Read Hmar NAMBAR 6 Bible Online

NAMBAR 6 - Hmar bible

NAMBAR 6

¹LALPA chun Mosie a biek a,

²“Israel mipuihai kuomah hril la, an kuomah, ‘Pasal amanih, nuhmei amani khawma ieng amanih thutiem bîk, LALPA ta dinga inpêkna Nazarit thutiem ân tiem ding lai chun,

³uoin le zû a nghei ding a nih; uoin thûr amanih, zu thûr khawm a dâwn ding a ni nawh.

⁴Ân suktum sûng po chun grêp hruia mi a laimu khawm, a hâwng khawm a fâk ding a ni nawh.

⁵Insuktumna thu ân tiem sûng po chun a lu khawm vâw dêr lo ding a nih. LALPA ta dinga insuktum ni a kim hmakhat chun suktum nîng a ta, a sam khawm a hla ding a nih.

⁶LALPA ta dinga ân suktum sûng po chun mithi ruong khawm a hnai ding a ni nawh.

⁷A pa hai, a nu hai, a unaupa hai, a farnu hai amanih thi thua khawm ân sukpawrche ding a ni nawh. Pathien ta dinga ân suktumna chun a khuop leiin.

⁸“Ân suktum sûng po chun LALPA ta dinga inthieng a nih.

⁹A kâwlah mi hung thi ta thutin, ân suktumna lu chu lo sukpawrche ta ang sienla, a inthien ni, a ni sari ni chun a lu chu a vaw ding a nih.

¹⁰Chun, ni riet ni chun intuokna puon in kawtkhârah thiempu kuomah vaṭhu tuok khat amanih, pârvate tuok khat amanih a hung chawi ding a nih.

¹¹Thiempu chun pakhat chu suol thâwina dingin inhlân a ta, pakhat chu pumrawhmang thilinhlânah, mithi leia a suksuolnaa chun inremna siempêk a tih; chun, chu ni vêk chun a lu chu a sukthieng ding a nih.

¹²Thiemnaw thâwina dingin berâmte a chal kum khat mi hung chawiin ân suktumna nihai chu LALPA kuomah thaw ṭha nâwk a tih; ân suktumna chu sukpawrche a ni tâk leiin a hmaa mi kha iengkhawm a ni ta si naw a.

¹³Hi hi Nazarit mi, ân suktum ni bîk a kim phaa thaw dân ding chu a nih; intuokna puon in kawtkhâra chun ṭhuoi nîng a ta.

¹⁴Chun, LALPA ta dinga thilinhlân dingin berâmchal kum khat mi demkailo pumrawhmang thilinhlâna dingin pakhat, suol inthâwina dingin berâmte, a la, kum khat mi demkailo pakhat,

¹⁵inremna thilinhlân dingin berâmchal demkailo pakhat, chawl ṭhanglo bei le beiphit inditak hrieka hmeta siem beihlawm le hrieka chûl beiphêk inphân bâwm khat, an fâkmi thilinhlân ding le dâwnmi thilinhlânhai leh an inhlân ding a nih.

¹⁶Thiempu chun chuong chu LALPA hmaa chun inhlân a ta, a suol thâwina le pumrawhmang thilinhlân chu inhlân a tih.

¹⁷Berâmchal chu bâwma chawl ṭhanglo bei le chun inremna inthâwina thilinhlân dingin LALPA kuoma chun inhlân a tih. Thiempu chun fâkmi thilinhlân le dâwnmi thilinhlân khawm chu inhlân sa bawk a tih.

¹⁸Nazarit mi chun intuokna puon in kawtkhâra chun ân suktumna lu chu vâwng a ta, insuktumna sam chu lâng a ta, inremna inthâwi thilinhlân hnuoia meia chun a raw ding a nih.

¹⁹Chun, thiempu chun berâmchal dâr suong hmin le bâwma chawl ṭhanglo bei pakhat le chawl ṭhanglo beiphêk inphân pakhat lâng a ta. Nazarit mi chun ân suktumna lu chu a vâw zo chun inchawitir a tih; chun, thiempu chun thêna thilinhlân dingin LALPA hmaa chun a thên ding a nih.

²⁰Hi hi thiempu chanpuol inthieng chu nîng a ta, a thêna thên ir le a mal leh; chu zoa chun Nazarit chun uoin chu dâwn thei tâng a tih.

²¹Hi hi a nih Nazarit thutiem dân le LALPA hmaa an thilinhlân dân chu, ama nuomthua a înhlân tiem lovin, ân suktumna thutiem izir peiin a thaw ding a nih,’ ti rawh,” tiin.

²²LALPA chun Mosie a biek a,

²³“Aron le a naupasalhai kuomah, ‘Hieng ang hin Israel mipuihai chu mal in sâwm ding a nih, an kuomah,

²⁴LALPAIN malsâwm cheuin,vêng pei raw se cheu;

²⁵LALPA chun a hmêl in chungah invartir sienla, lunginsiet pei raw se cheu;

²⁶LALPA chu nangni tieng hung ngha sienla, lungmuongna pe raw se cheu, ti ro,’ tiin hril rawh.

²⁷Chuongchun, Israel mipuihai chunga chun ka hming chu inchuongtir nîng a ta, chun, keiin anni chu malsâwm ka tih,” tiin.