Read Hmar MATTHAI 20 Bible Online

MATTHAI 20 - Hmar bible

MATTHAI 20

¹“Vân ram chu in neitupa, a grêp huona sinthawtuhai ruoi dinga zîngkâr inhmataka suok ang chu a ni si a.

²Chun, ama chun, sinthawtuhai le chun ni khata duli[12] hlaw dinga an inrem phingleh, huona chun a tir tâwl ta a.

³Chun, vairik lai vêlin a va suok a, mi dang dâwr hmuna ngîr mei meihai a hmu a;

⁴an kuomah, ‘Nangni khawm grêp huonah va fe ta u, a mawi tâwk ang pei pêng ka ti cheu,’ a ta. Chuongchun, an fe ta a.

⁵Chun, nisa inding vêl le zân bu suong pha vêl lai chun a va suok nâwk a; chuong ang bawkin a thaw nâwk a.

⁶Chun, zântieng chun a va suok a; mi dang lo ngîrhai chu a hmu a; an kuomah, ‘Iengdinga sûnnithlâka hitaka ngîr mei mei cheu am?’ a ta.

⁷Anni chun a kuomah, ‘Tukhawmin an mi ruoi naw leiin,’ an ta. Ama chun an kuomah, ‘Nangni khawm grêp huonah va fe ta u,’ a ta.

⁸“Chun, khuo a hung inhnu chun, grêp huon neitupa chun a sum enkawltu kuomah, ‘Sinthawtuhai kha ko la, a nuhnungtaka phutin a hmasatak chenin an hlaw pe rawh,’ a ta.

⁹Chun, zântienga a iruoihai chu an hung chun duli an hmu seng a.

¹⁰Chun, a hmasatakhai an hung chun hmu tam deu an inring a; nisienlakhawm, anni khawm chun duli bawk an hmu seng a.

¹¹Chuongchun, an lâk lai chun, in neitupa chungah an chier a,

¹²‘Hieng a nuhnungtakhai hin darkâr khat chau an thaw a, keini sûn rinum le khawsa dotuhai tlukin i siem si a,’ an ta.

¹³Ama ruok chun anni laia mi pakhat kuomah, ‘Ruola, i chungah iengkhawm ka suksuol lêm; duli hlaw dingin ei inrem naw am a nih?

¹⁴I ta kha la la fe el rawh; nang ka ipêk che ang bawk kha, hi a nuhnung tak kuoma khawm hin ka pêk nuom a nih.

¹⁵Ka ta nâknâk chu ka nuom ang anga ka thaw a thieng naw am a nih? Annawleh, kei ka ṭhat leiin nangin i thîk am a nih?’ tîn a dawn a.

¹⁶Chuongangin a nuhnungtakhai chu a hmasatak la nîng an ta, a hmasatakhai khawm chu a nuhnungtakhai la nîng an tih,” a ta.

¹⁷Chun, Isu Jerusalema a hang fe laiin, inchûktirhai sâwm le pahni chu a tumin a ṭhuoi a, lampuia chun an kuomah,

¹⁸“Ngai ta u, Jerusalemah ei fe ding a ni hi. Mihriem Naupa hi thiempu lalhai le Dân inchûktirtuhai kutah inmantirin a um ding a nih; chun, anni chun thi dingin a chungah thu sukthlûng an ta;

¹⁹nuiza siemna dinga hmang ding le, vuok ding le krawsa hemde dingin Jentailhai kuomah pêng an tih; chun, ni thum niin keithoin um a tih,” a ta.

²⁰Chu lai chun, Zebedai naupasalhai nu chu, a naupahai ṭhuoiin a kuomah a hung a, chibai a bûk a, ieng amanih a hni a.

²¹Chun, ama chun a kuomah, “Ieng am i dit a?” a ta. Ama chun a kuomah, “Hieng ka naupahai pahni hi i ramah i changtiengah pakhat, i vawitiengah pakhat an ṭhung theina dingin thu pe ta la,” a ta.

²²Isu ruok chun “In hni hi in hriet naw a nih, ka no dâwn ding chu in dâwn thei am a nih?” a ta, a dawn a. Annîn a kuomah, “Thei e,” an ta.

²³Ama chun an kuomah, “Ka no chu dâwn ngei in tih; nisienlakhawm, ka changtieng le ka vawitienga ṭhung ding thu chu keia pêk ding a ni naw a, ka Pa ibuotsaipêkhai ta ding ni lem a tih,” a ta.

²⁴Chun, sâwm hai chun chu chu an lo hrietin unau pahni hai chunga chun an lunginsen ta a.

²⁵Isu ruok chun anni chu a ko a, “Jentailhai chunga rorêltuhai chu an chungah an inlal bêk bêk hlak a, an mi lienhai chun an chungah thu an nei bêk bêk hlak ti in hriet.

²⁶Nisienlakhawm, nangni laia chu chuong ang chu ni naw ni, tukhawm nangni laia mi lien ni nuom phawt chu in rawngbâwltuin a um ding a nih,

²⁷tukhawm nangni laia a hmasatak ni nuom taphawt chu in siehlawin a um bawk ding a nih;

²⁸Mihriem Naupa hi rawngbâwlpêka um dinga hung a ni naw a, rawngbâwl ding le mi tamtak intlanna dinga, a hringna pe lem dinga a hung ang hin,” a ta.

²⁹Chun, Jerikoa inthawka an suok laiin mipui nasatakin ama an zui a.

³⁰Chun, ngai ta, mitdel pahni lam sîra ṭhunghai chun Isu a fe ti an hriet phingleh, “Lalpa, David Naupa, mi lunginsiet rawh,” tiin an khêk a.

³¹Chun, mipui chun to dingin an hal a; nisienlakhawm, anni chun “Lalpa, David Naupa, mi lunginsiet rawh,” tiin an khêk nâwk zuol a.

³²Chun, Isu a ngîr a, anni a ko a, “In chungah ieng ang am ka thaw in nuom a?” a ta.

³³Anni chun a kuomah, “Lalpa, mit var kan nuom,” an ta.

³⁴Chuongchun, Isûn a lunginsiet bêk bêk a, an mit a them a; chuongchun, an hmu thei nghâl ta a, ama chu an zui ta a.