Read Hmar ZEKARIA 12 Bible Online

ZEKARIA 12 - Hmar bible

ZEKARIA 12

¹Israel chungthua LALPA thu phurrik chu, Vânhai chu keiphar a, leihnuoi lungphûmhai chu phûm a, mihriem chu a sûnga a thlarau siempêktu LALPA chun hieng hin a tih:

²“Ngai ta, a vêla hnamhai po po ta dingin Jerusalem chu inthinna noah siem ka ta, chun, Juda chunga khawm, Jerusalem inhuol nia chun chuong ang chu nîng a tih.

³Chu nia chun hieng hi hung nîng a ta, hnam po pohai ta dingin Jerusalem chu lung phurriksakah siem ka ta, chuonga amaa insukriktuhai po po nasataka sukhliem nîng an ta; chuongchun, hnuoi chunga hnam po pohai a chunga chun inhâwrkhâwm an tih,” tiin.

⁴LALPA chun a tih, “Chu nia chun sakawr tin chu maktinain hrem ka ta, a chunga chuongtu chu invêtnain; chun, Juda insûng chunga chun ka mit meng ka ta, hnam tin sakawr chu mit indelnain hrem ka tih.

⁵Chun, Juda lalhai chun an lungrilin, ‘An Pathien sipaihai LALPAA chun Jerusalem hluotuhai chu ka hrâtna an nih,’ la tîng an tih.

⁶“Chu nia chun Juda lalhai chu thing laia mei thuk ang le, buphal laia meiser angin siem ka ta; vawitienga le changtienga, an vêla hnam po pohai chu sukbo an ta; chun, Jerusalem chu ama hmun Jerusalema ngei chun a la chêng ding a nih,” tiin.

⁷LALPA chun a hmasatakin Juda puon inhai khawm chu sanhim a ta, David sûngkaw ropuina le Jerusalem hluotuhai ropuina chu Juda chungtienga chawimawia a um nawna dingin.

⁸Chu ni chun LALPA chun Jerusalem hluotuhai chu hliekhûng a ta, chu nia anni laia hrât naw chu David ang nîng a ta; chun, David sûngkuo chu Pathien ang, an hmaa LALPA vântirko ang chu nîng a tih.

⁹Chun, chu nia chun Jerusalem hung thawtu hnam po pohai chu suksietna ding zawng vêng ka tih.

¹⁰Chun, David sûngkaw chunga le, Jerusalem hluotuhai chunga chun zângaina le hni châkna thlarau buok ka ta, kei an mi sun tahnung chu mi en an tih; miin a nau khât ta dinga an sûn hlak angin ama chu sûn an ta, miin a nau lutîr chu nasataka a tuorpui hlak angin nasatakin tuorpui an tih.

¹¹Chu ni chun, Megiddo ruoma Hadad-rimmon ṭa angin, Jerusalema chun nasataka sûnna um a tih.

¹²Ram chun sûngkaw tinhai chu a tum sengin sûn a tih; David sûngkaw pahnam chu a tumin, an nuhmeihai khawm a tumin; Nathan sûngkaw pahnam chu a tumin, an nuhmeihai khawm a tumin;

¹³Levi sûngkaw pahnam chu a tumin, an nuhmeihai khawm a tumin; Simei sûngkaw pahnam chu a tumin, an nuhmeihai khawm a tumin;

¹⁴sûngkuo po po a umhai chu, sûngkaw tin chu a tumin, an nuhmeihai khawm a tumin.