Read Hmar NAHUM 2 Bible Online

NAHUM 2 - Hmar bible

NAHUM 2

¹Sukkawinâwitu chu i hmaihmaa chun a hung suok ie, kulbîng chu enkawl la, lampui chu vêng rawh, i kâwng chu sukngar la, i thilthawtheina chu hrâttakin siem ṭha rawh.

²Israelhai ropuina angin Jakobhai ropuina chu LALPA chun ân ngîr nâwk si a; sukruoktuhaiin anni chu an sukruok zo ta a, an grêp kauhai an suksiet zo ta si a.

³A mi hrâthai phaw chu a sen a, mi huoisenhai chu a sen inlârin an inthuom a, an inbuotsaina nia chun tawlailîrhai chu kâpathîr tlêtin a tle zawr zawr a, feihai chu râpthlâktakin ân lap zawk zawk a nih.

⁴Tawlailîrhai chu kawtthlêra chun an tlân bur bur a, lamlien lienhaia chun an insuk sawk sawk a, meiser angin an inlang a, kâwlinlep angin an tlân thuok thuok a nih.

⁵A mi lienhai chu a hrietsuok a, an fe inruol chu an pêm a; kul bang tieng pan chun an inhmawh a, thil phên ding an siem a.

⁶Vadung kawtkhârhai chu hawng a na, lal in chu sukramin a um a.

⁷Chun, Huzzab chu an hlîp a, an fe hmangpui a, a suoknuhai[1] chun an âwm inchumin vaṭhu inhrâm ang elin an ṭa a.

⁸Tienlaia inthawk tah Ninevi khuo hi dîl ang a na; amiruokchu, an tlân hmang a, “Ngîr ro, ngir ro,” tiin an ko a, nisienlakhawm, tukhawm an ngha kîr nawh.

⁹Tangkaruo râllâkhai chu lâkpêk unla, rângkachak râllâk sumhai chu lâkpêk ro; thil sêkkhâwl le thuomhnaw ṭha po po ropuizie chun tâwpintai a nei si nawh.

¹⁰Sukruokin a um a, sukrêm a ni a, suksiet dêr a nih, lungril chu ân tuihmang a, khûphai chu ân vuoktuo a, kâwng po po chu a na ngawi ngawi a, an rênga hmêl chu a dâng zo vawng a nih.

¹¹Tukhawm isukṭit lova an umna, sakeibakneichal dâm, sakeibakneipui dâm, an fe vêlna sakeibaknei bu zâwl le sakeibakneitehaiin an fâkna hmun chu khâw lai am a na?

¹²Sakeibakneichal chun a têhai khawp tâwk a keinâwi a, sakeibakneipuihai ta dingin a se hlum a, a pûkhai chu a sasein a suksip a, a bu zâwlhai chu saruong kei nâwiin.

¹³Sipaihai LALPA chun, “Ngai ta, ka do che a nih, i tawlailîrhai chu raw khu hlut hlut ka ta, i sakeibaknei têhai chu kâwlhnâmin bohmang an tih; chun, hnuoia i sase hi suktâwp ka ta, i palaihai râwl chu hriet ni ta naw ni,” a ta.