Read Hmar ZEPHANIA 1 Bible Online

ZEPHANIA 1 - Hmar bible

ZEPHANIA 1

¹Juda lal Amon naupa Josia inlal laia, Hezekia naupa Amaria, chu naupa Gedalia, chu naupa Kusi naupa Zephania kuoma LALPA thu hung tlung chu.

²“Leihnuoi chunga inthawkin thil tinrêng chu sukbohmang vawng ka tih,” LALPA chun a tih.

³“Mihriem le sa khawm sukbohmang ka ta, chunglêng vatehai le, tuipuia ngahai le mi khawhlohai insuithlûktir ka ta; chun, sukbohmang vawng ka ta; chun, leihnuoi chunga inthawk hin mihriem chu tuithlâr ka tih,” LALPA chun a tih.

⁴“Juda le Jerusalema chênghai po po chunga chun ka kut phar ka ta; thiempuhai laia milim bie hmingput le, Baal milim la um sunhai chu hi hmuna inthawk hin pei thlâng ka tih;

⁵chun, inchung sîpa inthawka vâna thil umhai chibai bûktuhai le, Milkom hminga inkhâmtuhai le, LALPA hminga ṭawng inkhâma betuhai le;

⁶LALPA zuinaa hnungkîrtuhai le, LALPA chu zawng ngai lo a, ama chanchin khawm indawn ngai lohai chu sukbohmang ka tih.”

⁷Lalpa PATHIEN hmaihmaa chun to ṭhiep unla, LALPA ni chu a hnai ta hle si a: LALPA chun inthawina chu a buotsai ta a, a mikhuolhai khawm chu a hlânthieng ta si a.

⁸Chun, LALPA inthawina hun sûng chun mi lienhai le lal naupasalhai le ram dang incheinahaia incheituhai po po chu hrem ka tih.

⁹Chun, chu ni chun hlêmna le nunsietna leia an hotuhai in suksip hlaktuhai, hrizâwl chunga inchâwm hlakhai chu hrem bawk ka tih.

¹⁰Chun, chu ni chun nga kawtkhâra inthawk chun khêk ri nasatak um a ta, muolhaia inthawka kawihâwp ri nasatak le Misneha inthawka ṭap inrûm ri nasatak um bawk a tih, LALPAIN a tih.

¹¹Nangni Maktes hmuna chênghai, inrûm inrûm ro; Kanaan sumdâwngtuhai po po chu hmangna bo an ni ta a, tangkaruo bûk hlaktuhai po po khawm chu sukbohmang an ni ta si a.

¹²Chuong huna chun, Jerusalem chu khâwnvarhai sitin dap ka ta, mi an in kilkhâwrhaia chêng a, an lungrila, “LALPA chun thil ṭha thaw naw ni a, thil ṭha naw khawm thaw chuong hliek naw ni,” tituhai chu hrem ka tih.

¹³Chuongchun, an hausaknahai chu râllâk sum ang hung nîng a ta, an inhai chu râusan hung nîng a tih: anih, inhai chu bâwl hlak an ta chu, a hluo ruok chu hluo ngai naw ni hai a, grêphruihai khawm phun an ta, nisienlakhawm, chutaka a uoin chu dâwn dêr naw ni hai.

¹⁴LALPA ni ropuitak chu a hnai ta a, LALPA ni ri ngei chu a hnai ta a, a tlung ṭêp ân tah; chu huna chun mi thilthawtheitak chu rinumtitakin a khêk a nih.

¹⁵Chu ni chu lunginsenna ni, buoina le rinumna ni a na, sietna le sukrêmna ni, inthimna le lungzîngna ni, sûm zîngna le inthim sâmup ni,

¹⁶in insâng kilkhâwr takhai chunga le khawpui kul neihai chunga suklâuna le tawtawrâwt mût ni chu a nih.

¹⁷Chuongchun, mihriemhai chunga chun rinumna intlungtir ka ta, LALPA chungah thil an lo suksuol ta leiin mitdelhai angin lâwn an ta, an thisen chu pilvut anga bunthlâk nîng a ta, an taksahai chu êk ang elin.

¹⁸LALPA lunginsenna nia chun an tangkain amanih, an rângkachakin amani khawm sansuok thei naw ni a; amiruokchu, ram pumpui chu a thîkna mei chun kâng hmang a tih; tâwpna chu, anih, rama chêngtuhai po po tâwpna râpthlâktak el chu ân tlungtir vak ding a ni si a.