Read Hmar MATTHAI 24 Bible Online

MATTHAI 24 - Hmar bible

MATTHAI 24

¹Chun, Isu Pathien biekina inthawk chun a suok a, a fe ding a na.

²Chun, a inchûktirhai chu Pathien biekinhai inentir dingin a kuomah an hung a. Ama ruok chun, an kuomah, “Hieng po po hi in hmu maw? Titakzetin ka hril cheu hi, sukchim loa lung inthuo hrim hrim hitaka hin um naw ni,” a ta, a dawn a.

³Chun, Oliv tlânga a ṭhung laiin inchûktirhai chu anni khâtin a kuomah an hung a. “Chuong chu iengtik am hung um a ta? I hung nâwkna le khawvêl tâwpna inchikna chu ieng am nîng a ta? mi hril rawh,” an ta.

⁴Chun, Isûn a dawn a, an kuomah, “Tukhawmin an hlêm nawna ding cheuin fîmkhur ro.

⁵Mi tamtakin, ‘Krista chu ka nih,’ tiin keia hming sâlin hung an ta, mi tamtak an hlêm ding a ni si a.

⁶Chun, indo thu le indo thuthang la hrieng in ta; in lunginzîng nawna dingin fîmkhur ro; chuong chu a hung tlung ding hrim a nih; nisienlakhawm, tâwpna chu la ni hri naw nih.

⁷Hnam tum le hnam tum indo an ta, ram tum le ram tum indo an ta; hmun tum tumah ṭâmhai tlâng a ta, simkhawleihnuoihai inhnîng a tih.

⁸Chuong po po chu nauhase phutna a nih.

⁹“Chu phâ chun rinum tuor dingin inmantir an ti cheu a, sukhlum an ti cheu a; ka hming leiin hnam po po theida nîng in tih.

¹⁰Chu phâ chun mi tamtak tlûng an ta, inmantir tuo tâwl an ta; intheida tuo tâwl an tih.

¹¹Zâwlnei tehlêm tamtak khawm hung suok an ta, mi tamtak hlêm an tih.

¹²Chun, suol a la pung ding a ni leiin mi tam lem hmangaina chu la dei a tih.

¹³Nisienlakhawm, a tâwpna chena tuor pei taphawt chu, chu ngei chu sandamin um a tih.

¹⁴“Chun, hi Ram Chanchin Ṭha hi hnam po poin an hrietna dingin khawvêl po poah hrilin um a tih; chu zoa chun tâwpna chu la tlung a tih.

¹⁵“Chuongchun, sukrêmtu tirdakum, zâwlnei Daniel ihril kha hmun inthienga ngîra in hmu phâ chun (a tiem taphawt chun a umzie hre raw se),

¹⁶Juda rama umhai chu tlânga dâm tlân hmang raw hai se;

¹⁷in chunga um chu a ina thilhai inchû dingin ṭum naw raw se;

¹⁸chun, loa um chu a puon inchû dingin kîr nâwk naw raw se;

¹⁹Chuong nia chun inrâihai le nautesen pawmhai chung chu rik a tih!

²⁰Chun, in tlân hmang ding hun chu thlasik amanih, châwlni amania a hung tlung nawna dingin ṭawngṭai ro;

²¹chu phâ chun rinumna nasatak a um ding a ni si a; chuong ang hrim hrima nasa chu leihnuoi insieng tira inthawkin tu chen hin a la um ngai naw a, um khawm iengtika khawm um nâwk ta bawk naw ni.

²²Chun, chuong nihai chu suktâwi ni naw sien chu mihriem hrim hrim damin suok naw ni hai; nisienlakhawm, thlanghai lei chun chuong nihai chu suktâwi nîng a tih.

²³“Chu phâ chun, tukhawmin in kuomah, ‘En ta, Krista chu hitaka hi a um,’ amanih, ‘Hiva hi,’ amanih an ti chun awi naw ro;

²⁴Krista tehlêm le zâwlnei tehlêmhai an hung suok ding a ni si a; thei hai sien la chu, thlanghai rau khawm an hlêm theina dingin inchikna le thilmak ropuitakhai thâwng an tih.

²⁵Ngai ta u, ka hril lâwk ta cheu hi.

²⁶Chuongchun, in kuomah, ‘Ngai ta u, thlalêrah a um,’ an ti cheu chun fe suok naw ro, ‘Pindan sûngrilah a um,’ an ti cheu chun awi nuom naw ro.

²⁷Kâwl saktieng a hung inlep a, thlangtieng chen khawmin ân lang hlak. Mihriem Naupa hung nâwkna chu chuong ang chu a ni ding a ni si a.

²⁸Khâwlaia khawm saruong umna taphawta chun mulukawlhai khawm um khâwm an tih.

²⁹“Nisienlakhawm, chuong ni rinum zo phingle chun, nisa inthimin um a ta, thla var ta naw ni a, vâna arasihai hung tlâng an ta, vân thilthawtheinahai chu sukhnîngin um a tih.

³⁰Chu phâ chun Mihriem Naupa inchikna chu vânah inlang a ta, chun, hnuoia um chi tinin an âwmhai chum an ta, Mihriem Naupa hi thilthawtheina le ropuina nasatak leh vân sûm chunga hung hmûng an tih.

³¹Chun, a vântirkohai chu tawtawrâwt ri nasatak leh tir suok a tih. Anni chun a ithlanghai chu kâwl kil lia inthawkin, vân tâwpa inthawka a tâwp khing tieng chenin lâwr khâwm an tih.

³²“Chuongchun, theichang kûnga hin chu tekhithu chu inchûk ro. A kâu a hung indâwn a, a hna a hung inder chun, nipui a ni ding a nih ti in hriet.

³³Chuong ang bawkin nangni khawmin chuong po po chu in hmu phâ chun, ama chu a hung hnai ta a, kawtkhâr bulah a um ti hre ro.

³⁴Titakzetin ka hril cheu hi, chuong po po chu a tlung kim hmakhat chu tulai ruoltharhai hi bo naw ni hai.

³⁵Hnuoi le vân bo a ta, ka thu ruok chu bo naw ni.

³⁶“Nisienlakhawm, chu ni le a phâ thu chu Pa chau naw chun, tukhawmin, vâna vântirkohai khawmin, Naupa khawmin an hriet nawh.

³⁷Chun, Noa damlai ang bawk khan Mihriem Naupa hung nâwkna chu nîng a tih.

³⁸Chuong ni tuilêt hmahai chun, Noa lawnga a lût ni chenin an fâkin an dâwn a, nuhmei pasal an innei hlak;

³⁹tui a hung lêt a, an rênga a lâk hmang vawng hmakhat chu iengkhawm an hriet naw a; Mihriem Naupa hung nâwkna chu chuong ang bawk chu nîng a tih.

⁴⁰Chu phâ chun, loah mi pahni um an ta, pakhat chu fe hmangpuiin um a ta; pakhat chu mâksanin um a tih.

⁴¹Nuhmei pahni bu râwtnawina chun bu râwtnawiin um an ta, pakhat chu fe hmangpuiin um a ta; pakhat chu mâksanin um a tih.

⁴²Chuongchun, ngaiven ro, ieng ni am in Lalpa a hung ding in hriet si naw a.

⁴³Nisienlakhawm, hi hi hre ro, inru a hung ding pha in neituin hre sienla vêng a ta, a in inverpawptir naw ni.

⁴⁴Chuleiin, nangni khawm inring zingin um ro, in ring naw hunah Mihriem Naupa a hung din g a ni si a.

⁴⁵“Suok ringum vartak, a puin a hun po leh an bu chan ding sem pêk dinga a sûnghai chunga hotua a siem chu tu tak am nîng a ta le?

⁴⁶A pu a hung phâleh suok chuong anga thawa a hung hmu ding chu a hamṭha.

⁴⁷Titakzetin ka hril cheu hi, a inei po po chungah hotûn siem a tih.

⁴⁸Amiruokchu, suok suol chun a lungrilin, ‘Ka pu a hung vak naw ding a nih,’ tiin,

⁴⁹a suok chanpuihai lo vaw ta sienla, mi inruihai kuomah fain dâwn sienla,

⁵⁰chu suok pu chu a ring naw niah, a hriet naw laiin hung a ta,

⁵¹tum hni hung insuong a ta, mi vervêkhai chan ang hung inchangtir a tih; chutaka chun ṭap le harâwt chu um a tih.