Read Hmar MATTHAI 17 Bible Online

MATTHAI 17 - Hmar bible

MATTHAI 17

¹Chun, ni ruk hnung chun Isûn Peter hai, Jakob hai, a unau Johan hai a ṭhuoi a, a tumin tlâng insângtakah a hang fepui a;

²an hmaa chun a hmêl umzie chu a hung danglam ta a; a hmai nisa angin a hung var a; a silfênhai chu vûr angin a hung vâr ta a.

³Chun, ngai ta, Mosie le Elija an hung inlâr a, ama chu an inbiekpui a.

⁴Chun, Peterin Isu a biek a, “Lalpa, ei ta dingin hitaka um hi a ṭha; i nuom chun hitaka hin bâwkte pathum khâwng ka ta; i ta dingin pakhat, Mosie ta dingin pakhat, Elija ta dingin pakhat,” a ti a.

⁵A la hril lai zingin ngai ta, sûm vârtakin anni a hung hlie ta a; chun, ngai ta, sûma inthawk râwlin, “Hi hi ka Naupa dittak, ka ilâwm bêk bêk chu a nih, ama thu ngai ro,” a ta.

⁶Inchûktirhai chun chu chu an hrietin bawkkhupin an tlu a, an ṭi ta bêk bêk a.

⁷Chun, Isûn anni chu a hung them a, “Tho unla, ṭi naw ro,” a ta.

⁸Chun, an hang dâk a, Isu chau naw chu tukhawm an hmu ta naw a.

⁹Chun, tlânga inthawka an ṭum lai chun, Isûn an kuomah, “Mihriem Naupa hi mithi laia inthawka a thonâwk hmakhat chu in thil hmu kha tukhawm hril naw ro,” tiin thu a pêk ta a.

¹⁰Chun, a inchûktirhaiin a kuomah, “Dân inchûktirtuhaiin ‘Elija a hung hmasa ding a nih,’ iengtiziea ti am an ni leh?” tiin an indawn a.

¹¹Ama chun, “Elija chu a hung ding hrim a nih, tinrêng siem ṭha bawk a tih.

¹²Nisienlakhawm, ka hril cheu, Elija chu a hung tah a nih, ama chu an hriet naw a, a chungah an nuom nuomin an thaw ta lem a. Chuong ang bawkin Mihriem Naupa khawm hin annia inthawkin a tuor ve ding a nih,” a ta, a dawn a.

¹³Chu phingle chun inchûktirhai chun, Baptistu Johan thu an kuomah a hril a ni ti an lo hriet ta a.

¹⁴Chun, mipui kuom an hung tlung chun, mi pakhat a kuomah a hung a, a hmaa dingṭhaṭhuonin,

¹⁵“Lalpa, ka naupa saw lunginsiet rawh, hringawl invawi a na, a tuor nasa êm el; vawi tamtak meiah a tlu hlak, vawi tamtak tuiah a tlu bawk hlak a nih.

¹⁶I închûktirhai kuomah ka hung ṭhuoi a, an sukdam thei si naw a,” a ta.

¹⁷Chun, Isûn, “Ruolthar ringna nei loa kawmawhai, ieng chen am in kuomah um ka ta, ieng chen am ngai thei ka ti cheu a? Ama chu ka kuoma hin hung ṭhuoi ro,” a ta, a dawn a.

¹⁸Chun, Isûn khawhri chu a hal a, a sûnga inthawk chun a suok ta a; chu dâr chena inthawk chu naupang chu a hung dam ta a.

¹⁹Chun, inchûktirhai chu a tumin Isu kuomah an hung a, “Iengdinga keinîn kan hnawt dawk thei naw am a na?” an ta.

²⁰Ama chun an kuomah, “In ringna tlâwm leiin. Titakzetin ka hril cheu hi, anṭam mu mal khat ang ringna in nei chun, hi tlâng kuoma hin, ‘Hitaka inthawkin saw taka sawn vân sawn rawh,’ tîng in ta, insawn el a tih; in ta dingin thaw thei naw hrim hrim iengkhawm um naw ni.

²¹[Amiruokchu, hieng ang hi ṭawngṭai le bunghei chau naw chun a suok thei nawh]”[7], a ta.

²²Chun, Galili rama an hung inkhâwm laiin, Isûn an kuomah, “Mihriem Naupa hi mihriemhai kuta inmantirin a um ding a nih;

²³chun, sukhlum an ta, chun, ni thum nia chun keithoin um a tih,” a ta. Chuongchun, an lungngai ta bêk bêk a.

²⁴Chun, Kapernaum chu an hung tlungin biekin tangka[8] dâwltuhai chu Peter kuomah an hung a, “In inchûktirtu hin biekin tangka chu a pêk ve hlak naw am a nih?” an ta. Ama chun, “Pe ve hlak e,” a ta.

²⁵Chun, inah a va lût chun, Isûn a kuomah, “Simon, iengtin am i ngai a? Hnuoia lalhai hin leiman le sie chi hran hranhai hi tuhaia inthawkin am an dâwl hlak a? An nauhaia inthawkin am, mi danghaia inthawkin?” tiin ân dawn a.

²⁶Chun, Peterin, “Mi dang kuomah,” a ti phingleh, Isûn a kuomah, “Chuong a ni si chun nauhai chu an âwl ni naw ni.

²⁷Nisienlakhawm, nang dîlah va fe la, ngakuoi inchie la, nga hung suok hmasa chu man rawh; chun, a bau i keika phingleh tangka[9] pahni hmu el i tih; chu chu la la, kei le nanga ta dingin an kuomah pe rawh, chuong naw chun anni chu suklungawi naw rawi ei tih,” a ta.