Read Hmar MIKA 5 Bible Online

MIKA 5 - Hmar bible

MIKA 5

¹Aw sipai ruol naunu, tuhin sipai ruolah inpunkhâwm la, ama chun a mîn huol tah a na, Israelhai rorêltu chu a bekah hmawlin vuong an tih.

²Nisienlakhawm, nang Bethlehem Ephratha, Juda rama sâng tamtakhai laiah chun chîn hle la khawm, nangmaa inthawk hin Israelhai rorêltu ding chu ka ta ding hung suok a tih; a hung inṭanna chu tiena chatuona inthawk ta khan a nih.

³Chuleiin, nau invawitu chun a nei hmakhat chun anni chu nghatsan a tih: chuongchun, a unau la um sunhai chu Israel thlahai lai chun kîr nâwk an tih.

⁴Ama chu ngîr a ta, LALPA hrâtnain a ranruol chu châwm a tih: LALPA a Pathien hming ropuina ngei chun: chun, anni chu um zing an tih: ama chu hnuoi tâwp chenin a ropui ding a ni si a.

⁵Chun, hi hi ei inremna ding nîng a tih, Assuria mi chu ei ramah a hung a, ei lal inhai a hung sir pha chun ama do dingin berâmpu pasari le mi ropui pariet inthlangsuok ei tih.

⁶Assuria ram chu kâwlhnâmin suksieng an ta, Nimrod ram chu a lûtnaa chun sukse bawk an tih; chun, ama chun ei ramah Assuria mi a hung a, ei ram chu a hung sir pha chun, amaa inthawk chun mi sansuok a tih.

⁷Jakob mi la um sun chu chi tamtakhai laia LALPAA inthawka daidaw tla ang le, hlobet chunga raw sûr angin um a tih, chu chun mihriem a nghâk naw a, mihriem naupasal a nghâk bawk nawh.

⁸Jakob mi hlâbîkhai chu hnamhai laia le chi tamtakhai laia chun ramhnuoi sahai laia sakeibaknei ang le berâm ruol laia sakeibaknei vânglai angin um a tih; ama chun a fe thleng phawt chun, a sirde a, a keinâwi a, santu ding khawm tukhawm an um nawh.

⁹I kut chu nangma dotuhai chunga inletin um sienla, i hmêlmahai po po chu sukbohmangin um raw se.

¹⁰Chu nia chun, LALPAIN a tih, i kuoma inthawkin i sakawrhai sukbohmang ka ta, i tawlailîrhai suksieng ka tih:

¹¹i ram khawpuihai sukbohmang ka ta, i kul po po sukchim ka tih;

¹²i kuta inthawkin dawi thiemnahai chu sukbohmang ka ta, aisân thiemnahai chu nei ta naw ti ni;

¹³i kuoma inthawkin i milem siemfâwmhai le i lungphunhai chu sukbohmang ka ta; i kutsuok thil chu be ta naw ti ni.

¹⁴I kuoma inthawk i Aserahai chu phawidawk ka ta, i khawpuihai chu suksieng ka tih.

¹⁵Chun, thu ngai naw hnamhai chunga chun lunginthakna le lunginsennain phuba lâkna intlungtir ka tih.