Read Hmar ZEKARIA 7 Bible Online

ZEKARIA 7 - Hmar bible

ZEKARIA 7

¹Chun, Daria inlal kum linaa chun, Kisleu, thla kuona ni li ni chun Zekaria kuomah LALPA thu chu a hung tlung a.

²Chuong lai chun, Bethel mihai chun Sarezer hai, Regemmelek hai, an mihai leh LALPA ditsakna zawng dingin le,

³sipaihai LALPA thiempuhai kuoma le zâwlneihai kuoma chun, “Kum khâng chena ka lo thaw ta hlak ang khan, keima chu insuktumin, thla kuonaa hin ka ṭap ding am a nih,” tia indawn dingin an tir a.

⁴Chun, sipaihai LALPA thu chu ka kuomah a hung tlung a,

⁵“Hi rama mi po pohai le thiempuhai kuoma chun hieng ang hin thu hril rawh, ‘Hi kum sâwmsari sûnga thla sarina le thla nganaa bu in ngheia in insuklungngai hin, keia kuoma, keima kuom ngeia bu nghei am in ni ngût le?

⁶In fâk a in dâwn lai khawmin in ta dingin in fâkin in dâwn ni lo am a nih?

⁷Hausakna le Jerusalem le a vêla khawpuihai le Simtieng le ramphaihai chu hluo a ni laia, zâwlnei hmasahai hmanga LALPAIN thu a khêkpuihai chu in ngai naw ding am a nih?’ tiin,” a ta.

⁸Chun, Zekaria kuoma chun LALPA thu chu a hung tlung a, “Sipaihai LALPA chun hieng ang hin thu a hril a nih:

⁹Rorêlna ṭha chu suksuok unla, mi tinin mâni unau chungah zângaina le lunginsietna inlangtir raw se;

¹⁰hmeithai amanih, fahrâ amanih, mikhuol amanih, mi pasie amani khawm chu nêksâwr naw unla, chun, nangni tukhawma mâni unau chungah a lungrilin thil suol suongtuo naw raw se,” tiin.

¹¹Nisienlakhawm, an pawisa nuom naw a, an liengko an herhmang a, an hriet nawna dingin an nahai an suksêt a.

¹²Anih, an lungrilhai chu lungthîr angin an siem a, chuong ni naw sien chu dân le inhmaa zâwlneihai hmanga a thlaraua sipaihai LALPAIN a pêk thuhai chu an hriet ta ding bah; chuleiin, sipaihai LALPAA inthawka lunginsenna nasatak chu a hung tlung ta a.

¹³Chun, ama a khêk laiin an ngai naw a; chuongchun, anni chu khêk an ta, kei khawma ngai naw ningah, sipaihai LALPA chun a tih.

¹⁴amiruokchu, an la hriet ngailo hnam po po laia chun thlivirin anni ka sukdar ta a. Chuongchun, ram chu râusanin a um ta a, tukhawm an fe thlengin an kîr nâwk ngai ta naw a: ram duthusâm tak chu râusanah an siem ta leiin.