Read Hmar HAGGAI 2 Bible Online

HAGGAI 2 - Hmar bible

HAGGAI 2

¹A thla sarina, ni sâwmhni pakhat nia chun zâwlnei Haggai kuoma chun LALPA thu chu a hung tlung a.

²“Juda ram awptu Sealtiel naupa Zerubbabel kuoma le, Jehozadak naupa Josua, thiempu lal kuoma le, mipui la um sunhai kuoma chun hril la,

³‘Nangni lai hin hi in hi a hmaa a ropui lai kha hmu a dam tu am in la um a? Anleh, tuhin ieng ang charin am in hmu a? In mithmua chun iengkhawm ni lo ang a ni naw am a nih?

⁴Anachu, Aw Zerubbabel, tuhin insukhrât rawh,’ LALPA chun a ti a nih; LALPA chun, ‘Aw Josua, nang Jehozadak naupa thiempu lal, insukhrât la, a rama mi po pohai, insukhrât unla, sin chu thaw ro,’ a tih, nangni lai ka um si a, mipuihai LALPA chun a tih:

⁵Aigupta rama inthawka in hung suok laia in kuoma ka thuthlung thu anga khan in kuomah ka um a, ka thlarau chu nangni laia chêng zing a ni si a: ṭi dêr naw ro, LALPA chun a tih,” tiin.

⁶Sipaihai LALPA chun hieng hin a ti si a: Vawikhat chu, sâwt nawtêah, vânhai le hnuoi le, tuipui le ram ṭâwl chu sukhnîng ka ta;

⁷hnam po pohai chu sukhnîng ka ta; hnam tin thil duthusâmhai chu hung tlung a ta, chun, hi in hi ropuinain suksip ka tih, sipaihai LALPA chun a tih.

⁸Tangka chu ka ta a na, rângkachak khawm chu ka ta a nih, sipaihai LALPA chun a tih.

⁹Hi in hi, hi hnungtienga a ropuina chu a hmasa nêk khan la nasa lem a tih, sipaihai LALPA chun a tih: chun, hi hmuna hin inremna chu la pêng ka tih, sipaihai LALPA chun a tih.

¹⁰Daria inlal a kum hninaa, thla kuona ni sâwmhni pali ni chun zâwlnei Haggai kuomah LALPA thu chu a hung tlung a,

¹¹“Sipaihai LALPA chun hieng hin a tih. Thiempuhai chu hi dân thu hi indawn la,

¹²‘Miin a silfên puonhmawrin sa inthieng a pai a, chu puonhmawr chun bei amanih, thil suonghruoi amanih, uoin amanih, hriek amanih, sa amani khawm a tâwk chun inthieng a hung ni ding am a nih?’ ti hi,” tiin. Chuongchun, thiempuhai chun an dawn a, “Ni lo e,” an ta.

¹³Chun, Haggai chun, “Mi sa thi ruong leia inthieng naw chun hieng thil a iengkhawm hi tâwk sienla, thieng naw a ni ding am a ni”? a ta. Thiempuhai chun, “Thieng naw a ni ngei ding a nih,” tiin an dawn a.

¹⁴Chun, Haggai chun a dawn a, “Hi mipui hi chuong ang chie chu an na, hi hnam hi ka hmaa chun chuong ang chie chu an nih,” sipaihai LALPA chun a tih; “An kut sinthaw tinrêng khawm chuong ang chu a na, an thilinhlâna chun thieng lo a um a nih.

¹⁵Chuleiin, Vawisuna inthawkin fimkhur takin ngaituo ro, LALPA biekina lung chunga lung intieng a ni hma hun hai kha;

¹⁶khânglai sûng hrim hrim khan, miin tekhâwng sâwmhni vûma a ruota chun sâwm chau a lo na: miin sâwrna khura bûr sâwmnga thâl dinga a hung chun sâwmhni chau a lo na.

¹⁷In kut sinthawnahai po poa chun riel le kumthu le ṭêk tlain ka hrem cheu a, anachu ka kuom tieng in la hung ngha naw rawp el hi,” LALPA chun a tih.

¹⁸“Ka ngên cheu hi, vawisûna inthawka hi hnungtieng po po ngaituo ro; thla kuona, ni sâwmhni pali ni, LALPA biekin lungphûm phûm ni china inthawk chu ngaituo ro.

¹⁹Bu ina chun a chi chu a la um rawp am a nih? Grêphrui dâm, theichang kûng dâm, theibufai dâm, oliv thinghai le chun ra an insuo ngai naw a; vawisûna inthawk hin chu mal ka sâwm ding cheu a nih,” tiin. Zerubbabel kuoma Lalpa thutiem

²⁰Chu thla, ni sâwmhni pali ni chun LALPA thu chu a vawi hninaah Haggai kuomah a hung tlung nâwk a,

²¹“Zerubbabel, Juda chunga rorêltu kuoma chun hril la, ‘Hnuoi le vânhai chu sukhnîng ka ta:

²²ramhai lalṭhungpha khawm chu pei thlâng ka tih; chun, hnamhai lalram hrâtna chu sukse bawk ka tih; chun, tawlailîrhai chu pei thlâng ka ta, a chunga chuongtuhai le chun; sakawrhai le a chunga chuong, mi tin chu mâni unau kâwlhnâm ngeia suktlâwm ni tâng a tih,’ tiin.

²³‘Chu nia chun, Aw Zerubbabel ka siehlaw, Sealtiel naupa, chel ka ti che,’ sipaihai LALPA chun a tih; ‘nang hi inchikna namna angin siem ka ti che,’ LALPA chun a tih; ‘nang hi ka lo thlang ta si che a,’ sipaihai LALPA chun a tih ” tiin.