Read Hmar NAMBAR 9 Bible Online

NAMBAR 9 - Hmar bible

NAMBAR 9

¹ LALPA chun Aigupta rama inthawka an suok chen kum hnina thla khatnaah Sinai thlalêra chun Mosie a biek a,

²“Israel mihai chun Fekân ruoiṭhe chu a hunbi peiah nei raw se.

³A hunbiah, hi thla ni sâwmpali zântieng in nei ding a nih; chutaka thaw dinga ruot ang po po le, a dân ang po po chu in nei ding a nih,” tiin.

⁴Chuongchun, Mosie chun Israel mihai chu Fekân ruoiṭhe chu nei dingin a hril a.

⁵Chuongchun, Sinai thlalêra chun thla khatna ni sâwmpali ni zântieng fekân ruoiṭhe chu an nei ta a; LALPAIN Mosie thu a pêk ang po po chun Israel mihai chun an thaw a.

⁶Chun, tuhai amanih mithi ruong leia thieng naw an lo um a. Chu ni chun fekân ruoiṭhenaa chun an ṭhang ve thei naw a. Chuongchun, chu ni chun Mosie le Aron hmaa chun an fe a.

⁷Chuonghai chun a kuomah, “Mithi ruong leiin kan inthieng naw a ni ta a, iengleiin am Israel mihai laia a hunbia LALPA kuoma thilinhlân kan inhlân ding in mi khap a na?” an ti a.

⁸Mosie chun an kuomah, “Lo to ta u, in chungchâng thuah LALPAIN ieng angin am thu a pêk ding hang hre phawt ei tih,” a ta.

⁹LALPA chun Mosie a biek a,

¹⁰“Israel mihai kuomah, ‘Nangni laia mi khawm, in thlahai laia mi khawm, mithi ruong leia thieng naw amanih, lo thanghmang amanih an um hlau chun LALPA ta dinga Fekân ruoiṭhe chu an nei ve hrim hrim ding a nih.

¹¹Thla hnina ni sâwmpali ni zântieng an nei ding a nih. Chawl ṭhanglo bei hlohna kha leh an fâk ding a nih.

¹²A zînga dingin a iengkhawm an sie ding a ni naw a, a ru khawm an sukthliek ding a ni bawk nawh; Fekân ruoiṭhe thaw dinga ruot ang po po chu an thaw ding a nih.

¹³Amiruokchu, thieng si, thanghmangna khawm nei chuong lova Fekân ruoiṭhea ṭhang lo chu a chipuihai laia inthawk sât thlâk nîng a ta; a hunbia LALPA kuoma thilinhlân chu ân hlân naw leiin ama chun a suol maw chu phur a tih.

¹⁴Chun, hnam dang mi in kuoma umin, LALPA ta ding Fekân ruoiṭhea ṭhang ve a nuom chun Fekân ruoiṭhea thaw dinga ruot le a dân angin an thaw ding a nih; hi rama mi hrim hrim le hnam dang mihai ta dingin dân angkhat in nei ding a nih,’ tiin hril rawh,” a ta.

¹⁵Chuongchun, biekbûk indin ni chun biekbûk, inhriettirna puon in chu sûmin a tuom mup a, chun, zântieng chun biekbûk chunga chun meichawk ang el hi a zîng zîngkâr chenin a um a.

¹⁶Chuong ang chun a um zing a; sûm chun a tuom zing a, zâna chun mei angin ân lâng a.

¹⁷Sûmin puon in chu ân kiengsan po leh, Israel mihai chun fe zai an rêl hlak a; chun, sûm a ngirna hmuna phawt chun Israel mihai chun umhmun an khuor hlak.

¹⁸LALPA thupêkin Israel mihai chu an fe pei a, LALPA thupêk bawkin umhmun an khuor hlak a; biekbûk chunga sûm chu a um sûng po umhmun an khuor zing a.

¹⁹Biekbûk chunga sûm chu sâwttak a um chun Israel mihai chun LALPA thu chu an zâwm a, an fe ngai nawh.

²⁰A châng chun sûm chu biekbûk chunga chun sâwt nawtê chau a um hlak a; chuongchun, LALPA thupêk angin an fe hlak.

²¹A châng chun sûm chu zântienga inthawkin zîngtieng chen a um a; chun, zîngkâra sûm chu ân vawr sâng chun an fe hlak a; ni khat chau amanih, zân khat chau amanih uma sûm chu ân vawr sâng chun an fe el hlak a.

²²Biekbûk chungah sûm chu ni hni amanih, thla khat amanih, kum khat amani khawm a um chun, chutaka a um zing chun Israel mihai chun umhmun an khuor zing a, an fe ngai naw a; ân vawr sâng ruok chun an fe hlak.

²³LALPA thupêkin umhmun an khuor hlak a, LALPA thupêkin an fe hlak; Mosie hmanga LALPA thupêkin LALPA thu chu an zâwm a.