Read Hmar HABAKKUK 3 Bible Online

HABAKKUK 3 - Hmar bible

HABAKKUK 3

¹Sigionoth chunga zâwlnei Habakkuk ṭawngṭaina chu:

²Aw LALPA, i ṭawng ka hriet a,ka ṭi ta a; Aw LALPA, hieng kumhai sûng hin i sinthaw chu hung sukhar rawh. Kumhai laia hin hung inhriettir la, Lunginsennaa khawm zângaina chu hre zing rawh.

³Pathien chu Temana inthawkina hung a. Mi Inthieng chu Paran tlânga inthawkin. A ropuina chun vânhai chu ân khum a, Leihnuoi chu ân pâknain a sip a nih.

⁴A êngna chu var ang a na; A kuta inthawk chun varkêhai a hung suok a, A thilthawtheina inbîkna chu a um a nih.

⁵A hmaa chun hri chu a fe a; A kehaia inthawk chun meiling inling a fe suok a.

⁶A ngîr a, hnuoi chu ân hnîng a; Hnamhai chu a en a, a hnawt dar ta a; Kumkhaw tlânghai khawm chu sukdarin an um a, Chatuon muolhai chu an kûn bawk a; A lampuihai chu chatuona mi an nih.

⁷Kushan puon inhai chu sukrimsika a um lai ka hmu a; Midian ram puonzârhai chu ân thin a.

⁸LALPA chu vadunghai chungachun a lungawi naw am a nih? Vadunghai chunga chun i lunginsenna chu a umin, Tuipui chunga chun i lunginsenna chu a um am a nih? I sakawrhai chunga chun i chuongin, I sandamna sakawr tawlailîrhaia chun i chuong hi?

⁹I thalngul chu sukruok dêr ana; Thalhai chu a hruiah înbûk a,[4] Nang chun leihnuoi chu vadunghaiin i ṭhe ta a.

¹⁰Tlânghai chun an hmu che a,an ṭi a; Tui insawkhai khawm chu an fe hmang ta a; Li inthûk chun a râwl ânsuo a, A kuthai chu chungtieng a phar a.

¹¹Nisa le thla chu an umnaa chun an ngîr zing a, I thalhai kâp suoka umhai vara le, I fei tle zawr zawr vara chun.

¹²Lunginthakin ram chu i fethleng a, Lunginsenin hnamhai chu i chîl hrep a.

¹³I mihai sandamna dingin i fesuok a, I hriek nâl sandamna ding chun. Mi rilo sûngkuoa inthawk chun lu chu i sukhliem a, Ring chenin a lungphûm chu i suklang ta a.

¹⁴A indo mihai lu chu ama hmawl ngei chun i sunthleng a, Kei mi sukdar dingin thlivir angin an hung a: An hlimna chu mi rimsi arûka fâk hmang chu a nih.

¹⁵I sakawrhai le chun tuipui chu i chîl ta a, Tui nasatak umkhâwmhai chu.

¹⁶Ka hriet a, ka phîngsûng chu ân thin a, Ka hmûrhai chu râwlria chun ân thin hlawp hlawp a; Ka ruhaia chun hmawnna a hung lût a, chuongchun, ka hmuna chun kân thin a nih; Buoina nia chun châwl kata, Mipui, sipai pâwl anga mi rûntu chunga an hung tlung pha chun.

¹⁷Theichang kûng chu pâr naw sien khawm, Grêphruia chun a ra um naw bawk sien khawm; Oliv leia sin inrimna chu hung thlâwnin, Lohai chun bu insuo naw bawk hai sien; Berâm ruol chu a ina inthawka sât thlâka umin, Bâwng ina chun bâwng ruol khawm um naw bawk hai sien khawm,

¹⁸LALPAA chun hlim ka ta, Ka sandamna Pathiena chun lâwm ka tih.

¹⁹Lalpa, Jehova chu ka hrâtna a na, Ka kehai chu sazukpui kehai angin a siem a, Ama chun ka bâwlhmunhaia chun mîn fetir a tih.