Read Hmar MATTHAI 14 Bible Online

MATTHAI 14 - Hmar bible

MATTHAI 14

¹Chu lai tak chun lal Herod chun Isu chanchin a lo hriet a,

²a siehlawhai kuomah, “Chu chu Baptistu Johan kha a ni chu, mithi laia inthawkin a tho nâwk tah a ni chu tie; chuleiin, chuong thilthawtheinahai chun amaah sin a thaw a ni chu,” a ta.

³Herod chun a unaupa Philip nuhmei Herodi leiin Johan chu a man a; a khuop a, intângna ina a khum tah a ni a;

⁴Johan chun a kuomah, “Ama i nei hi a thieng nawh,” a ti pêk leiin.

⁵Chun, Johan chu sukhlum a tum leh mipui a ṭi a, zâwlneiin an ruot si leiin.

⁶Nisienlakhawm, Herod pieng champhaphâk ni chu a hung tlungin Herodi naunu chu a laiah a lâm a, Herod chu a suklâwm ta a.

⁷Chuleichun, a ihni taphawt pe dingin inkhâmin ân tiem ta a.

⁸Chun, ama chun a nu infuiin, “Hiva hin thlêngin Baptistu Johan lu mi pe rawh,” a ta.

⁹Chun, lal chu a lungngai ta a; nisienlakhawm, a thutiem le a thlaithlêng awtpuihai lei chun pêk ding thu a pêk a;

¹⁰chuongchun, mi a tir a, intângna ina Johan lu chu ân tantir a.

¹¹Chun, a lu chu thlêngin a hung lâk a, naupangnu kuoma chun an pêk a; ama chun a nu kuomah a fepui ta a.

¹²Chun, a inchûktirhai chu an hung a, a ruong chu an inhlawm a, an phûm a; chun, an fe a, Isu an va hril ta a.

¹³Chun, Isûn chu chu a hrietin, chutaka inthawkin thlalêr hmun tieng lawngin a tumin a fe ta a. Nisienlakhawm, mipuihai chun an hriet phingleh khuoa inthawk dâm chun kea fein an zui ta a.

¹⁴Chuongchun, ama chu vapanga a suok chun, mipui nasatak a hmu a; a lunginsiet bêk bêk a, an damnawhai a sukdam a,

¹⁵Chun, zântieng a hung ni chun, inchûktirhai chu a kuomah an hung a, “Ahi thlalêr hmun a na, an ta dinga fâk ding an inchâwk theina dingin mipuihai hi infetir ta la,” an ta.

¹⁶Isu ruok chun an kuomah, “An fe hmang a ngai naw ie; nangniin fâk ding pe ro,” a ta.

¹⁷Anni chun a kuomah, “Ahin beiphêk panga le nga pahni chau kan nei a nih,” an ta.

¹⁸Chun, ama chun, “Ahin ka kuomah hung la ro,” a ta.

¹⁹Chun, hlo chunga ṭhung dingin mipui chu thu a pêk a, beiphêk panga le nga pahni chu a lâk a, vân tieng enin mal a sâwm a, a khawi a, beiphêk panga chu inchûktirhai kuomah a pêk a; inchûktirhai chun mipui kuoma chun an pêk a.

²⁰Chun, an rêngin an fâk a, an khawp tâwl ta a; an fâk mahla nawi khawm chu bâwmrâng sâwm le pahni an rût sip a.

²¹A fatuhai chu nuhmei le naupang tiem lovin patling ruok khawm sâng nga rau an nih.

²²Chun, mipuihai chu ân ṭîntir vêl sûngin, a fe hmaa râlkhing tienga fe dingin inchûktirhai chu lawngah ân chuongtir nghâl a.

²³Chun, mipuihai chu ân ṭîntir hnungin ṭawngṭai dingin tlânga chun a tumin a hang fe a; chun, zântieng a hung ni chun ama chauin chutaka chun a um ta a.

²⁴Lawng ruok chu dîl lailung takah a um ta a; thliin annaw tieng a mût leiin tuifâwnin a vawr ta a.

²⁵Chun, vârṭien tâwmin dîl chunga kea lâwnin an kuom tieng a hung pan a.

²⁶Inchûktirhai chun, ama chu dîl chunga kea lâwn an hang hmu chun, “Thla a ni saw,” tiin an thlaphâng a, an ṭi a, an khêk ta rak el a.

²⁷Nisienlakhawm, Isûn anni chu a biek nghâl ta a, “Lungmuongtakin um ro, kei ka ni annâwm, ṭi naw ro,” a ta.

²⁸Chun, Peterin a dawn a, “Lalpa, nang i ni chun, tui chunga i kuoma hung thu mi pe rawh,” a ta.

²⁹Ama chun, “Hung ta la,” a ta. Peter chu lawnga inthawk chun a ṭum a, Isu kuom tieng panin tui chunga chun kein a fe ta a.

³⁰Nisienlakhawm, thli hrâng chu a hmuin a ṭi a; chun a tlum vâng vâng a, “Lalpa, mi sandam rawh” tiin a khêk ta a.

³¹Chun, Isûn a ban nghâl ta a, ama chu a chel a, a kuomah, “Nang ringna tlâwm, iengdinga i ringhla am a na?” a ta.

³²Chun, lawngah an chuong chun thli chu a ma ta el a.

³³Lawnga umhai chun, “Pathien Naupa i lo ni tak zet hi,” tiin chibai an bûk a.

³⁴Chun, râlkhing tieng an kai chun, Gennesaret ram khawmuol an tlung ta a.

³⁵Chu hmuna mihai chun ama an hriet phingleh, chu kâwl vêl ram po poa chun mi an tir a, damnaw po po chu a kuomah an hung ṭhuoi a;

³⁶chun, a puon hmawr bêk them thei an hni a; chun, a them phawt chu an hung dam ta pei a.