Read Hmar ZEKARIA 10 Bible Online

ZEKARIA 10 - Hmar bible

ZEKARIA 10

¹LALPA kâwlinlephai siemtu ngei chu, LALPA kuoma chun ruo nuhnung huna hin ruo ngên ro; chun ama chun ruopui sûr chu pêng a tih, loa thlaihna tin kuoma chun.

²Milim chun teplo mei mei a hril a, a lo dawngtuhai khawm chun khêl thu chu an hmu si a; manga mangtuhai khawm chun khêl mei mei an mang a, a thlâwn elin an insukthlamuong a nih; chuleiin, berâm angin anni lampui chu an hraw a, sukrimsikin an um hlak, berâmpu a um naw leiin.

³Berampuhai chunga chun ka lunginsenna chu a chawk a, kêlchalhai chu ka hrem ngei ding a nih; sipaihai LALPA chun a berâmruol Juda sûngkuohai chu a hung sir ta a, indonaa sakawr ṭhatak angin a siem ngei ding a nih.

⁴Amaa inthawkin a kia lung dâm, amaa inthawkin a kilna dâm, amaa inthawkin indona thalngul dâm, amaa inthawkin rorêltu dâm an hung suok tlâng vawng ding a ni si a.

⁵Chun, indona chun an hmêlmahai chu kawtthlêra chirhak chîl anga chîlin mi thilthawtheitakhai hung nîng an ta, LALPA chu an kuomah a um zing leiin, anni chu do an tih; chun, sakawr chunga chuong mihai khawm chu sukhamhaiin um an tih.

⁶Chun, Juda insûng chu hung sukhrât ka ta, Josef insûng chu sandam ka tih; chun, anni chu hung ṭhuoi kîr nâwk ka tih, an chungah lunginsietna ka nei si a; chun, anni chu ka lo pei thlâk naw ang hrimin um tâng an tih; chun, an thu chu ngai bawk ka ta, LALPA an Pathien ka ni si a.

⁷Chun, Ephraimhai kha chu mi thilthawtheitak ang nîng an ta, uoin leiin an lungril chu hlim a tih; anih, an thlahai chu hmûng an ta, lâwm an tih; an lungril khawm chu LALPAA chun lâwm bawk a tih.

⁸An ta dingin faifûk ka ta, anni ko khâwm ka tih; anni chu kân tlan ta si a; a lo pung ta ang bawk khan hung insukpung an tih.

⁹Chun, anni chu mipuihai laia chun tûng ka ta; ram hlataka khawm mi hre zing an tih; chun, an nau le têhai leh um an ta, hung kîr nâwk an tih.

¹⁰Aigupta rama inthawk khawmin anni chu hung ṭhuoi suok nâwk ka ta. Assuria rama inthawkin la khâwm nâwk ka tih; Gilead le Lebanon rama chun ṭhuoi lût ka ta; an ta dinga hmun indai naw hielin.

¹¹Chun, ama chun sukrinumna tuipui chu fe thleng a ta, tuipui fâwnhai chu vuok hnuoi ning a ta. Nile li inthûkhai po po khawm chu kang intan a tih; chun, Assuria chapona chu sukhnuoi nîng a ta, Aigupta lalhmawl chu fe hmang tâng a tih.

¹²Chun, anni chu LALPAA chun sukhrât ka ta, chun, ama hmingin a suk a tungin fe tâng an tih, LALPA chun a tih.