Read Hmar MIKA 3 Bible Online

MIKA 3 - Hmar bible

MIKA 3

¹Aw nangni Jakobhai hotuhai le Israel sûngkuo rorêltuhai; ngai unla, ka ngên cheu hi, ka ti a nih; rorêl dân chu in hriet ding an nâwm a nih?

²Thil ṭha in theida a, thil ṭha naw in ngaituo a, an vun in inhlippêk a, an rua inthawkin taksa chu in sâwkthlâk a,

³ka mihai sa in fâk bawk a, an vun an hîk thlâk a, an ru an suktliekpêk a; anih, bêla suong ding angin an chan nawi a, sabêl sûnga sa chan nawi ang elin.

⁴Chu pha chun LALPA chu ko an ta, nisienlakhawm, anni chu dawn naw nih: anih, chu pha chun an thil thawah an thaw ṭhat nawzie ang peiin, an kuom tieng a hmai thup a tih.

⁵Ka mihai insuksuoltirtu, sawi nei pumin, “Muongna,” tia khêk a, an baua inba naw taphawt do buotsai hieltu zâwlneihai chungchâng thu chu LALPAIN hieng ang hin a tih:

⁶Chuleiin, inlârna bo hiel dingin in kuomah zân hung tlung a ta, hrillâwkna um thei nawna khawpin in kuomah inthimna hung tlung a tih; zâwlneihai ta ding chun nisa liem a ta, sûn khawm an chunga chun khaw inthim nîng a tih.

⁷Hmutheituhai chu inzak an ta, aisânthiemhai chu muolpho an tih; anih, an rêngin an hmûr hup an tih; Pathien dawnna a um si naw a.

⁸Nisienlakhawm, Jakobhai kuoma an bawsietna inhriettir dingin le, Israelhai kuoma an suolna inhriettir dingin LALPA thlarau leia thilthawtheina dâm, rorêlna dâm le hrâtna dâm chun ka sip takzet a nih.

⁹Nangni Jakobhai sûngkaw hotuhai le Israel sûngkaw hotuhai le Israel sûngkaw rorêltu, rorêlna tirdaka, indikna tinrêng suklinglettuhai, hi hi lo ngai ro, ka ngên cheu hi.

¹⁰Zion chu thisenin an bâwl a, Jerusalem chu khawhlonain.

¹¹Chutaka hotuhai chun lâwmman beiseiin ro an rêl a, chutaka thiempuhai chun hlaw beiseiin an inchûktir a, chutaka zâwlneihai chun tangka beiseiin ai an sân a nih: Chuong sa khawm chun, “LALPA chu eini lai a um naw am a nih? Thil ṭha naw ei chungah hung tlung naw nih,” tiin LALPA chungah an innghat a nih.

¹²Chuleiin, Zion chu, nangni lei chun lo anga inlet nîng a ta, Jerusalem chu thil se um khâwm nîng a ta, biekin umna tlâng chu ramhnuoi hmun insâng ang nîng a tih.