Read Hmar ZEPHANIA 2 Bible Online

ZEPHANIA 2 - Hmar bible

ZEPHANIA 2

¹Nangni le nangni inkei khâwm unla, anih, inkei khâwm ro, aw inzakna hre lo hnamhai;

²thupêk chu lâk suok a ni hma hin, busi anga ni chu a liem el hma hin, in chunga LALPA lunginsenna ṭiumtak a hung tlung hma ngei hin, in chunga LALPA lunginsenna a hung tlung ni hma ngei hin.

³Nangni a rorêlnahai anga thawtu, hnuoi chunga zainêm po pohai, LALPA chu zawng ro; felna chu zawng unla, zainêmna chu zawng ro; LALPA lunginsenna nia chun thupa in um theina dingin.

⁴Gaza chu mâksanin um a ta, Askelon chu râusanin, Asdod chu sûn changlai hnawt suok an ta, Ekron chu a zunga phawi dawk a ni ding a ni si a.

⁵Kereth hnam, tuipui kama chênghai chu an chung a va rik de! Aw Kanaan, Philistin mihai ram, LALPA thu chu nangma chungah a hung tlung a nih; Suksieng ka ti che a, a hluotu che um naw ni hai.

⁶Tuipui panghrûl chu ran ruolhai ta dinga inhai le, berâmpuhai ta dinga inhai umna hmun le ran ruol tlatna hmun hung nîng a tih.

⁷Chu vakam hrûl chu Juda sûngkuo a la um sunhai ta ding kha nîng a ta, chutaka chun an ran ruol chu intlattir tâng an ta, Askelon inhaia chun zânah riek an tih; LALPA an Pathien chun anni chu hung sir a ta, an sal intângna chu a hlîppêk ta ding a ni si a.

⁸Moab mihai hrilsietna le, Ammon thlahaiin an chierkhumnahai, ka mihai an hrilsieta an ramrihai ngeiah an vân suklien thu chu ka lo hriet a.

⁹Chuleiin, kei le kei insâlin, sipaihai LALPA, Israelhai Pathien chun a tih: “Matheilovin Moab chu Sodom ang hung nîng a ta, Ammon mihai chu Gomorra, chikhurhai hmun le zakthlai bil râusan kumkhuo ang chu hung nîng a tih. Ka mi a la um sunhai chun anni chu suksieng an ta, ka mi a la um sunhai chun hluong an tih.”

¹⁰Sipaihai LALPA mihai chunga chun anni chu an insuklienin, anni chu an lo hrilsiet ta leiin hi thil hi an chapopui dingin an hmu ding a nih.

¹¹An chunga chun LALPA chu ṭiumtak nîng a ta; hnuoi chunga pathienhai po po chu a sukbohmang ding a ni si a; chuongchun, mihriemhai chun ama chu be tâng an ta, mi tinin mâni hmun senga inthawk le, hnamhai po po chun mâni thlierkârhaia inthawk chun.

¹²Nangni Ethiopia mihai khawm ka kâwlhnâma sât hlum nîng in tih.

¹³Chun, ama chun hmârtienga chun a bân phar a ta, Assuria chu suksieng a ta; Ninevi chu râusan le thlalêr anga ṭâwlin siem a tih.

¹⁴A sûnga chun ran ruolhai riek an ta, ran chi tinrênghai chu: kaikuongrâl le saku chu, a khawpui laia chun riek an ta, an râwlhai chu tukvera inthawka hriet nîng a ta: sidar thinga remhai khawm chu a sukruok ta si a.

¹⁵Hi hi khawpui hlim, fîmkhur lotaka khawsa a, a lungrila, “Kei ka nih, kei naw chu tu dang khawm an um nawh,” titu chu: iengtiziea râusana umin ran ruol riekna hmun a hung ni el am a ni ta leh aw! tukhawm a fe khêl taphawt chun inhlîp an ta, an kut thinkhum an tih.