Read Hmar MATTHAI 18 Bible Online

MATTHAI 18 - Hmar bible

MATTHAI 18

¹Chu lai tak chun inchûktirhai chu Isu kuomah an hung a, “Vân ramah tu am ropuitak a ta?” an ta.

²Ama chun, naupangte a ko a, anni lai ân ngîrtir a,

³“Titakzetin ka ti cheu hi, in inlamlêta naupangte ang in hung ni naw chun, vân ramah lût naw tawp in tih.

⁴Chuongchun, tukhawm hi naupangte anga inngaitlâwm taphawt, ama chu vân rama chun ropuitak a tih.

⁵Chun, tukhawm ka hming leia hieng ang naupangte pakhat lâwm taphawt chu keia mi lâwm nîng a tih.

⁶“Amiruokchu, tukhawm hieng a mi ringtu mi chînhai laia pakhat khawm suola sukthlu taphawt chu, a rîngah bu râwtnawina lung lientak inhlîtirin tuisuoriet inthûktakah thlâk dai hai sien a ta dingin ṭha lem a tih.

⁷“Tlûknahai leiin khawvêl chung a rik de! tlûknahai chu hung um ding chu a nih; nisienlakhawm, tlûkna inumtirtu chung chu a rik!

⁸Chun, i kutin amanih, i kein amanih a sukthlûk che chun, tan la, pei dai rawh; kut pahni amanih, ke pahni amanih neia kumkhaw meia peia um nêk chun, piengsuolin amanih, ke baiin amanih hringnaa lût i ta dingin a ṭha lem.

⁹Chun, i mitin a sukthlûk che chun, khel dawk la, pei dai rawh, mit khinghni neia Hremhmun meia peia um nêk chun mit khing khat neia hringnaa lût i ta dingin a ṭha lem.

¹⁰“Hieng mi chîn laia pakhat khawm hi hmusit naw dingin fîmkhur ro; an vântirkohaiin vânah ka Pa vâna mi hmêl an hmu rawp hlak ti ka hril cheu hi,”

¹¹[Bohmanghai sandam dingin Mihriem Naupa hi a hung a nih.][10]

¹²“Ieng angin am in ngai a? Mi tukhawmin berâm za nei sienla, an laia pakhat invâk hmang sienla, sâwmkuo le pakuo chu mâksan a, tlânghaiah hang fein, ân hmang chu a zawng naw ding am a nih?

¹³Titakzetin ka hril cheu hi, a hmu nâwk hlau chun, sâwmkuo le pakuo ân vâk hmang nawhai chunga nêk chun a chungah lâwm lem a tih.

¹⁴Chuong ang bawkin, hieng mi chînhai laia pakhat bohmang khawm hi in Pa vâna mi dit zâwng a ni nawh.

¹⁵“Chun, i unauin i chungah thil suksuol ta sienla, fe la, ama le nang chau hrietah a suolnaa chun kâwk rawh, i thu a ngai chun i unau chu i hne ni tâng a tih.

¹⁶A ngai naw ruok che chun, mi dang pakhat amanih, pahni amanih i kuomah ṭhuoi la, chuongchun, thu tinrêng chu hretu pahni amanih, pathum amanih baua sukdet a ni theina dingin.

¹⁷Chun, anni khawm chu a ngai nuom naw chun, kohranah intlun el rawh; chun, kohran thu khawm a ngai naw chun ama chu i ta dingin Jentail le siedâwltu ang ni raw se.

¹⁸“Titakzetin ka hril cheu hi, hnuoi chunga iengkhawm in phuor taphawt chu vânah phuor nîng a tih; hnuoi chunga iengkhawm in sût taphawt chu vânah sût nîng a tih.

¹⁹“Titakzetin ka hril cheu hi, hnuoi chunga hin nangni laia mi pahni amanih an thil hni chunga an inthuruol chun, ka Pa vâna mi thawpêkin um an tih.

²⁰Mi pahni amanih, pathum amanih, ka hminga an inkhâwmna taphawta chun anni lai ka um si hlak a,” a ta.

²¹Chu lai chun Peter a hung a, a kuomah, “Lalpa, ka unauin vawi ieng zât am ka chungah thil suksuol sien la ka ngaidam ding? vawi sari chen ding am a nih?” a ta.

²²Isûn a kuomah, “ ‘Vawi sari chenin,’ ka ti naw che, ‘Vawi sari hmun sâwmsari chenin,’ ka ti lem che a nih.

²³“Chuleichun, vân ram chu, laltak tu amanih, a suokhai kuoma sum chanchin sukfel tumtu le chun hrilkhi a nih.

²⁴Chun, a hang sukfel hlim chun, mi pakhat talent sing khat bat a kuomah an hung ṭhuoi a.

²⁵Pêk ding a nei naw leiin, a pu chun a nuhmei leh, a inei po po leh zawra thung ding thu a pêk a.

²⁶Chuongchun, a suokpa chun, ‘Pu ka chungah za la ngai phawt la, arêngin pe vawng ka ti che,’ tiin bawkkhupin chibai a bûk a.

²⁷Chuongchun, suok neitupa chun a lunginsiet ta bêk bêk a, ân thla a, a bat chu a ngaidam ta a.

²⁸Nisienlakhawm, chu suok chu a va fe suok a, a suok chanpui laia pakhat, a duli[11] za battu a va hmu a; a man a, ‘I bat kha mi pe rawh,’ tiin a rîng a rêk a.

²⁹Chuongchun, a suok chanpui chu a bawkkhup a, ‘Ka chungah za la ngai phawt la, la pêng ka ti che,’ tiin a ngên rak a.

³⁰Nisienlakhawm, a nuom naw a; a ibat chu a tlâk hmakhat chu intângna inah a va khum ta a.

³¹Chuongchun, a suok chanpuihai chun a thilthaw chu an hmuin, an lungngai bêk bêk a; a thilthaw po pohai chu an pu an va hril ta a.

³²Chu phingleh a pu chun a ko a, a kuomah, ‘Suok rilo, i mi hni rak leiin i bat po po kha ka ngaidam che a na,

³³ka lunginsiet che ang khan nang khawmin i suok chanpui i lunginsiet ve ding a ni naw am a nih?’

³⁴Chun, a pu chu a lunginsen a, a ibat po po a thung hmakhat chu sawisatuhai kuomah a pêk ta a.

³⁵Mi tinin in lungril taka in unauhai in ngaidam naw chun, ka Pa vâna mi khawmin chuong ang bawkin in chungah thaw vêng a tih,” a ta.