Read Hmar MALAKI 1 Bible Online

MALAKI 1 - Hmar bible

MALAKI 1

¹Malaki hmanga Israel chunga LALPA thu phurrik chu.

²LALPA chun, “Ka hmangai cheu a, nangni ruok chun, ‘Khaw lai am i mi hmangai a?’ in la ti rawp a,” a ta. LALPA chun, “Esau chu Jakob unaupa a ni naw am a nih? Jakob chu ka hmangai a,

³Esau ruok chu ka theida a, a tlânghai chu râusanin ka siem a, a rochan chu thlalêr sihalhai kuomah ka pêk kha,” a ta.

⁴Edom mihai chun, “Hnein ei um ta ngeia chu, kîr nâwk ei ta, hmun se tahai chu siem ṭhâng ei tih,” ti hai sien khawm; sipaihai LALPA chun hieng hin a tih, “Bâwl an ta chu, kei thlûng ka tih: chun, mihai chun anni chu, ‘Khawhlona ram le, kumkhuoa an chunga LALPA lunginsenna zing zing hnam,’ tîng an tih.

⁵In mithaiin hmûng in ta, ‘Israel ram khêl chena khawm LALPA chu chawimawiin a um tah a ni hi,’ tîng in tih,” tiin.

⁶Sipaihai LALPA chun in kuomah a hril a, “Aw thiempu, ka hming hmusittuhai, naupa chun a pa ân za a, siehlaw chun a hotu: chuonga pa ka ni chun, khâw lai am inza ka nina? Hotu ka ni chun, khâwlai am ṭi ka nina? Nangni chun, ‘Khâwlai am i hming chu kan hmusit a?’ in ti a.

⁷Ka maichâm chunga khan bei sukpawrche tah in inhlân a; chun, nangni chun, ‘Khâwlai am kan sukpawrche che a?’ in ti a. Chuong chun, LALPA maichâm chu hmusitumah in siem a nih.

⁸Inthâwina dinga a mitdel in inhlân khan, suol a ni naw am a ni? A damnaw le a kebai in inhlân khan, suol a ni naw am a ni? In rorêltu kuomah va pe hrim ta u, a lo lâwm hrim cheu am? Annawleh, in mi nina chu a lo pawm ding am a nih? sipaihai LALPA chun a tih.

⁹Nisienlakhawm, tuhin, ei chungah zâ a ngai theina dingin LALPA ditsakna chu ngên ro; hi hi in kut thilthaw ngei chu a na, ditsak takin a lo pawm ding cheu am a nih? sipaihai LALPA chun a tih.

¹⁰Nangni laia mi pakhat bêk, ka maichâma a thlâwna mei a sêm nawna dinga kawtkhârhai khâr hlak chu um unla chu aw! sipaihai LALPA chun a tih, nangnia hin lâwmna hrim ka nei naw a nih; in kuta thilinhlân hrim hrim khawm lâwm naw ningah.

¹¹Nisa suoknaa inthawka a tlâkna chenin Jentailhai lai hman ka hming hi a ropui a na; hmun tinahai chun riminhnik dâm ka hminga inhlân a na, thil inthieng inhlân leh; Jentailhai lai hman ka hming chu a ropui si a, sipaihai LALPA chun a tih.

¹²Amiruokchu, in bawsiet a, chutaka chun, ‘LALPA dawkân chu sukpawrche a ni ta a, chutaka a theirahai khawm chu; chun, a buhai ngei khawm chu hmusitum a ni tah,’ in ta.

¹³Chun, ‘Ngai ta u, nghawk a va um ngei de!’ in ta, in hnâr in hnâwtkhum a, sipaihai LALPA chun a tih. Chun, pâwngnêka lâk chu in hung lâk a, a kebai ruol, a damnaw ruol leh; chuong ang chun thilinhlân chu in hung lâk a na, hi in kut thilthaw hi ka pawmpêk ding cheu am a nih? sipaihai LALPA chun a tih.

¹⁴Amiruokchu, a berâm ruol lai a chal, tiemkam sa tah neia, LALPA kuoma demuma inthâwi a, hlêmtu chu ṭawngsephurin um raw se: lal ropuitak ka ni si a, ka hming khawm Jentailhai kuom chena khawm ṭi a um a nih, sipaihai LALPA chun a tih.