Read Hmar MATTHAI 22 Bible Online

MATTHAI 22 - Hmar bible

MATTHAI 22

¹Chun, Isûn anni a biek a, an kuomah tekhithuin a hril nâwk a,

²“Vân ram chu lal tu amanih, a naupa ta dinga inneina ruoiṭhena siem le chun tekhi a nih.

³Chun, inneina ruoiṭhe fa dinga a fielhai chu ko dingin a suokhai a tir a; nisienlakhawm, an hung nuom naw a.

⁴Chun, ama chun, ‘Ka ifielhai kuoma khan, ngai ta u, ka ruoi chu kân zo tah; ka bâwngchalhai le ka ran châwm thauhai ka that a, iengkim inzo a ni tah, inneina ruoi fa dingin hung ta ro ti ro,’ tiin suok dang a tir nâwk a.

⁵Nisienlakhawm, an lo ngaisak naw a, an fe hmang el ta a, pakhat chu loah a fe a, pakhat chu sumdâwngnaah,

⁶mi danghai chun a suokhai chu an man a, inzakumtakin an siem a, an sukhlum el ta a.

⁷Chuongchun, lal chu a lunginsen ta a; a sipaihai a tir a, chuong tuolthathai chu a sukbo a, an khuo khawm a rawpêk ta a.

⁸“Chun, a suokhai kuoma chun, ‘Inneina ruoi inzo a ni tah; fielhai ruok kha chu fa tlâk an ni nawh.

⁹Chuongchun, lampêt ṭhuomhaiah fe unla, mi in hmu taphawt inneina ruoi fa dingin fiel ro,’ a ta.

¹⁰Chuongchun, chu suokhai chu an suok a, lampuihaia chun an va fe a, an hmu taphawt, mi suol le mi ṭhahai khawm an ṭhuoi khâwm ta vawng a; chuongchun, inneina ruoi pindan chu mi fiel haiin an lo sip ta a.

¹¹“Nisienlakhawm, lal chu mi fielhai en dinga a hung lût chun, inneina puon sil lo mi pakhat chutaka chun a hmu a.

¹²Chuongchun, a kuomah, ‘Ruola, iengtizie am a na, inneina puon boin hitaka hin i hung lût el a?’ a ta. Chun, ama chu a to zing a.

¹³Chun, lal chun a suokhai kuomah, ‘A kut le a ke khuop unla, tuol tieng inthimah pei dawk ro, chutaka chun ṭap le harâwt chu um a tih,’ ” a ta.

¹⁴“Fielhai chu tamtak an na, thlang hai ruok chu tlâwmte an nih” a ta.

¹⁵Chu lai chun, Pharisaihai chun a thu hrila an man theina zie ding an vân râwn a,

¹⁶Chun, an inchûktirhai, Herod pâwla mihai leh an tir a; chuonghai chun, “Inchûktirtu, mi indiktak i na, titakzetin Pathien thu kawng în chûktir hlak a, pawisak bîk tukhawm i nei nawh ti kan hriet a; tukhawm thlierbîk i nei si naw a.

¹⁷Chuongchun, ieng angin am i ngai a? mi hril raw khai! Kaisar kuomah sie chawi hi a thieng am, a thieng naw?” an ta.

¹⁸Nisienlakhawm, Isûn an suolzie chu a lo hriet a, “Vervêkhai, ieng dinga in mi fie?

¹⁹Sie tangka chu mîn entir ro,” a ta. Chun, a kuomah duli[14] an hung lâk a.

²⁰Ama chun an kuomah, “Hi hi tu lim le tu hming am a na?” a ta. Anni chun a kuomah, “Kaisar,” an ta.

²¹Chun, ama chun an kuomah, “A ni sa chun, Kaisar thilhai chu Kaisar kuomah pe unla, Pathien thilhai chu Pathien kuomah pe ta unla,” a ta.

²²Chuong thu chu an hrietin mak an ti hle a, ama an mâksan a, an fe ta dai a.

²³Chu ni ma chun, Saddukaihai, thonâwkna a um nawh tituhai chu a kuomah an hung a,

²⁴a kuomah, “Inchûktirtu, Mosiein, ‘Mi nau nei loa a thi chun, a unaupain a nuhmei chu neiin, a unaupa ta dingin chi a thlapêk ding a nih,’ a ta.

²⁵Âwle, keini lai sal sari an um a; a upa takin nuhmei a nei a, a thi a; chun, suon a nei naw leiin a nuhmei chu a unaupa ihluo dingin a mâksan a;

²⁶chuongang bawkin a pahnina leh, a pathumna leh, a pasarina chenin an hluo seng a.

²⁷Chun, an rênga an thi hnung chun nuhmei khawm chu a thi ta a.

²⁸Chuongchun, thonâwk pha chun pasarihai lai chun atu nuhmei tak am nîng a ta? an rêngin an nei si a,” tiin an indawn a.

²⁹Isûn a dawn a, an kuomah, “Pathien Lekha thu le, Pathien thilthawtheina in hriet naw leiin in ngai suol hlak a nih.

³⁰Thonâwknaah nuhmei pasal innei ta naw ni hai a, vâna vântirkohai ang an ni ta lem ding a nih in sawnnaw.

³¹Chun, mithi thonâwkna thua Pathienin in kâwla hienga a hril kha in tiem naw am a nih?

³²‘Kei Abraham Pathien, Isak Pathien, Jakob Pathien ka nih,’ tiin Pathien chu mithi Pathien a ni naw a, mi hring Pathien a ni lem,” a ta.

³³Chun, mipuihai chun chu chu an hrietin, a thu inchûktir chu mak an ti hle a.

³⁴Pharisaihai ruok chun, Isûn Saddukaihai a sêldawng ti an hrietin an inkhâwm ta a.

³⁵Chun, anni laia mi pakhat dânhretu hin ama fiena dingin,

³⁶“Inchûktirtu, Dân thua chun ieng thupêk am a ropuitak a?” tiin ân dawn a.

³⁷Chun, ama chun a kuomah, “ ‘Lalpa I Pathien chu I lungvar po poin, i thlarau po poin, i lungril po poin i hmangai ding a nih,’ ti hi.

³⁸Chu chu thupêk ropui le pawimaw tak a nih.

³⁹Chun, a dawttu, a în angpui chu hi hi a nih, ‘Nangma în hmangai angin i vênghai khawm i hmangai ding a nih,’ ti hi.

⁴⁰Hieng thupêk pahnia hin Dân thu le zâwlneihai thu po po ân khaikhâwm vawng a nih,” a ta.

⁴¹Chun, Pharisaihai chu an inkhâwm lai chun, Isûn anni chu thu ân dawn a,

⁴²“Krista chu ieng angin am in ngai a, tu naupa am a na?” a ta. Anni chun a kuomah, “David naupa,” an ta.

⁴³Ama chun an kuomah, “Iengtiziein am David chun Thlarauin ‘Lalpa’ tiin,

⁴⁴‘Lalpa chun ka Lalpa kuomah, Ka chang tieng ṭhung rawh; I hmêlmahai i kepha hnuoia ka sie hmakhat chu,’ a ti a? a ta.

⁴⁵“David chun ama chu, ‘Lalpa,’ a ti si chun iengtin am a naupa ni thei a ta?” a ta.

⁴⁶Chun, tukhawmin bau khat khawma an dawn thei ta naw a; chu ni chena inthawk chu tukhawmin thu dang hrim hrim khawma an indawn ngam ta nawh.