Read Hmar MATTHAI 2 Bible Online

MATTHAI 2 - Hmar bible

MATTHAI 2

¹Chun, lal Herod inlal laia, Juda rama Bethlehemah Isu a hung piengin, ngai ta, khawsak tienga inthawkin mi varhai Jerusalemah an hung a,

²“Judahai lal hung pieng chu khâwlai am a um a? A arasi khawsak tieng kan hmu a, ama chibai bûk dingin kan hung a nih,” an ta.

³Lal Herod chun a hriet phingleh a lunginzîng ta a, Jerusalema mi po po khawm an lunginzîng ve a.

⁴Chuongchun, thiempu lalhai le mihai Dân inchûktirtu po po a ko khâwm a. Krista piengna ding chu ân dawn a.

⁵Anni chun a kuomah, “Juda rama Bethlehemah hieng ang hin zâwlneiin a ziek kha,

⁶‘Chun, nang Juda rama Bethlehem, Juda khawpuihai laiah i chîn tak naw tawp; I sûnga inthawkin awptu a hung suok ding a ni si a, Ka mi Israelhai vêngtu ding chu,’ ti hi,” an ta.

⁷Chu hnunga chun Herodin mi varhai chu arûkin a ko a, arasi inlang hun chu nguntakin anni ân dawn a.

⁸Anni chu Bethlehemah ân fetir ta a, “Fe unla, nautê thu chu nguntakin indawn suok ro; chun kei khawmin ama chu chibai ka hung bûk ve theina dingin, in hmu phingleh mi hung hril nâwk ro,” a ta.

⁹Chun, lal thu chu an hriet a, an fe ta a; chun, ngai ta, khawsak tienga arasi an hmu kha nautê umna chung zâwn a tlunga a ngîr hmakhat chu an hmaah a fe pei a.

¹⁰Chun, arasi chu an hmuin an hlim nasa bêk bêk a.

¹¹In sûngah an va lût a, a nu Mari kuoma nautê chu an hmu a, an bawkkhup a, chibai an bûk a. Chun, an ro bâwmhai an hawng a, a kuomah lâwmna rângkachak dâm, beraw dâm, murra dâm an pêk a.

¹²Herod kuoma kîr nâwk lo dingin manga hrila an um leiin, lampui dangah an khuo tieng an kîr ta a.

¹³Chun, an fe hnungin, ngai ta, Lalpa vântirko Josef kuomah a mangah ân lâr a, “Tho la, nautê le a nu ṭhuoi la, Aigupta ramah tlân hmang rawh, ka hril nâwk hmakhat che chu chutaka chun um zing rawh; Herodin nautê sukbo dingin a zawng ding a nih,” a ta.

¹⁴Chuongchun, a tho a, azân azânin nautê le a nu a ṭhuoi a, Aiguptaah a fê ta a.

¹⁵Herod thi hmakhat chu chutaka chun a um zing a; Lalpain zâwlnei baua, “Ka naupa chu Aiguptaa inthawkin ka ko dawk a,” tia a hril kha a hung tlung theina dingin.

¹⁶Chun, Herodin mi varhai hlêmin a um ti ân hriet phingin a lung a sen bêk bêk a, mi a tir a, a hun laitak thu mi varhai nguntaka ân dawn suo ang khan, Bethlehem le a vêl po poa pasal naupang kum hnia inthawka hnuoitieng po po chu an rêngin a that ta vawng a.

¹⁷Chuong lai chun zâwlnei Jeremiain hieng thu a hril hi a hung tlung ta a:

¹⁸“Rama khuoah khêkri an hriet a, Ṭap dâm, mithi ngaia khêk rawng rawng dâm; Rakil chun a nauhai a ṭa a, An um ta naw leiin thlamuong thei a ni nawh,” ti hi.

¹⁹Nisienlakhawm, Herod chu a thi hnungin, ngai ta, Lalpa vântirko Aiguptaa chun Josef kuomah mangah ân lâr a,

²⁰“Tho la, nautê le a nu ṭhuoi la, Israel ramah fe rawh; nautê that tumtuhai kha an thi tah,” a ta.

²¹Chuongchun, a tho a, nautê le a nu chu a ṭhuoi a, Israel ramah a lût ta a.

²²Nisienlakhawm, Arkelaus a pa Herod aiawin ân lal ti a hrietin chutaka fe chu a ṭi ta a; chun, a manga hrila a um leiin Galili tieng a fe ta dai a.

²³Khuo pakhat Nazareth an tia chun a va um ta a: “Ama chu Nazareth mi tîng an tih,”tia zâwlnei baua an hril kha a hung tlung theina dingin.