Read Hmar ZEKARIA 11 Bible Online

ZEKARIA 11 - Hmar bible

ZEKARIA 11

¹Aw Lebanon, i kawtkhârhai hawng rawh, I sidar thinghai chu meiin a kâng hmang theina dingin!

²Aw fâr thing, inrûm rawh, sidar chu a tlu leiin; A ṭhatakhai chu suksiet an ni ta si a! Basana thingsaisuohai, inrûm ro, Ramhâk chu a chau ta si a!

³Berâmpuhai inrûm ri chu e, An ropuina suksiet a ni ta si a! Chu, sakeibaknei vânglai inrûm râwlri chu! Jordan ramngaw chu suksiet a ni ta si a.

⁴LALPA ka Pathien chun hieng ang hin a tih, “Sathattu berâm ruol chu châwm rawh,

⁵ân chawtuhai chun anni chu an that a, anni chu suolah an inngai naw a; chun, anni zawrtu khawm chun, ‘LALPA chu inpâkin um raw se, ka hausa si a’, an ta; an berâmpuhai ngei khawm chun anni chu an lunginsiet nawh.

⁶Ram hluotuhai chu ka lunginsiet ta naw ding a ni si a, LALPA chun a tih; nisienlakhawm, en ta, mihai chu, mi tin el chu mâni tuolbâwmhai kutah pêng ka ta, an lalhai kuta leh; chun, ram chu thâwng an ta, an kuta inthawk chun anni chu sansuok naw ningah,”tiin.

⁷Chuongchun, sathattu berâm ruol chu ka châwm a, berâm ruol chautak el nang chu. Chun, hmawl pahni ka lâk a, pakhat chu Ditsak kân bûk a, a dang chu Pumkhatna kân bûk a; chun, berâm ruol chu ka châwm ta a.

⁸Chun, thla khat sûngin berâmpu pathumhai chu ka pei thlâk a; ka lungrilin anni chu a nghawk a, anni lungril khawma kei an mi nghawk bawk si a.

⁹Chun, kei chun, “Châwm ta naw ning cheu, a thi thi chu thi sienla; pei thlâka um um chu pei thlâkin um sienla; a la damhai khawm chun anni le anni sa chu infatuo raw hai seh,” ka ta.

¹⁰Chun, ka hmawl Ditsak chu ka lâk a, ka sât bawng ta a, hnamhai po po le ka thuthlung ka siem chu ka sût theina dingin.

¹¹Chuongchun, chu ni chun sût a lo ni ta a, chuongchun, berâm ruol, nang kei mi pawisatu chun LALPA thu a nih ti i hriet a.

¹²Chun, an kuoma chun, “In ngaia a ṭha chun ka hlaw chu mi pe unla, a ni naw chun, hrên el ro,” ka ta. Chuongchun, ka hlaw ding chun tangka sâwmthum an bûk ta a.

¹³Chun, LALPA chun ka kuomah, “Sum bâwmah the lût el rawh, man ṭhatak, annia ka man hi,” a ti a, chuong tangka sâwmthum chu ka lâk a, LALPA ina sum bâwma chun ka the lût ta a.

¹⁴Chun, ka hmawl dang pakhat Pumkhatna chu ka sât bawng nâwk a, Juda le Israel inkâra inunauna chu ka suktan theina dingin.

¹⁵Chun, LALPA chun ka kuomah, “Berâmpu invêt hmangruohai kha la la nâwk rawh.

¹⁶En ta, rama chun Berâmpu pei thlâka umhai chu kankuo ngailo ding le, sukdara um chu zawng ngailo ding le, suktlieka um khawm chu sukdam ngailo ding chu, ka tungding nâwk ding a ni si a; ama chun a hliem le a hrisêl khawm chu châwm chuong naw ni a, a thâu thâu sa chu fa lem a ta, an tinhai chu nawi tamtakin kei nawi a tih,” a ta.

¹⁷Berâmpu, berâm ruol mâksantu chung chu a va rik de! Kâwlhnâm chu a kut chunga chun um a ta. A mit changtieng chunga leh; A bân ṭâwl zo vawng a ta, A mit changtieng khawm chu inthim tlat a tih!