Read Hmar MATTHAI 12 Bible Online

MATTHAI 12 - Hmar bible

MATTHAI 12

¹Chu lai chun, Isu chu châwlniin bu bilah a fe thleng a; a inchûktirhai chu an phîng a ṭâm a, buvuihai chu an thliek a, an fâk ta a.

²Chun, Pharisaihaiin chu chu an hmu chun a kuomah, “En ta, i inchûktirhaiin Châwlnia thaw thieng naw chu an thaw hi,” an ta.

³Ama ruok chun an kuomah, “A ruolhai le an phîng ṭâm laia David thilthaw kha in tiem ngai naw am a nih?

⁴Khânga Pathien inah a lût a, ama le a ruolhai fâk thieng naw, thiempuhai chau ifâk thieng entirna bei an fâk thu kha?

⁵Annawleh, Châwlniin Pathien biekina thiempu umhai chun Châwlni an bawr khawmin an thiem pei ti Dân thua chun in tiem naw am a nih?

⁶Iengkhawm ni sien, Pathien biekin nêka ropui lem hitaka hin a um ti ka hril cheu hi.

⁷Nisienlakhawm, ‘Inthâwina dit lovin lunginsietna ka dit,’ ti hi a umzie hre thiem sa ni unla chu, mi thiemhai chu thiemnaw in inchangtir naw ding bah.

⁸Mihriem Naupa hi Châwlni Lal a ni si a,” a ta.

⁹Chun, chutaka inthawk chun a fe a, an inkhâwmna inah a va lût a.

¹⁰Chun, ngai ta, mi pakhat kut zeng a lo um a, chun, an hêk theina dingin, “Châwlniin sukdam a thieng am?” tiin Isu an indawn a.

¹¹Ama chun an kuomah, “Nangni laia tukhawmin berâm pakhat nei unla, chu chu Châwlniin khurah tla ta ang sienla, tuin am chelin kei dawk nâwng in ta?

¹²Berâm pakhat nêk chun mihriem pakhat chu a va hlu lem de! Chuleichun, Châwlnia sukṭhat a thieng,” a ta.

¹³Chu phingleh, chu mipa kuoma chun, “I kut phar rawh,” a ta. Chuongchun, a phar a, a khing tieng angin a dam ta var a.

¹⁴Chuongchun, Pharisaihai chu an suok a, ama an sukhlum theina ding dân ngaituoin an inrâwn a.

¹⁵Nisienlakhawm, Isûn chu chu a hrietin, chutaka inthawk chun a fe hmang ta a.

¹⁶Chun, mi tamtakin ama an zui a, an rêngin a lo sukdam vawng a, a chanchin puong lo dingin an kuomah a ti tlat a.

¹⁷Zâwlnei Isaiin hieng thu a hril hi a hung tlung theina dingin:

¹⁸“En ta, ka siehlaw, ka ithlang, Ka idittak, ka lungrilin a ilâwm bêk bêk hi; A chungah ka Thlarau sieng ka ta, Chuongchun, Jentailhai kuomah rorêlna thu hril a tih.

¹⁹Sêl naw ni a, khêk bawk naw ni a; Kawtthlêrhaia khawm tukhawmin a râwl hre bawk naw ni hai.

²⁰Hne dinga rorêlna a tir dawk hma khat chun Luong pawr suktan naw ni a, Pat khu khawm sukmit naw ni.

²¹Ama hming chu Jentailhai chun beisei phâng an tih,” ti hi.

²²Chu lai chun, mitdel ṭawngtheinaw khawhri iman pakhat a kuomah an hung ṭhuoi a; chun, ama chun a lo sukdam a, chuongchun, ṭawngtheinaw chu a hung ṭawng theiin, a hung hmu thei ta a.

²³Chun, mipuihai po po chun mak an ti hle a, “Hi mipa hi David naupa chu a ni naw am a nih?” an ta.

²⁴Nisienlakhawm, Pharisaihaiin chu chu an hriet phingleh, “Hi mipa hin khawhri lal Beelzebub lei naw chun khawhrihai hnawt dawk naw ni,” an ta.

²⁵Chun, Isûn an ngaituohai chu a lo hriet a, an kuomah, “Khâwlai ram khawm mâni indo taphawt chu an bo hlak; khâwlai khuo khawm sûngkhat khawm, mâni indo taphawt chu ngîr suok naw ni hai.

²⁶Setanin Setan bawk a hnawt dawk chun, mâni indo nîng a tih in sawnnaw; a ram chu iengtin am ngîr suok a ta?

²⁷Kei Beelzebub[3] leia khawhrihai hnawt dawk hlak ka lo ni chun, in nauhaiin tu leiin am an lo hnawt dawk hlak lie? Chuleiin, anni chu nangni ngaituotu dinghai nîng an tih.

²⁸Amiruokchu, kei Pathien Thlarau leia khawhrihai hnawt dawk hlak ka ni chun, Pathien ram in kuomah a hung tlung tah nîng a tih.

²⁹Chuongchu a ni si naw chun, miin mi hrât chu a khuop hmasa bak naw chun, iengtin am mi hrât inah lûtin a sum lapêk thei a ta? Chu hnunga ruok chun a in chu inrampêk el a tih.

³⁰Tukhawm keia tienga ṭhang naw chu a mi do a nih; tukhawm a mi lâk khâwmpui naw chun a sukdar a nih.

³¹“Chuleiin, ka ti cheu hi, mi an suolna tinrênga le, Pathien an hrilsietna tinrênga chun ngaidam nîng an ta, Thlarau Inthieng meu hrilsetu ruok chu ngaidam ni naw ni hai.

³²Chun, tukhawm Mihriem Naupa sawisêl taphawt chu a sawisêlna chu ngaidam nîng a ta; tukhawm Thlarau Inthieng meu sawisêl taphawt chu a sawisêlna chu, hi dam sûnga khawm, hun la hung tlung dinga khawm chun, ngaidam ni naw nih.

³³“Thing chu a ṭha a, a ra khawm a ṭha, in ti naw nghâl an leh, thing chu a sie a, a ra khawm a sie, ti nghâl nghâl ro; thing chu a rain ân hriet si a.

³⁴Rûl thlahai, nangnîn suol zing pumin, iengtin am thu ṭha hril thei in ta? Lungrila sip liem chu bauin a hril hlak in sawnnaw.

³⁵Mi ṭha chun a robâwm ṭhaa inthawkin thil ṭhahai a the dawk hlak, mi suol chun a robâwm siea inthawkin thil ṭha naw a the dawk hlak.

³⁶Chun, ka hril cheu hi, mihaiin thu teplo an hril taphawt, chuong thu chanchin chu ngaituo nia chun hril an tih.

³⁷I thuhril chun thiem inchangtir a ti che a, i thuhril bawk chun thiemnaw inchangtir a ti che i sawnnaw,” a ta.

³⁸Chu lai chun, Dân inchûktirtuhai le Pharisaihai laia tuhaiin amanih an dawn a, a kuomah, “Inchûktirtu, i kuoma inthawkin inchikna hmu kan nuom,” an ta.

³⁹Ama ruok chun an kuomah, “Ruolthar suoltak le uire hmang takhai chun inchikna an zawng a; nisienlakhawm, zâwlnei Jona inchikna chau naw chu an kuomah inchikna hrim hrim pêk ni naw ni;

⁴⁰Jona chu ni thum le zân thum ngapui phîng sûnga a um ang khan, Mihriem Naupa hi ni thum le zân thum hnuoi khur sûngah a um bawk ding a nih.

⁴¹Ninevi khuoa mihai chu ngaituo pha chun tulai ruoltharhai kuomah hin ngîr vêng an ta, thiemnaw inchangtir an tih; Jona thu hril leiin an sim si a; Jona nêka ropui lem hitaka hin a um in sawnnaw.

⁴²Simtieng lalnu kha ngaituo pha chun tulai ruoltharhai lai hin tho vêng a ta, thiemnaw inchangtir a tih; Solomon varna ngai ding hmanin kâwlkawdawnga inthawkin a hung si a; ngai ta u, Solomon nêka ropui lem hitaka hin a um in sawnnaw.

⁴³“Chun, khawhri inthieng naw chu mi sûnga inthawka a suokin, châwlna zawngin tui um nawna hmunahai ân vâk ân vâk a, a hmu ngai si naw a.

⁴⁴Chun, ‘Ka suokna ina khan kîr nâwk el ka tih,’ a ta; chun, a va tlung chun, a ruoka, phît faia cheiṭhatin a hmu a.

⁴⁵Chu phingleh a va fe a, ama nêka suol lem khawhri dang pasari a hung ṭhuoi a, chutaka chun an lût a, an um zing hlak a, chu mihriem um dân nuhnung lem chu a hmasa nêkin a hung ṭha naw lem hlak a nih. Chuong ang bawkin tulai ruolthar suol takhai chunga hin la um a tih,” tiin a dawn a.

⁴⁶Mipuihai kuoma thu a la hril lai chun, ngai ta, a nu le a unauhai chu ama biek tumin tuolah an ngîr a.

⁴⁷Chun, mi pakhatin a kuomah, “Ngai ta, i nu le i unauhai biek che tumin tuola sawn an ngîr zing ie,” an ta.[4]

⁴⁸Ama ruok chun a hriltu kuoma chun, “Ka nu chu tu am a na? Ka unauhai khawm chu tuhai am an na?” tiin a dawn a.

⁴⁹Chun, a inchûktirhai tieng a kut a phar a, “En ta u, ka nu le ka unauhai hi!

⁵⁰Tukhawm ka Pa vâna mi dit zâwng thaw taphawt chu, ka unau le, ka farnu le, ka nuhai an nih in sawnnaw,” a ta.