Read Hmar MATTHAI 13 Bible Online

MATTHAI 13 - Hmar bible

MATTHAI 13

¹Chu ni chun Isu chu ina inthawkin a fe suok a, dîl panga chun a ṭhung a.

²Chun, a kuomah mipui nasatak an hung inkhâwm a, chuongchun, lawngah a chuong a, a ṭhung a; mipui po po ṭieuphoah an ngîr a.

³Chun, tekhithuin an kuomah thu tamtak a hril a, “Ngai ta u, bu chi thetu chu bu chi the dingin a fe a.

⁴Chun, a the laiin a ṭhen lampui sîrah a tla a, vatehaiin an hung tlân zo ta a.

⁵Chun, a ṭhen pielthlêng leihnuoi inphânna hmunah a tla a, leihnuoi a sa naw leiin a mâwng nghâl ta a.

⁶Nisienlakhawm, nisa a hung insâng deuin em vuoiin a hung um a, zung a nei naw leiin a rawp el ta a.

⁷Chun, a ṭhen hlohlingnei lai a tla a, hlo chu a hung mâwng sâng a, a dîp hmang ta a.

⁸A ṭhen hnuoi ṭhaah a tla a, ṭhenkhat a lêt za dâm, ṭhenkhat a lêt sâwmruk dâm, ṭhenkhat a lêt sâwmthum dâmin a hung ra ta a.

⁹Tukhawm na nei chun hre raw se,” a ta.

¹⁰Chun, inchûktirhai chu an hung a, a kuomah, “Iengdinga an kuomah tekhithua i hril am?” an ta.

¹¹Chun, ama chun a dawn a, an kuomah, “Vân ram thurûk chu nangni ihriet chu phal a nih, anni ihriet ruok chu phal a ni nawh.

¹²Tukhawm a nei taphawt chu pe sâng an ta, nei ṭeu an tih; nisienlakhawm, tukhawm a nei naw taphawt chu, an nei sun khawm lâkpêk an tih.

¹³Chuleichun, tekhithuin an kuomah ka hril a nih; hmu hai sien khawm an hmu ngai naw a, nain hrehai sien khawm an hriet ngai naw a, a ngaina khawm an hriet ngai naw leiin.

¹⁴Chun, Isai thuhrillâwk kha an chungah a hung tlung a ni hi; ‘Na chun hre dêng in ta chu, a ngaina ruok chu hre tawp naw ti niu; Hmu chu hmu dêng in ta chu, hriet ruok chu hre tawp naw ti niu;

¹⁵Hi chihai lungril hi a lo ngawng ta a, An nahai a lo sêt ta a, An mit an insîm bawk a. Chuong naw chun an mitin hmûng an ta, An nain hrieng an ta, An lungrilin hre bawk an ta, Ngha kîr nâwk an ta, Keiin anni sukdam hlau rawi ka tih,’ a ti kha.

¹⁶“Nangni mit chu a vângnei a nih, a hmu hlak leiin; in na khawm a vângnei a nih, a hriet hlak leiin.

¹⁷Titakzetin ka hril cheu hi, zâwlnei tamtakhai le mi fel tamtakhai khawmin, in thil hmuhai hi hmu an inhâwk a, nisienlakhawm, an hmu si naw a; in thil hriethai khawm hi hriet an inhâwk a; nisienlakhawm, an hriet si naw a!

¹⁸“Chuongchun, bu chi thetu tekhithu chu hre ro:

¹⁹Tukhawmin ram thu chu naa a lo hriet a, a ngaina a hriet si naw chun, mi suol chu a hung a, a lungrila the sa chu a lâkpêk hlak. Chu chu lampui sîra the chu a nih.

²⁰Chun, pielthlêng hmuna the chu, thu hre a, lâwmtaka pawm nghâl hlak hi a nih;

²¹nisienlakhawm, amaa chun zung a um naw leiin sâwt nawte chau a um a; chun, thu lei chun, rinumna amanih, suknawmnatna amanih a hung um phingleh a tlu nghâl el hlak.

²²Chun, hlohlingnei laia the chu, thu hretu a na; nisienlakhawm, khawvêl lungkhamna le hausakna hlêmna chun thu chu a dîp a, ra lovin a um hlak.

²³Chun, leihnuoi ṭha chunga the chu, thu chu naa hre a, a ngaina hre bawk hi a nih. Chu chu a ra ngei a, ṭhenkhat a lêt za dâm, ṭhenkhat a lêt sâwmruk dâmin, ṭhenkhat a lêt sâwmthum dâmin a pung hlak,” a ta.

²⁴Tekhithu dang an kuomah a hril nâwk a, “Vân ram chu, mi a loa chi ṭha thetu le chun hrilkhi a nih;

²⁵nisienlakhawm, mi an in kârin a hmêlma a hung a, bu lai chun bu tehlêm a the a, a fe hmang nâwk ta a.

²⁶Chun, bu chu a hung mâwng a, a hung vui chun, bu tehlêm chu a hung inlang ve ta a.

²⁷Chun, in neitu suokhai chu an hung a, a kuoma chun, ‘Pu, i loah chi ṭha i the a ni naw am a nih? bu tehlêm saw khâwlaia hung um am a ni leh?’ an ta.

²⁸Chun, ama chun an kuomah, ‘Chu chu hmêlmain a lo thaw a ni ta chu,’ a ta. Chun, suokhai chun a kuomah, ‘Chuong chu la khâwm el inlang rem i ti?’ an ta.

²⁹Ama ruok chun, ‘Ti lo e; bu tehlêm chu in lâk khâwm chun bu chu phawi sa hlau rawi in tih.

³⁰Bu sîk chenin um hmun khat raw se; chun, bu sîk pha chun, bu âttuhai kuomah, bu tehlêm chu la khâwm hmasa phawt unla, raw dingin intêl ro, bu ruok chu ka inah sêk lût ro, la tîng ka tih,’ a ti a,” a ta.

³¹Tekhithu dang an kuomah a hril nâwk a, “Vân ram chu anṭam chi mal khat mîn a lâk a, a loa a the ang chu a na;

³²chu chu chi po poa chîn tak a na: nisienlakhawm, a hung mâwng sâng pha chun, thlaihai nêk chun a lien lem a, thing a hung ni hlak a, chuongchun, chunglêng vatehai chu an hung a, a zârhaia chun an riek hlak a,” a ta.

³³Tekhithu dang an kuomah a hril nâwk a, “Vân ram chu chawl, nuhmeiin a ilâk, beiphit tekhâwng thum laia arênga a tho vawng hmakhata a iphûm ang chu a nih,” a ta.

³⁴Chuong po po chu Isûn tekhithuin mipuihai kuomah a hril a, tekhithu nawin iengkhawm a hril nawh:

³⁵zâwlneiin, “Tekhithuin ka bau kâng ka ta, Leihnuoi insieng tîra inthawka thil inthup chu hril dawk ka tih,” tia a hril kha a hung tlung theina dingin.

³⁶Chu lai chun mipuihai chu a fesan a, ina chun a lût ta a; chun, a inchûktirhai chu a kuomah an hung a, “Loa bu tehlêm tekhithu kha mi hrilfie rawh,” an ta.

³⁷Chun, ama chun a dawn a, “Chi ṭha thetu chu Mihriem Naupa hi a nih;

³⁸Lo chu khawvêl hi a na; chi ṭhahai chu Ram nauhai an na; bu tehlêmhai chu suol nauhai an nih.

³⁹Hmêlma a thetu chu diebol a na; bu sîk chu khawvêl tâwpna ding a na; bu sîktuhai chu vântirkohai an nih.

⁴⁰Chuongchun, bu tehlêmhai chu an lâk khâwma meiah an raw ang hin khawvêl tâwpnaa chun la um a tih.

⁴¹Mihriem Naupa hin a vântirkohai chu tir dawk a ta, a rama inthawka insuksuoltirtuhai le thil suksuoltuhai po po chu thlang dawk an ta,

⁴²rawtuina meia chun pei an ta, chutaka chun ṭap le harâwt chu la um a tih.

⁴³Chu pha chun, mi felhai chu an Pa rama chun nisa angin var tâng an tih. Na nei chun hre raw se.

⁴⁴“Vân ram chu loa ro phûmrûk ang a nih; chu chu miin a hmu a, a thup hmang a, a lâwm leiin a fe a, a nei po po chu a va zawr a, chu lo chu ân châwk ta a.

⁴⁵“Chun, vân ram chu sumdâwng mi lunghlu ṭhatak zawngtu ang chu a ni nâwk a,

⁴⁶chun, ama chun lunghlu hlutak pakhat a hmu a, a fe ta a, a nei po po chu a va zawr a, ân châwk ta a.

⁴⁷“Chun, vân ram chu lênkhang tuisuorieta dênga, chi tinrêng fûn khâwmna ang chu a ni nâwk bawk a.

⁴⁸Chu chu a sip phingleh vapangah an hnûk dawk a; chun, an ṭhung a, a ṭha po chu bâwmah an lâk khâwm a, a sie ruok chu an pei a.

⁴⁹Khawvêl tâwp pha chun chuong ang bawk chun la um a tih; vântirkohai chu hung suok an ta, mi fel laia inthawkin mi suol hai chu ṭhêng an ta,

⁵⁰rawtuina meia chun pei an ta; chutaka chun ṭap le harâwt chu um a tih,” a ta.

⁵¹Chun, Isûn an kuomah, “Chuong po po chu in hriet am?” a ta. Anni chun a kuomah, “Hre e,” an ta.

⁵²Chun, ama chun an kuomah, “Chuong a ni chun Dân inchûktirtu vân ram lampui inchûktira um taphawt chu, in neitu, a ro bâwma inthawka thil tharhai le, thil hluihai phawr dawk hlaktu ang chu a nih,” a ta.

⁵³Chun, Isûn chuong tekhithuhai chu a hril zo phingleh, chutaka inthawk chun a fe ta a.

⁵⁴Chun, a umna khuo tieng chu a tlung a, an inkhawmna ina chun anni ân chûktir ta a; chuongchun, mak an ti hle a. “Hi mipa hin, hieng varna le, thilmak thaw theinahai hi, khâwlaia inthawka a hmu am a ni leh?

⁵⁵Hi mi pa hi thingrem siemtu naupa kha a ni naw am a nih? A unauhai khawm, Jakob, Josef, Simon, Juda an tihai chu an ni naw am a nih?

⁵⁶A farnuhai khawm ei kuoma um an ni vawng a ni naw am a nih? Hi mi hin khâwlaia inthawk hrima hieng po po hi a hmu am a na?” an ta.

⁵⁷Chuongchun, a chungah an lungni ta naw a. Nisienlakhawm, Isûn an kuomah, “Zâwlnei chu ama khuo tieng le ama ina chau naw chu inpâk lovin a um ngai nawh,” a ta.

⁵⁸Chun, an ring naw leiin chutaka chun thilmak tam a thaw ta naw a.