Read Hmar MALAKI 2 Bible Online

MALAKI 2 - Hmar bible

MALAKI 2

¹“Tuhin, aw nangni thiempuhai, hi thutiem hi in ta ding a nih.

²In ngai a, ka hming sukropui dinga, in lungrila in sie tlat naw chun, Sipaihai LALPA chun hieng hin a tih, in chunga chun ṭawngsie hung tir ka ta, in malsâwmnahai chu ṭawngsie inphur ka tih; anih, lungrila in sie tlat naw leiin, ṭawngsie kân phur nghâl tah a nih.

³Ngai ta u, nangni leiin chu chi chu kâwk ka ta, in inthâwina êkhai chu in hmaihai chunga chun thêng ka ta, chun, a chu le chun nangni chu lâk hmangin um in tih.

⁴Ka thuthlung chu Levi kuoma chun a um theina dingin, hi thupêk hi in kuomah ka hung pêk a nih ti hre tâng in tih, sipaihai LALPA chun a tih.

⁵Ka thuthlung chu ama ta ding chun hringna le muongna a na; a ṭi theina ding le, ka hming a ṭina ding le, ka hming ṭiha a ngîr theina dingin a kuoma chun ka pêk a nih.

⁶Thutak dân chu a baua chun a um a, fel nawna chu a hmûrhaia chun hmu a ni hrim hrim nawh; tluongtak le kei le inremin a khawsa a, mi tamtak chu khawhlonaa inthawkin ân her hmangtir tah a nih.

⁷Thiempu hmûrhai chun hrietthiemna a vawng ding a na, a baua inthawk chun miin dân chu an zawng ding a ni si a: ama chu sipaihai LALPA mitir chu a ni si a.

⁸Amiruokchu, nangni chu lampuia inthawk chun in pêt hmang a, mi tamtak chu dâna chun in insuithlûktir a; Levi kuoma thuthlung chu in suksiet tah a nih, sipaihai LALPA chun a tih.

⁹Chuleiin, nangni khawm mi po po hmaa chun hmusitum le inhnuoiin ka lampuihai in hraw naw ang zûl peiin ka siem cheu a nih; dâna chun mi thlierbîk in lo nei ta si lem a,” tiin.

¹⁰Pa hmunkhat seng ei ni naw am a nih? Ei Pathien chun a mi siem seng a ni naw am a nih? Ei thlatuhai thuthlung chu bawsea, iengdinga mi tinin mâni unau chungah khawhlotaka ei thaw am a na?

¹¹Juda chun khawhlotakin a lo thaw ta a, Jerusalem le Israel lai khawm chun tirdakumna chu thaw a lo ni ta a;Juda chun LALPAIN inthiengna a hmangai chu a lo sukpawrchein, pathien danglam naunuhmei chu a lo nei ta a.

¹² LALPA chun hi thil thawtu, inchûktirtu le a închûktir chu, Jakob puon ina inthawk sât thlâng a tih, sipaihai LALPA kuoma thilinhlânhai inhlântua inthawk le chun.

¹³Chun, hi khawm hi in thaw nâwk bawk a, LALPA maichâm chu mitthli le, ṭapna le, thuokdawngnain in inkhum a, chuong lei chun thil inhlân chu a ngaisak ta nawin, in kuta inthawkin ṭhain a pawm ta naw hrim hrim a nih.

¹⁴Nangni chun, “Ieng leiin am ie?” in la ti ta rawp a, I thuthlung nuhmei le i kawppui ni sien khawm, a chunga khawhlotaka i lo thaw tah, i tleirâwl lai nuhmei le nanga kâra chun LALPA chu thuhretu a ni si a.

¹⁵Chun, hringna chi chu a nei leiin, ama chun pakhatah a siem a ni naw am a nih? Ieng leia pakhata siem am a na? Pathien chi chu a zawng a nih. Chuleiin, in thlaraua chun fîmkhur unla mi tukhawma a tleirâwl nuhmei chu khawhlotakin thaw naw raw se.

¹⁶“Inmâk hi ka theida a nih,” LALPA, Israelhai Pathien chun a tih, “mâni silfên inpâwngnêknaa inkhum leh,” sipaihai LALPA chun a tih. Chuleiin, in thlaraua chun fimkhur unla, khawhlotaka in thaw nawna dingin.

¹⁷In thuhai chun LALPA chu in suksâwl a. Anachu, “Khâwlai am ama chu kan suksâwl a?” in ta. Chutaka bawk chun, “Mi tukhawm thil suol thaw chu LALPA mithmua chun ṭha a na, anni chunga chun a lâwm a; amanih, rorêlna Pathien chu khâwlai am a um a?” in ti bawk a.