Read Hmar MATTHAI 10 Bible Online

MATTHAI 10 - Hmar bible

MATTHAI 10

¹Chun, a inchûktir sâwm le pahnihai chu a ko a, anni hnawt dawk theina dingin khawhri inthiengnawhai chunga thuneina a pêk a; damnawna tinrêng le natna tinrêng sukdam theina dingin thuneina a pêk bawk a.

²Tirko sâwm le pahni hai hming chu hieng hi an nih: A hmasataka chun Simon (Peter an ti) le a unau Andri hai, Zebedai naupa Jakob le a unaupa Johan hai;

³Philip le Bartholomai hai; Thoma le siedâwltu Matthai hai; Alphai naupa Jakob le Thaddai hai,

⁴Kanaana mi Simon le a inmantirtu Juda Iskariot hai hi an nih.

⁵Chuong sâwm le pahni hai chu Isûn a tir suok a, an kuomah thu a pêk a: “Jentailhai lampuiah fe naw unla, Samari mihai khuo hrim hrima khawm lût naw ro;

⁶amiruokchu, Israel hnam berâm inhmanghai kuoma chun fe lem ro.

⁷Chun, in fein, ‘vân ram chu a hung hnai tah,’ tiin hril pei ro.

⁸Damnawhai sukdam unla, mithi- hai keitho unla, phârhai sukthieng unla, khawhrihai hnawt dawk ro, a thlâwnin in hmu a, a thlâwnin pe ro.

⁹In kâwngkhihaiah rângkachak tangka amanih, tangka manih, dâr tangka amanih chawi naw ro.

¹⁰Inzinna dingin mansa amanih, zakuo pahni amanih, kekawkhai amanih, hmawlhai amani khawm chawi naw ro; sinthawtu chu a fâk ding hmu tlâk a ni si a.

¹¹“Chun, khaw liena manih, khaw chîna manih, in lûtna taphawta chun ân tlungtir tlâk ding cheu mi zawng dawk unla, in suok nâwk hmakhat chutaka chun tlung zing ro.

¹²Chun, ina chun in lût dingin chibai bûk ro.

¹³Chun, ina mihai chu intlungtir tlâk cheu an ni chun, in thlamuongna thu chu an chungah tlung sienla; an tlâk naw ruok chun in thlamuongna thu chu in chungah hung kîr nâwk raw se.

¹⁴Chun, tukhawm lâwm lo cheu a, in thu khawm ngai naw taphawt chu, chu ina inthawka manih, chu khuoa inthawka manih in suok pha chun in kephaa pilvut chu thin thla ro;

¹⁵Titakzetin ka hril cheu hi, ngaituo nia chun chu khuohai nêk chun Sodom le Gomorra ram tuor ding chu a dân um lem a tih.

¹⁶“Ngai ta u, satenehai laia berâm um angin ka tir cheu hi; chuongchun, rûl anga vara, vaṭhu anga pawi tâwklovin um unla.

¹⁷Nisienlakhawm, mihriem lai chun fimkhur ro, rorêltuhai an inmantir ding cheu a ni si a, inkhâwmna inahai vuong an ti cheu a;

¹⁸anih, hotuhai le lalhai hmaah annihai le Jentailhai inhriettirna dingin, keima leiin la ṭhuoi an ti cheu.

¹⁹Nisienlakhawm, an inmantir pha cheu khawm, ‘Iengtin am, ieng thu am ka hril ding?’ tiin lungkham naw ro; in hril ding chu a hun taka chun ân hriettir ding cheu a ni si a.

²⁰A hriltu chu nangni in ni âwm si naw a, in Pa Thlarau nangnia thu hriltu khan a hril lem ding a nih.

²¹“Chun, sukhlum dingin unaupa le unaupa inmantir an ta, pa khawmin a nau inmantir bawk a tih; nauhai khawmin an nu le pahai do an ta, insukhlumtir bawk an tih.

²²Keia hming leiin mi po po theida nîng in tih; nisienlakhawm, a tâwp chena tuor pei chu, chu ngei chu sandamin um a tih.

²³“Chuongchun, hi khuoa hin an suknawmna pha cheu, khaw dangah tlân san ro; titakzetin ka hril cheu hi, Mihriem Naupa a hung hmain Israel khuohai chu fang suok naw ti niu.

²⁴“Inchûktir a inchûktirtu chungah a um nawh; suok khawm a pu chungah a um bawk nawh.

²⁵Inchûktir chu inchûktirtu anga a hung um le, suok chu a pu anga a hung um chu a hun deh. In neitupa hman Beelzebub an ti chun, a sûnghai chu an va ti nasa awm deh e!

²⁶“Chuongchun, anni chu ṭi naw unla; inlang lo dinga thup hmang iengkhawm a um si naw a; hriet naw dinga ip iengkhawm a um bawk nawh.

²⁷Inthima ka hril cheu hi varah hril ro, na bula in hriet hi in chunga chuongin tlânginsampui ro.

²⁸“Chun, taksa sukhluma thlarau sukhlum thei nawhai chu ṭi naw unla, Hremhmuna thlarau le taksa sukbo thei ruok chu ṭi ro.

²⁹Chawngzawng pahni dâr tangka pakhatin an zawr hlak a ni naw am a nih? nisienlakhawm, anni laia pakhat khawm in Pa boin hnuoiah tla naw ni.

³⁰In samzai chen khawm hi tiem vawng a nih in sawnnaw.

³¹Chuleichun, ṭi naw ro; chawngzawng tamtak nêkin in hlu lem a nih.

³²“Chuongchun, mihai hmaa a mi ṭan taphawt chu, ka Pa vâna mi hmaah ṭan vêng ka tih.

³³Nisienlakhawm, tukhawm mihai hmaa a mîn phat taphawt chu, ka Pa vâna mi hmaah inphat vêng ka tih.

³⁴“Khawvêla hin inremna inlêngtir dinga hung am ka nih mi sâwn naw ro; inremna inlêngtir dinga hung ka ni naw a, kâwlhnâm inlêngtir dinga hung ka ni lem.

³⁵Mi a pa indotir dingin, naunu a nu indotir dingin, mo le a pi indotir dinga hung ka nih in sawnnaw.

³⁶Mi a hmêlmahai chu ama sûnghai laia mi ngei nîng an tih.

³⁷“Tukhawm a nu amanih, a pa amanih keia nêka hmangai lem chu ka mi ni tlâk a ni nawh; tukhawm naupa amanih, naunu amanih keia nêka hmangai lem chu ka mi ni tlâk a ni nawh.

³⁸Tukhawm a kraws puta mi zui naw chu ka mi ni tlâk a ni nawh.

³⁹Tukhawm a hringna hmu chun chân a ta; keia leia hringna chân chun hmûng a tih.

⁴⁰“Tukhawm a lâwm cheu chu a mi lâwm a na, tukhawm a mi lâwm chu, a mi tirtu lâwm a nih.

⁴¹Tukhawm zâwlnei chu zâwlnei a ni leia lâwm chun, zâwlnei lâwmman hmûng a tih; tukhawm mi fel chu mi fel a ni leia lâwm chun mi fel lâwmman hmûng a tih.

⁴²Chun, tukhawm hieng mi chîntak laia pakhat kuoma hin, tirko a ni leia tuisik no khat chau khawm pe taphawt chun, titakzetin ka hril cheu hi, a lâwmman chu chân naw tawp a tih,” a ta.