriek dâm, riminhnik dâm, chatlak lova fâkmi thilinhlân dâm, hriek nâlmi dâm, biekbûk le chutaka thil um po pohai enkai dâm, hmun inthieng le a thuomhnawhai ngaituo vêl chu a nih,” tiin.

¹⁷LALPA chun Mosie le Aron a biek a,

¹⁸“Kohath mihai pahnam chu Levi mihaia inthawkin sukbohmang ni naw sien;

¹⁹amiruokchu, thil inthieng takhai an hung hnai pha thi pha lova, an hring lem theina dingin hieng hin thaw ro: Aron le a naupasalhai chu lût hai sienla, an thaw ding le an chanpuol ding seng ruotpêk raw hai seh,

²⁰amiruokchu, thil inthieng en dingin sâwt nawte khawm lût naw raw hai se, an lût chun thîng an tih,” tiin.

²¹Chun, LALPAIN Mosie a biek a,

²²“Gerson naupasalhai khawm an pahnam hnamin, a sûngkuo kuoin tiem vawng rawh;

²³kum sâwmthum chen chungtieng kum sâwmnga mi chenin rawngbâwlna sin intuokna puon ina thaw ding po po zât chu tiem vawng rawh.

²⁴Gerson sûngkuo sinthaw ding chu rawngbâwl tieng le rikphur tieng a nih,

²⁵biekbûk puonzâr dâm, intuokna puon in ân khumna leh, a chung inkhumna seal vun dâm, intuokna puon in kawtkhâr puonzâr dâm,

²⁶biekbûk le maichâm vêla tuollai puonzârhai dâm, kawtkhâr puonzâr dâm, a hruihai dâm le chutaka rawngbâwlna dinga hmangruo po po dâm phur an ta. Chuong thila thaw ṭûl po po chu an thaw ding a nih.

²⁷Gerson naupasalhai sinthaw dinga rawngbâwlna tieng le rikphur tienga an chanpuol po po chu Aron le a naupasalhai thu thu nîng a tih, an phur ding po ruotpêk i tih.

²⁸Chuong chu intuokna puon ina Gerson naupasalhai sûngkuohai sinthaw ding chu a na, an thaw ding chu thiempu Aron naupa Ithamar ruot ding a nih.

²⁹“Merari naupasalhai chu a sûngkuo kuoin, a pahnam hnamin i tiem ding a nih.

³⁰Kum sâwmthum chen chungtieng kum sâwmnga chenin rawngbâwlnaa ṭhang thei, intuokna puon ina sinthawtu ding zât chu i tiem vawng ding a nih.

³¹Intuokna puon ina an sinthaw, an chanpuol ding chu hi hi a nih: biekbûk thingphêkhai, a bangruhai, a banhai dâm, ân nghatna kerkuok dâm,

³²a kawt inhuonna banhai, ân nghatna kerkuok dâm, kildenahai dâm, a hruihai dâm, a hmangruo po po le, a hmangruo dang po po phur dâm, a hming lam pei sengin an chanpuol ding i ruot pêk ding a nih.

³³Chuong chu thiempu Aron naupa Ithamar rawia intuokna puon ina Merari naupasalhai sûngkuohai thaw ding a nek nek chena an rawngbâwl dân ding chu a nih,” tiin.

³⁴Chuongchun, Mosie le Aron le a pungkhâwmhai laia ṭhuoituhai chun,

³⁵Kohath naupasalhai chu a sûngkuo kuoin, a pahnam hnamin intuokna puon ina sinthawtu ding zât chu kum sâwmthum chen chungtieng kum sâwmnga mi chenin an tiem a.

³⁶Chuong a pahnam hnama an tiemhai chu sâng hni za sari le sâwmnga an nih.

³⁷Chuong chu an nih intuokna puon ina rawngbâwl hlak Kohath mihai thla an itiem, Mosie hmanga LALPA thupêk anga Mosie le Aronin an tiem chu.

³⁸Gerson naupasalhai, intuokna puon ina sinthaw dinga rawngbâwl thei zât ding chu, a sûngkuo kuoin,

³⁹a pahnam hnamin kum sâwmthum chen chungtieng kum sâwmnga mi chena tiem an na;

⁴⁰chuong a pahnam hnama, a sûngkuo kuoa an tiemhai chu sâng hni za ruk le sâwmthum an nih.

⁴¹Chuong chu an nih Gerson naupasalhai sûngkuohai, intuokna puon ina rawngbâwl po po, LALPA thupêk anga Mosie le Aronin an tiem hai chu.

⁴²Merari naupasalhai, intuokna puon ina sin thaw dinga rawngbâwl ding zât chu, a sûngkuo kuoin, a pahnam hnamin,

⁴³kum sâwmthum chen chungtieng kum sâwmnga mi chena tiem an na;

⁴⁴chuong a sûngkuo kuoa an tiemhai chu sâng thum le za hni an nih.

⁴⁵Chuong chu an nih Merari naupasalhai sûngkuohai Mosie hmanga LALPA thupêk anga Mosie le Aronin an tiem chu.

⁴⁶Levi mihai, rawngbâwl ding le intuokna puon ina mi phur phurtu ding zât,

⁴⁷a pahnam hnamin, a sûngkuo kuoin kum sâwmthum chen chungtieng kum sâwmnga mi chenin Mosie le Aron le Israel ṭhuoituhai chun an tiem a;

⁴⁸chuong an tiemhai chu sâng riet za nga le sâwmriet an nih.

⁴⁹Mosie hmanga LALPA thupêk angin mi tin an thaw ding le an chanpuol ding izir peiin tiem an na; chuong ang tak chun LALPAIN Mosie thu a pêk ang taka tiem an nih.