Read Hmar HABAKKUK 1 Bible Online

HABAKKUK 1 - Hmar bible

HABAKKUK 1

¹Zâwlnei Habakkukin chungrikna a hmu chu:

²Aw LALPA, ka ko chein, iengchen am, Ngai lova i um ding chu? “Inpâwngnêkna” tiin ka ko che a. I sandam naw el ding chu?

³Iengdinga suolnahai hi i mîn hmutirin, Iengdinga lungngaina hi i mîn entir am a na? Suksietna le inpâwngnêkna[1] chu ka hmaa hin a um a, Insuolna a um a, indona a hung suok hlak a nih.

⁴Chuleiin, dân chu a dul a, rorêlna chu a zîksuok thei naw a, Mi rilohai chun mi fel chu an inhuol vêl si a; Chuleichun, rorêlna chu a fe suol hlak a nih.

⁵Nangni hnamhai laia mihai, en ta u, Ngaisak unla, maktitakin ngaituo ro. Hril ni unla khawm in âwi nâw ding In hunahai hin sin ka thaw ding a nih.

⁶Ngai ro, Kaldaihai kân ngîr suok a nih, Hnam ti rawk rawk le khatak elhai chu. Anni chu, anni ta khawm ni lo umna hmunhai chu, Nei dingin hnuoi khang dâpin an hung a.

⁷Anni chu ṭium le pangzatumtak an na; Annia inthawk chun an rorêl le inlalna chu a fe suok a.

⁸An sakawrhai chu keitêhai nêkin an hrât lem a, Zântienga satenehai nêkin ṭi an um lem a nih; chapotakin an inân a; An sakawr chung chuongmihai chu hlataka inthawkin an hung a, Mupuiin hrâttaka sa a baw angin an vuong a.

⁹An rêngin pâwngnêk dingin an hung a, Khawsak thli ang elin an hmêlhai chun a ngerin an nger a, Salmanhai chu phaiphin angin an lâk khâwm a.

¹⁰Anih, lalhai chu an nuisan a, Mi lienhai chu an ta ding chun hmusitum an ni a, Kul det tinrênghai chu an nuisan a, pilvut a sungvûmin a lâk nâwk hlak si a.[2]

¹¹Thli angin an mût a, bâwthleng an ta, Thiemnaw changin um an tih, Anni thilthawtheina ngei pathiena neituhai chu.

¹²Aw LALPA ka Pathien, ka Mi Inthieng, Nang chu chatuona inthawk tah i ni nâwm a nih? Thi nâwng kan tih. Aw LALPA, ama chu rorêlna dingin i ruot a, Aw lungpui, nangin ama chu sukdikna dingin în ngîr a ni kha.

¹³Nang chu suolna hmûna hlak nêka mit inthieng lem nei i na, Khawhlona chu i en thei naw a nih, Chuleiin, khawhlotaka thawtuhai chu hmu zingin, Mi rilovin ama nêka mi fel lem a lem zo lai khawmin, Iengdinga i tosan ṭawk ṭawk am?

¹⁴Mihriemhai chu tuipui ngahai anga, Thilhring bawka invâk, an chunga rorêltu nei lohai Anga siemtu chu i ni nâwm a nih?

¹⁵Ama chun anni po po chu ngakuoiin a lâk a, A lênin a man tâwl a, A keihrui chun a hnûk khâwm a; Chuleichun, a hlimin a lâwm a nih.

¹⁶Chuongchun, a lên kuoma chun ân thâwi a, A keihrui kuoma chun riminhnik a raw a, Anni zâra a chan chu a hung thâu a, A bu chu a hung tam leiin.

¹⁷Chuleiin, a lên chu sukruok nâwk hlakin, Hnamhai that zing el chu a ma naw ding am a nih?