Read Hmar ZEKARIA 14 Bible Online

ZEKARIA 14 - Hmar bible

ZEKARIA 14

¹Ngai ta, LALPA ni chu a hung tlung ie, nangmaa inthawka râllâk sum i sûnga an insem ni ding chu.

²Jerusalem chu do dingin hnam po po chu ka kei khâwm ding a ni si a; khawpui chu lâk nîng a ta, inhai chu kâpkhumin um an ta, nuhmeihai chu ṭhuoi hmangin um an ta, chun, a khawpui chenve zet chu salah fêng an ta, mi la um sunhai ruok chu khawpuia inthawka sât thlâk ni naw ni hai.

³Chun, LALPA chu fe suok a ta, indona nia a do angin, chuong hnamhai chunga chun do a tih.

⁴Chu nia chun a kehai chu Oliv tlânghai, Jerusalem sak ela umhai chunga chun ngîr a ta, chun, Oliv tlânghai chu a laia chun saktieng le thlangtienga chun kakintan a ta, chuongchun, ruom nasatak hung um a tih; chun, chu tlâng chenve chu hmârtieng insawn a ta, a chenve dang chu simtieng insawn a tih.

⁵Chun, ka tlâng kâra ruomah chun tlânsieng in ta; tlâng kâra ruom chun Azel a tlung rak ding a ni si a: anih, Juda lal Uzzia inlal laia simkhawleihnuoi inhnînga in tlânsiet ang khan, tlânsieng in tih; chun, LALPA ka Pathien chu hung a tih, a kuoma mi inthienghai po po leh.

⁶Chu ni chun a var khawm chu var ta naw ni a, inthim lem tâng a ta;

⁷amiruokchu, ni khat, LALPA ihriet chu um a tih; sûn khawm ni naw ni a, zân khawm ni naw bawk a tih, amiruokchu, zântieng huna hin var chu hung um a tih.

⁸Chun, chu nia chun tui hringhai Jerusalema inthawkin hung suok a ta; a chenve chu saktieng tuipuiah, a chenve chu thlangtieng tuipui-ah, nipui lai le thlasik huna khawm a ni ding a nih.

⁹Chun, LALPA chu leihnuoi po po chunga laltak ni tâng a ta, chu nia chun LALPA chu pakhat nîng a ta, a hming khawm pakhat chau nîng a tih.

¹⁰Ram po po chu Araba, Gebaa inthawka Jerusalem sima Rimmon tienga a lêtkîr angin inher tâng a ta; chun, Jerusalem chu chawisângin um a ta, ama hmun ngei, Benjamin in kawtkhâra inthawka kawtkhâr hmasatak, kul kil kawtkhâr chen le, Hananel in insânga inthawka lal uoin sâwrna khur chenin, chang tâng a tih.

¹¹Chun, mihai chu a sûnga chun chêng an ta, ṭawngsie hrim um ta naw ni a; Jerusalem chu himtaka hluo ni lem tâng a tih.

¹²Chun, hihi Jerusalem dotu hnam po pohai LALPAIN a hremna ding hri chu nîng a tih; an kehaia an ngîr zing laiin an taksa chu hung hmawn hmang a ta, an mithai chu an mitkhurhaia chun hung hmawn hmang a ta, an leihai khawm chu an bauah hung hmawn hmang a tih.

¹³Chun, chu ni chun LALPAA inthawka buoina nasatak el chu anni lai chun um a tih; mi tinin mâni tuolbâwm kut chu chel an ta, a kut chu a tuolbâwm kut chunga chun inlet nîng a tih.

¹⁴Chun, Juda khawm chun Jerusalem chu do tâng a ta; kil tina hnam po pohai hausakna; rângkachak dâm, tangka dâm, silfên dâm nasataka tam lâk khâwm nîng a tih.

¹⁵Chun, hi hri ang bawk hin, chuong puon inhaia um ran po pohai, sabengtung dâm, sanghâwngsei dâm, sabengtung lien chi dâm, sakawr dâm hri chu chuong ang bawk chun um a tih.

¹⁶Chun, Jerusalem hung thawtu hnam po pohaia a la um sunhai chu kum tin tinin laltak, sipaihai LALPA chu be ding le, Bâwkte ruoiṭhe chu nei dingin hang fe rawp hlak an tih.

¹⁷Chun, leihnuoia hnamhai po po tukhawm Laltak, sipaihai LALPA chu be dinga Jerusalema hang fe nawhai chunga chun ruo sûr naw ni.

¹⁸Aigupta hnam khawm chu a hang fe naw a, a hung naw chun, an chungah sûr bik naw ni a, bâwkte ruoiṭhe nei dinga hang fe nawhai hnam LALPAIN a hremna hri chu an chungah um a tih.

¹⁹Hi hi Aigupta ram hremna chu nîng a ta, bâwkte ruoiṭhe nei dinga hang fe naw hnamhai ta dinga hremna ni bawk a tih.

²⁰Chu nia chun sakawr dârṭhihai[2] chunga chun, “ LALPA TA DINGA INTHIENG,” ti um tâng a ta, LALPA ina bêlhai khawm chu mâichâm hmaa maihûnhai ang ni tâng a tih.

²¹Anih, Jerusalema bêl tinhai le, Juda rama bêl tinhai chu sipaihai LALPA ta dinga inthieng ni vawng tâng an tih; chun, mi inthâwihai po po chu hung an ta, hung lâng an ta, chu chun suong an tih; chun, chu nia chun sipaihai LALPA ina chun Kanaan[3] mi ti bîk khawm um ta naw nih.